İncəsənət Gimnaziyasında Aqil Abbas gecəsi

Azərbaycan Milli Konservatoriyasının İncəsənət Gimnaziyasında yazıçı, millət vəkili Aqil Abbasın yaradıcılıq gecəsi keçirilib. Gecədə Aqil Abbasın əsərləri barəsində geniş fikir mübadiləsi aparılıb.

Gecənin aparıcısı professor Ənvər Əliyev yazıçının yaradıcılığı barəsində danışarkən qeyd edib ki, Aqil Abbas hər cümləsində xalqın təəssübünü çəkir: "Aqil Abbasın elə əsəri yoxdur ki, onu oxumayaq. Yüksək bədii keyfiyyət məsulu olmaqla yanaşı Aqil Abbas həm də dünyəvi oxucuya kimliyimizi göstərə bilir. Onun "Dolu" romanı və eyni adlı ssenariyə çəkilən filmi Azərbaycan xalqının nə qədər möhtəşəm olmasından xəbər verir".

Gecədə İncəsənt Gimnaziyasının direktoru Mahizər Şabənbəyova da çıxış edərək xüsusi ilə vurğulayıb ki, Aqil Abbas yaradıcılığı insana yaşamaq və Vətən uğrunda mübarizə aparmaq eşqi aşılayır: "Bu vətən bizimdi, onun bir qarışını belə, məkirli qüvvəyə bağışlaya bilmərik. Aqil Abbas əsərləri ilə bir daha sübut edir ki, Qarabağ Azərbaycanın əzəli və əbədi torpağıdı, onun bir metrini belə, düşmənə verməyəcəyik".

Tədbirdə "Dolu" filminin rejissoru Elxan Cəfərov, baş rolların ifaçıları Şamil Qurbanov və başqaları da çıxış edərək, Aqil Abbas yaradıcılığının Azərbaycan üçün önəmini vurğulayıblar.

Sonda Aqil Abbasın "Ölülər" pyesinin ədəbi-bədii kompozisiyası səhnələşdirilib. Gecənin iştirakçıları tamaşanı böyük rəğbətlə qarşılayıb.

Anar

Ədalət.-2012.-9 noyabr.-S.2.