SAATLI REGİONUN GÖZƏL ŞƏHƏRİ

(əvvəli ötən sayımızda)

Saatlı rayon icra hakimiyyəti başçısının Gomuşlu kəndi üzrə icra nümayəndəsi Rizvan Gülüş oğlu Mirzəyev də belə təəssübkeşlərdən biridir. Ən müxtəlif mövzularda belə söhbət etməyə hazır olan icra nümayəndəsi Saatlı rayon iqtisadi inkişafından, sosial şəraitindən danışmağı daha üstün tutur:

- Yox, elə təəssürat yaranmasın ki, mən vəzifəli şəxs olduğum üçün ancaq fərəhləndirici rəqəmlərdən danışacağam. Bu qətiyyən belə deyil. Əvvələn mən bu rayonda doğulumşam, ikincisi də mənim dediklərim rayon iqtisadiyyatının rəsmi rəqəmləri olmaqla bərabər, həm də bizim həyat göstəricimizdir.

2012-ci ilin 9 ayı ərzində istehsalımız 16.2 faiz artaraq 172,8 min manat olmuşdur. Bu rəqəmdə qeyri-dövlət sektorunun payı 86 faizdir.

Rayonumuzdakı abadlıq işlərini şərh etməyə ehtiyac yoxdur, bunlar göz önündədir. Rəqəmlərin dili ilə desək, Saatlı şəhərinin küçələrinə, meydanlarına, dalanlarına 17 min kv. metr asfalt vurulmuşdur. 47 min 300 kilometr sahəsi ilə qum-çınqıl materialı ilə təmin edilmişdir. Heydər Əliyev prospekti boyunca köhnə istinad divarları sökülmüş və yenilənmişdir. 2100 kv.metr sahəyə üzlük bəzək piltələri döşənmişdir. Heydər Əliyev parkına 100 ədəd, Heydər Əliyev prospektinə, Cəfər Cabbarlı küçələrinə 82 ədəd işıq dirəkləri qoyulmaqla müasirləşdirilmişdir.

Saatlı-Musalı-Mərzəli avtomobil yolunun Araz çayı üzərindən keçən hissəsi rayon rəhbərliyinin təşəbbüsü ilə "Azərkörpü" ASC tərəfindən təmir edilmişdir.

Rayon iqtisadiyyatının əsasını təşkil edən kənd təsərrüfatında bir sıra uğurlar qazanmışıq. Sahibkarlığa Kömək Milli Fondunun xətti ilə 293 min manat güzəştli kredit verilmişdir.

2012-ci ilin 9 ayında Saatlı rayonu ərazisində 5647 ha sahədə pambıq əkilməsi üçün razılığa gəlinmişdir. 1 oktyabr 2012-ci il tarixə kimi pambıq zavodları 6515 ton pambıq tədarük etmişlər. Əlavə olaraq bildirim ki, ilin axırına 3 ay qalmış müddətə qədər rayonumuz diri çəkidə 5885 ton ət, 32360 ton süd, 5 milyon 292 min ədəd yumurta istehsal etmişdir.

Rayonda iribuynuzlu mal-qaranın sayı 66783 baş, xırdabuynuzluların sayı isə 100 min 809 baş olmuşdur.

Rayonumuzun ərazisindəki əkin altında olan torpaqların vaxtaşırı suvarılmasını təmin etmək məqsədi ilə 2012-ci ilin 9 ayında 237.8 kilometr kollektor-derenajlar 668 min kub metr lildən təmizlənmişdir. 120 ədəd hidromexaniki qurğu, 6 istehsalat binası, 6 nasos stansiyası təmin edilmişdir.

Sonda bir şeyi də qeyd etmək lazımdır ki, 2010-cu ildə Kür və Araz çaylarının daşması nəticəsində baş vermiş təbii fəlakətin aradan qaldırılması üçün ölkə prezidenti əlavə tədbirlərdən ötrü 29 mart 2012-ci ildə sərəncam imzalamışdır. Bu sərəncama əsasən Fövqəladə Hallar Nazirliyi yerlərdə tədbirlər həyata keçirir.

Axırda icra nümayəndəsi əlavə etdi ki, rayonun ümumi-iqtisadi inkişafı həm də hər bir vətəndaşdan asılıdır.

Təhsilin inkişafı ümumi uğurun nəticəsidir

Saatlı rayonunun uğurlarına sevinən insanlardan biri də rayon təhsilində uzun müddət xüsusi çalışan Bəylər kənd ümumi orta məktəbinin direktoru Zakir Məhəmməd oğlu Əmişovdur. Təhsilin son nailiyyətlərini başçılıq etidiyi kollektivdə tətbiq edən Zakir müəllim 20 ildən çoxdur məhz bu yöndə öz əməyini əsirgəmir. Çalışır ki, hər bir saatlılı cəmiyyətin inkişafında öncül yerlərdə olsun:

- Millətin, dövlətin inkişafı bugünkü gənclərdən asılıdır. Ona görə də hamımız məhz bu istiqamətdə çox ciddi çalışmalıyıq. Saatlı rayon təhsil işçiləri son illərdə az uğur qazanmamışıdır. İstər buraxılış imtahanlarında, istərsə də ali məktəblərə qəbul imtahanlarında uğurlarımız son vaxtlar kifayət qədərdir. Yaxşı təhsil almaq üçün yaxşı şəraitin olması vacib şərtlərdən biridir. 2012-ci ilin 9 ayı ərzində Saatlı Təhsil Şöbəsi bir sıra uğurlu layihələrə imza atmışdır. Belə ki, təhsil müəssisələrinin tikintisi və əsaslı təmiri istiqamətində Arif Ağayev adına 80 şagird üçün Sarıcalar kənd ümumi orta məktəb binası, Mehman Ağayev adına 180 şagird üçün Saatlı şəhər 2 saylı ümumi orta məktəb binası, Əyyub Quliyev adına 120 şagird üçün Geniş kənd ümumi məktəb binası artıq istifadəyə verilmişdir. Tofiq İsmayılov adına 547 şagir üçün Mircəlalkənd tam orta məktəb binasının bərpa edilib gücləndirilməsi, Saatlı şəhərindəki 90 yerlik uşaq bağçası körpələr evinin əsaslı surətdə bərpa edilməsi sona çatdırılmışdır. Hazırda Arif Çoxayevin adını daşıyan 1176 şagirdə hesablanmış Fətəlikənd tam orta məktəb binasının bərpa edilməsi, M.Əzizbəyov adına 1050 şagird üçün nəzərdə tutulmuş Saatlı şəhər 2 saylı tam orta məktəbdə əsaslı təmir işləri aparılır.

Əliabad kəndində 180 şagirdə, Qıraqlı kəndində 220 şagirdə hesablanmış orta məktəb binalarının inşasına başlamışıq. Yaxın günlərdə isə Fətəlikənddəki uşaq bağçası və körpələr evində bərpa-gücləndirmə işlərinə başlayacağıq.

Prezidentimiz İlham Əliyevin açılışda iştirak etdiyi Şahmat Məktəbinin şagirdlərimizin ümumi intellektinin inkişafında böyük rolu olacaq. Çünki belə gözəl şəraitdə olan məktəbdə yaxşı nəticə əldə etməmək özü günahdır.

Bəylər kənd ümumi orta məktəbin direktoru sonda qeyd etdi ki, bu uğurların əldə edilməsində Saatlı rayon rəhbərliyinin, Təhsil Şöbəsinin əməyi xüsusidir.

Bu yazıda Saatlı rayonu haqqında bəzi məqamlara toxundum. Əminəm ki, gələcəkdə bu səpkili yazılar daha çox olacaq.

Səxavət MƏMMƏDLİ

Ədalət.-2012.-20 noyabr.-S.5.