Zaqatala: ZƏLZƏLƏNİN VURDUĞU ZİYANLAR ARADAN QALDIRILIR, DÖVLƏT PROQRAMININ İCRASI UĞURLA DAVAM EDİR

Dövlətin qayğısı fəlakətin acılarını unutdurur

Bu ilin may ayında ölkənin şimal-qərb bölgəsində baş vermiş güclü zəlzələdən daha çox ziyan çəkən Zaqatala rayonunda həyat öz axarı ilə davam etməkdədir. Bir yandan zəlzələnin nəticələri aradan qaldırılır, bir tərəfdən də Dövlət Proqramının istiqamətlərinə uyğun olaraq quruculuq işləri davam etdirilir.

Dövlət başçısının iki dəfə zəlzələyə məruz qalan kəndlərdə olması, eləcə də Fövqəladə Hallar naziri Kəmaləddin Heydərovun müntəzəmliklə təbii fəlakət zonasına gedib görülən işlərlə maraqlanması, bütün gedişatı gündəlik nəzarətdə saxlaması, rayon rəhbərliyi tərəfindən göstərilən qayğı və diqqət insanlarda ruh yüksəkliyi oyatmaqdadır.

Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2012-ci ilin 9 ayının sosial-iqtisadi inkişafının yekunlarına və qarşıda duran vəzifələrə həsr olunmuş iclası ilə əlaqədar Zaqatala rayonunda müşavirə keçirilmişdir. Müşavirədə məruzəsi dinlənilən Zaqatala Rayon İcra Hakimiyyətinin başçısı Mübariz Əhmədzadə müəyyən məsələləri xüsusi vurğulamışdır. O, demişdir:

- Prezident İlham Əliyev yekun nitqində ölkədə inflyasiya risqlərinin qarşısının alınması, bölgəmizdə baş vermiş zəlzələnin nəticələrinin aradan qaldırılması ilə bağlı tədbirlərin davam etdirilməsi, qaçqın və məcburi köçkünlərin yaşayış şəraitinin daha da yaxşılaşdırılması, ölkədə məktəblərin, uşaq bağçalarının, yeni yolların tikintisi və yenidən qurulması, əhalinin qaz, elektrik və içməli suya tələbatının ödənilməsi, ərzaq təhlükəsizliyinin təmin olunması ilə bağlı tapşırıqlarını vermişdir.

Bu ilin may ayında rayonda baş vermiş dağıdıcı zəlzələdən sonra artıq 2-ci dəfə 09 sentyabr tarixdə rayonumuza gələn Azərbaycan Respublikasının Prezidenti cənab İlham Əliyev rayonda baş vermiş təbii fəlakətin nəticələrinin aradan qaldırılması işlərinin gedişi ilə bir daha yaxından tanış olmuş, qəzalı vəziyyətə düşdüyündən yenidən tikilmiş şəhər 2 saylı 750 şagird yerlik və Gözbarax kənd 500 şagird yerlik tam orta məktəblərin, Gözbarax kəndində yeni inşa olunan 50 yerlik uşaq bağçasının, həmçinin 2 mərtəbəli 5 otaqlı fərdi yaşayış evinin açılışında iştirak etmiş, Bəhmətli kəndində 600 şagird yerlik tam orta məktəb binasının təməlini qoymuş, zəlzələnin nəticələrinin tam aradan qaldırılması üçün öz tapşırıq və tövsiyələrini vermişdir.

Nazirlər Kabinetinin yığıncağında möhtərəm Prezidentimiz cənab İlham Əliyev demişdir: "Mən zəlzələ zonasında iki dəfə olmuşam. Zəlzələ baş verdikdə və keçən ay. Artıq işin gözəl nəticələrini gördüm. Həm məktəblər qısa müddət ərzində tikilmişdir, həm evlər tikilir, bərpa edilir. Bu məqsədlər üçün Prezidentin ehtiyat fondundan, həm də dövlət büdcəsindən kifayət qədər böyük-300 milyon manatdan çox vəsait ayrılmışdır. Çalışmalıyıq ki, qalan vəsait də təşkil edilsin ki, qısa müddət ərzində bu məsələni tam şəkildə həll edək."

Artıq bu günədək rayonda 2784 qəzalı ev və 19 məktəb sökülmüş, 4 yeni məktəb tikilərək istifadəyə verilmiş, 2433 evin və 15 məktəbin tikintisi sürətlə davam etdirilir.

Rəqəmlər də uğurları təsdiqləyir

2012-ci ilin doqquz ayında rayonda ümumi məhsul buraxılışının həcmi ötən ilin müvafiq dövrü ilə müqayisədə 2,6 dəfə artmışdır. Məhsul buraxılışı əvvəlki illə müqayisədə sənayedə 2,1 faiz, tikintidə 22,6 dəfə, kənd təsərrüfatında 20,6 faiz, nəqliyyatda 0,1 faiz, rabitədə 4,7 faiz, ticarətdə 4,1 faiz çox olmuş, əhalinin pul gəlirləri 11,0 faiz, əhaliyə göstərilən pullu xidmətlərin həcmi 7,1 faiz, pərakəndə əmtəə dövriyyəsi isə 5,4 faiz artmışdır. Regionların sosial-iqtisadi inkişafı Dövlət Proqramının icra olunması nəticəsində hesabat dövrü ərzində rayonda 875-ı daimi olmaqla 971, 2004-cü ildən sonra isə 9989-u daimi olmaqla 14624 yeni iş yeri yaradılmışdır.

Rayonda sahibkarlığın inkişafı diqqət mərkəzində saxlanılmış, 11 sahibkara 4,3 ha torpaq sahəsi satılmış, 13 sahibkarlıq obyektinin tikintisinə icazə verilmiş, Sahibkarlığa Kömək Milli Fondunun vəsaiti hesabına 20 layihə üzrə 539,0 min manat həcmində güzəştli kredit verilmişdir.

Rayonda 1 yeni qeyri bank kredit təşkilatı fəaliyyətə başlamaqla 9 bank filialı və 3 qeyri bank kredit təşkilatları tərəfindən əhaliyə və iş adamlarına ümumilikdə 23,2 milyon manat həcmində kreditlər verilmişdir ki, bu da keçən ilin müvafiq dövrü ilə müqayisədə 19,5 faiz çoxdur.

Rayonda illik istehsal gücü 500 ton olan quş əti və gücü 5 ton olan müxtəlif fındıq məmulatları istehsalı müəssisələrində, 1000 tonluq soyuducu anbarında, təbii fəlakətin nəticələrinin aradan qaldırılması məqsədilə 4 ədəd müxtəlif gücdə beton zavodlarında tikinti işləri başa çatdırılmış, müasir standartlara uyğun xırman, qaraj və 300 tonluq taxıl anbarının tikintisinə başlanmış, yeni çörək zavodunun, kiçik su elektirik stansiyasının tikintisi üçün torpaqayırma işlərinə və tutumu 10000 ton olan taxıl anbarının tikintisi üçün sənədləşmə işlərinə başlanılmışdır.

(ardı gələn sayımızda)

MƏZAHİR ƏHMƏDOĞLU

Ədalət.-2012.-8 noyabr.-S.7.