FƏRƏHLİ ÖMÜR YAŞAMAQ SƏLAHİYYƏTİ

(əvvəli ötən saylarımızda)

Əhalinin sosial müdafiəsi

Şəkililər ölkə rəhbərinin əhalinin sosial müdafiəsi sahəsində yeritdiyi siyasəti yüksək qiymətləndirir, aztəminatlı əhali qrupuna göstərdiyi böyük diqqət və qayğının təzahürü kimi qəbul edir. Nazirlər Kabinetinin oktyabr ayının 10-da keçirilən geniş iclasında çıxış edən Prezidentimiz demişdir: "Orta aylıq əməkhaqqı, orta aylıq pensiya artıb və MDB məkanında bu göstərici ən yüksək göstəricilər arasındadır. Belə ki, Azərbaycanda orta maaş 500 dollara bərabərdir, orta pensiya 190 dollara bərabərdir. Bu davamlı bir prosesdir, pensiyalar, əmək haqları ildən-ilə qaldırılır. Hazırda Azərbaycanda pensiyalar əmək haqlarının 40 faizini təşkil edir ki, bu da Avropanın inkişaf etmiş ölkələrinin kriteriyaları səviyyəsindədir" Bəhs olunan dövrdə Şəkidə əməkhaqları, pensiyalar və ünvanlı sosial yardımların əhaliyə çatdırılmasında, əhalinin sosial müdafiəsinin daha etibarlı şəkildə təmin olunması istiqamətində bir sıra işlər görülmüşdür. 2012-cu ilin doqquz ayında 2017 ailəyə Ünvanlı Dövlət Sosial Yardımı təyin olunmuşdur. Hal-hazırda 2345 ailə Ünvanlı Dövlət Sosial Yardımı alır. Şəki rayonu üzrə hər bir ailə üzvünə təyin edilən Ünvanlı Dövlət Sosial Yardımın orta aylıq məbləği 24 manat 86 qəpik, hər ailəyə düşən orta məbləğ isə 108 manat 70 qəpik təşkil etmişdir.

Dövlət Sosial Müdafiə Fondunun Şəki Şəhər Şöbəsi 2012-ci ilin doqquz ayında 25805 nəfər əmək pensiyaçısına xidmət göstərmişdir. Həmin pensiyaçılardan 16998 nəfəri yaşa, 7116 nəfəri əlilliyə ,1691 nəfəri isə ailə başçısını itirməyə görə pensiya alanlardır. Dövlət Sosial Müdafiə Fondunun Şəki şəhər şöbəsi üzrə pensiyanın orta aylıq məbləği 140 manat olmuşdur. Bu 2003-cü illə müqayisədə pensiyaların orta aylıq məbləğində 5 dəfə artım deməkdir.

Aqrar sahəyə xüsusi diqqət: taxılçılıqda rekord göstərici

Ötən illərdə olduğu kimi, bu ilin doqquz ayında da məhsul istehsalının artırılması, kənd təsərrüfatında özəl bölmənin daha da genişləndirilməsi diqqət mərkəzində saxlanılmış, taxılçılığın, heyvandarlığın, meyvəçiliyin, üzümçülüyün inkişafı üçün bir sıra tədbirlər həyata keçirilmişdir. Respublikamızın ən iri taxılçılıq rayonlarından biri olan Şəkinin fermer təsərrüfatlarında 2012-ci ilin məhsulu üçün 76265 hektar sahədə payızlıq taxıl əkini həyata keçirilmişdir. Yetişən məhsulu tez və itkisiz yığmaq üçün bütün zəruri tədbirlər həyata keçirilmişdir. Həyata keçirilən bu və ya digər tədbirlər nəticəsində rayonda taxıl biçini vaxtında və itkisiz başa çatdırılmış, 256 min ton taxıl istehsal edilmiş, hər hektardan orta məhsuldarlıq 35,2 sentner təşkil etmişdir. Bu il rayonda istehsal olunan taxıl məhsulu Şəkinin tarixində rekord göstəricidir. Nazirlər Kabinetinin 2012-ci ilin doqquz ayının yekunlarına və qarşıda duran məsələlərə həsr olunan yığıncağında çıxış edən Prezident iri fermer təsərrüfatlarının yaradılmasının vacib olduğunu bir daha vurğulayaraq bu prosesin daha da sürətləndirilməsinin zəruri olduğunu bildirmişdir. Cənab prezident əsas ərzaq məhsullarına olan təlabatın 100 faiz Azərbaycanda istehsal olunan mallar hesabına təmin edilməsi məsələsinə də toxunmuş, bu məqsədlə Sahibkarlığa Kömək Milli Fondunun xətti ilə sahibkarlara güzəştli kreditlərin verildiyini, gələn il bu məbləğin 300 milyon manata çatdırılacağını bildirmişdir. Prezidentin sentyabrın 9-da açılışında iştirak etdiyi taxıl anbarı və dəyirman kompleksi məhz əsas ərzaq məhsullarına olan təlabatın təmin edilməsi istiqamətində rayonda görülən mühüm işlərdən biridir. Regionların 2009-2013-cü illərdə sosial -iqtisadi inkişafı Dövlət Proqramına uyğun olaraq, Şəki rayonunun Göybulaq kəndində üç hektar ərazidə taxıl məhsullarının tədarükü, saxlanması və emalı kompleksi inşa edilmişdir. Müasir texnologiya əsasında qurulmuş taxıl anbarı Şəki və ətraf rayonlarda fəaliyyət göstərən fermerlərin istehsal etdiyi taxıl məhsullarının uzun müddətə itkisiz saxlanmasına imkan verəcək. Rayonun kənd təsərrüfatının əsas sahələrindən biri də heyvandarlıqdır. Bu sahənin də dinamik inkişafının təmin edilməsi, heyvandarlıq məhsulları istehsalının həcminin artırılması daim diqqət mərkəzində saxlanılır.

Qeyd etmək lazımdır ki, istər bitkiçilik, istərsə də heyvandarlıq məhsulları istehsalının artırılması ilə yanaşı, emal olunmasının təşkili, yeni emal müəssisələrinin yaradılması, istehsal olunan məhsulların satışna köməklik göstərilməsi, aqroservis xidmətlərinin genişləndirilməsi və s. qarşıda duran həlli vacib məsələlərdəndir.

Bütün yenidənqurma işlərində Şəkinin milli memarlıq üslubu qorunur

Məlumdur ki, Şəki Şəhər İcra Hakimiyyəti və Arxitektura Şəhərsalma Komitəsi ilə birlikdə Şəki şəhərinin Baş Planı hazırlanmışdır. Baş Plana uyğun olaraq artıq Şəki şəhərində geniş təmir- tikinti, abadlıq və yenidənqurma işlərinə başlanmışdır.Şəkidə görülən bütün abadlıq - quruculuq işləri şəhərin milli-memarlıq üslubunun qorunub saxlanmasına uyğun aparılır. Bu ilin sentyabr ayının 9-da Şəkiyə səfəri çərçivəsində dövlətimizin başçısı məcburi köçkünlərlə və Şəki şəhər ictimaiyyətinin nümayəndələri ilə görüşündə demişdir" Şəkinin çox füsunkar, özünəməxsus gözəlliyi vardır. Gözəl, qədim şəhərdir. Heç bir şəhərə bənzəmir.Ona görə burada bütün quruculuq, abadlıq işləri bax bu üslubda aparılmalıdır. İndi təmir edilən binalar, onların fasadlar, dam örtüklərini, döşəmələri, hasarları, nə varsa hamısı görürəm ki, qədim Şəki üslubundadır."

(ardı gələn sayımız)

MƏZAHİR ƏHMƏDOĞLU

Ədalət.-2012.-6 noyabr.-S.7.