KİVDF ilə Suraxanı İcra Hakimiyyətinin birgə konfransı

Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun və Suraxanı Rayon İcra Hakimiyyətinin təşkilatçılığı ilə dünən "Yerli icra Hakimiyyəti orqanları ilə kütləvi informasiya vasitələri arasında əməkdaşlığın inkişaf etdirilməsi" mövzusunda konfrans keçirilib.

Yığıncaqda Suraxanı rayon ictimaiyyətinin nümayəndələri və 30-dək tanınmış kütləvi informasiya vasitələrinin rəhbərləri iştirak ediblər.

Tədbirdən əvvəl Suraxanı Rayon İcra Hakimiyyətinin başçısı İlqar Abbasov media nümayəndələrini son illər rayonda görülən abadlıq- quruculuq işləri ilə yaxından tanış edib. Bu məqsədlə tədbir iştirakçıları rayonda fəaliyyət göstərən 268 saylı körpələr evi-uşaq bağçasında, xüsusi qayğıya ehtiyacı olan uşaqlar üçün Reabilitasiya Mərkəzində, 327 saylı tam orta məktəbdə və "Atəşgah Məbədi" Dövlət Tarixi-Memarlıq Qoruğunda olublar. Konfrans iştirakçılarına adıçəkilən müəssisələrin fəaliyyəti barədə geniş məlumat verilib. Mərasimə dəvət edilmiş media təmsilçiləri rayonda Ümummilli Lider Heydər Əliyevin xatirəsinə ucaldılmış abidənin önünə gül dəstəsi qoyublar. Tədbirdə Suraxanı rayonu ilə bağlı film də nümayiş etdirilib. Bundan sonra konfrans geniş heyətlə rayon icra hakimiyyətində davam edib.

Yığıncaq iştirakçılarını salamlayan Suraxanı Rayon İcra Hakimiyyətinin başçısı İlqar Abbasov tədbir iştirakçılarına konfransın mahiyyəti barədə məlumat verib.

Bu cür tədbirlərin ənənə halını aldığını söyləyən icra başçısı artıq ötən il rayonda belə bir konfransın keçirildiyini diqqətə çatdırıb.

Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli çıxışında Fondun fəaliyyətindən söz açaraq bildirib ki, ötən müddətdə kütləvi informasiya vasitələrinin maddi-texniki problemlərinin həllinə və inkişafına, jurnalistlərin peşəkarlıq səviyyəsinin yüksəldilməsinə, sosial müdafiəsinin möhkəmləndirilməsinə, habelə beynəlxalq təcrübəni mənimsəmələrinə xidmət edən çoxsaylı layihələr icra edilib.

Azərbaycan mətbuatının müstəqillik dövründə böyük uğurlar qazandığını tədbir iştirakçılarının nəzərinə çatdıran V. Səfərli bu sahədə Ulu Öndər Heydər Əliyevin əvəzsiz xidməti olduğunu bildirib. Dövlətin mətbuata mütəmadi olaraq qayğı göstərdiyini söyləyən V. Səfərli 2009-cu il aprelin 3-də Prezident İlham Əliyevin sərəncamı ilə Kütləvi İnformasiya Vasitələrinin İnkişafına Dövlət Dəstəyi Fondu yaradıldığını deyib. Jurnalist peşəkarlığının artırılması istiqamətində görülən işlərdən danışan Vüqar Səfərli qeyd edib ki, Fondun son illərdə həyata keçirdiyi mühüm layihələrdən biri də kütləvi informasiya vasitələri ilə yerli icra hakimiyyəti orqanları arasında əlaqələrin inkişaf etdirilməsidir. İcraçı direktor belə tədbirlərin mətbuat nümayəndələri ilə yerli icra strukturları arasında sivil əməkdaşlıq münasibətlərinin daha da genişlənməsinə təkan verdiyini yığıncaq iştirakçılarının diqqətinə çatdırıb.

2012-ci ilin 9 ayı ərzində Suraxanı rayonunda görülmüş işlər barədə qısa məlumat verən Suraxanı Rayon İcra hakimiyyətinin başçısı İlqar Abbasov öz növbəsində Fondun təşəbbüsü ilə keçirilən konfransın məmurlarla jurnalistlər arasında qarşılıqlı etimadın möhkəmləndirilməsi və əməkdaşlığın genişləndirilməsi baxımından müstəsna əhəmiyyət daşıdığını deyib.

O vurğulayıb ki, rəhbərlik etdiyi rayon Bakının ən böyük rayonlarından biridir. Onun sözlərinə görə, son illər ölkədəki dinamik sosial-iqtisadi inkişaf Suraxanı rayonundan da yan keçməyib: "Cari ilin 9 ayı ərzində Suraxanı rayonunda Dövlət və yerli Proqramların icrası uğurla davam edib. Azərbaycan Respublikasının Prezidentinin Sərəncamı ilə təsdiq edilmiş " 2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"na əsasən Suraxanı rayonunda nəzərdə tutulmuş 102 tədbirin 31-i tam icra olunmuşdur, 47-nin icrasına başlanmışdır. Dövlət Proqramının icrası ilə əlaqədar 2012-ci ilin 9 ayı ərzində 295,3 min p.m qaz, 16, min p.m su, 4,5 min p.m kanalizasiya xətləri çəkilmişdir.

Hövsan-Binə-Dədə Qorqud- Bahar yaşayış sahələrinin ətrafındakı 300 hektar ərazidə suvarma sistemi qurulmuş və ərazi yaşıllaşdırılmışdır. Bu dövr ərzində 6 məktəb əsaslı təmir edilmiş, 2 məktəb üçün 36 sinif otağı tikilmişdir. 5 körpələr evi-uşaq bağçası əsaslı təmir edilmiş, 2 səhiyyə müəssisəsində təmir işləri davam etdirilir".

İlqar Abbasovun sözlərinə görə, bu il Hövsan qəsəbəsində şəhid ailələri və Qarabağ müharibəsi əlilləri üçün 81 mənzilli 9 mərtəbəli sayca 2-ci yaşayış binası inşa edilib: "Rayonda su-kanalizasiya sisteminin yaxşılaşdırılması istiqamətində xeyli işlər görülüb. Rayon əhalisinin qaz və elektrik təchizatı xeyli yaxşılaşdırılıb. Poçt və rabitə xidməti sahəsində problemlər aradan qaldırılıb. Səhiyyə və təhsil sahəsində də xeyli irəliləyişlər mövcuddur. Əhalinin işlə təminatı da yaxşılaşıb. Əhalinin istirahət etməsi məqsədi ilə rayonda bir neçə park salınıb".

Tədbirdə çıxış edən Azərbaycan Mətbuat Şurasının sədri Əflatun Amaşov son illər Suraxanı rayonunda böyük abadlıq işlərinin aparıldığını söyləyib: "Bu gün biz rayonu gəzərkən böyük quruculuq işlərinin görüldüyünün şahidi olduq. Həqiqətən son illər Suraxanı rayonunun mənzərəsi dəyişib. Bütün bunlar göz qabağındadır".

Əflatun Amaşov milli jurnalistikamızın cəmiyyətin tərəqqisinə verdiyi sanballı töhfələrdən də söz açıb. O həmçinin, ölkə həyatının ən müxtəlif sahələrində həyata keçirilən islahatların cəmiyyətə dolğun və obyektiv şəkildə çatdırılmasında, habelə demokratik proseslərin inkişafında ölkə mətbuatının xidmətlərinin böyük olduğunu deyib.

Daha sonra dialoq və diskussiya şəraitində davam edən tədbirdə qarşılıqlı maraq doğuran məsələlərə aydınlıq gətirilib. "525-ci qəzet"in baş redaktoru Rəşad Məcid və digər iştirakçılar etdikləri çıxışlarda icra strukturları ilə kütləvi informasiya vasitələri arasında qarşılıqlı faydalı əməkdaşlıq əlaqələrinin genişləndirilməsi baxımından belə tədbirlərin əhəmiyyətini vurğulayıblar. Konfransda kütləvi informasiya vasitələri ilə yerli icra strukturları arasında əməkdaşlığın daha da genişləndirilməsi ilə bağlı təkliflər səsləndirilib.

Fondun icraçı direktoru Vüqar Səfərli Fondun Suraxanı Rayon İcra Hakimiyyəti ilə birgə razılıq əsasında "Suraxanı rayonunun sosial-iqtisadi inkişafı: real vəziyyət və prespektivlər " mövzusunda fərdi jurnalist yazıları müsabiqəsi keçirəcəyini bəyan edib və belə bir konfransın keçirilməsinə verdiyi dəstəyə görə Suraxanı Rayon İcra Hakimiyyətinin rəhbərliyinə minnətdarlığını bildirib.

Suraxanı Rayon İcra Hakimiyyətinin başçısı İlqar Abbasov sonda tədbirin jurnalistlərlə icra strukturları nümayəndələri arasında əməkdaşlığın inkişafı baxımından əhəmiyyətli olduğunu önə çəkərək faydalı təşəbbüsə görə Fondun icraçı direktoruna və aparıcı kütləvi informasiya vasitələrinin rəhbərlərinə öz təşəkkürünü bildirib.

Ədalət.-2012.-2 noyabr.-S.2.