AYRI DÜŞMÜŞƏM

ƏZİZ MUSA

Arzular, istəklər saralıb, solub,

Yolumdan, izimdən ayrı düşmüşəm.

Olanım, qalanım yadlara qalıb,

Canımdan, gözümdən ayrı düşmüşəm.

Keçdi dərd içində ömrümün çoxu,

Sancıldı sinəmə həsrətin oxu.

Nə gecəm gecədi, nə yuxum yuxu,

Nurlu gündüzümdən ayrı düşmüşəm.

Sevinc gətirərdi yurdun səhəri,

Yığardım gözümə gözəllikləri.

O bağlar, bağçalar gedəndən bəri,

Nəğməmdən, sözümdən ayrı düşmüşəm.

Qəlbim qan ağlayır deyib, gülmürəm,

Nə yerə, nə göyə sığa bilmirəm.

Fikrimi bir yerə yığa bilmirəm

Özüm də özümdən ayrı düşmüşəm.

Bu dünya ay Əziz, sən deyən deyil,

Həyat cəhənnəmə dönüb elə bil.

Könlümün atəşi sönüb elə bil,

Odumdan, közümdən ayrı düşmüşəm.

BU GÜN

İgidlər silaha sarılaq bu gün.

Yağı at oynadır, meydan sulayır.

Qeyrət qılıncını qaldıraq gəlin,

Düşmən yurdumuzu çapıb, talayır

Vətən göylərini buludlar alıb,

Hələ nigarandı şəhid ruhları.

Torpaq əsir qalıb, yurd əsir qalıb,

Yurd, yuva səsləyir ər oğulları.

Gəlin gecikməyək yurd harayına,

Döyüş alnımıza yazılıb bizim.

Bu torpaq Vətəndi, bu torpaq ana,

Ana harayıdı müqəddəs sözüm.

ŞƏHİDLƏR XİYABANI

Quşlar da bir anlıq qanad saxlayır,

Ötəndə Şəhidlər Xiyabanından.

Hər məzar dil açıb səssiz ağlayır,

Diksinir ruhların hay-harayından.

Burda zaman donub, tarix yaralı,

Yarımçıq arzular, istəklər yatır.

Ana balasından düşüb aralı,

Burda yaralanmış ürəklər yatır.

Burda neçə-neçə nakam cavanın,

Qisməti, taleyi daşa dönübdü.

Sinəsi dağlanan neçə ananın,

Günəşi sönübdü, bəxti sönübdü.

Tutun üzünüzü bu Xiyabana,

Hələ narahatdı şəhid ruhları,

Onlar gün ağlayıb Azərbaycana,

Cənnət qucağına alıb onları

Qoy namərd ayağı dəyməsin bura,

Bu yerdə and içək, verək baş-başa.

Vətən, yurd düşəndə hər dəfə dara,

Burdan döyüşlərə gedək birbaşa.

ÇÖKÜR

Deyə bilməmişəm sözümü hələ,

Ömür sarayımı ayrılıq sökür.

Dikmişəm yollara gözümü hələ,

Gözümə dağların dumanı çökür.

Hələ torpaq əsir, hələ yurd əsir,

Buludlar oynayır, qara yel əsir.

Bu həsrət, bu hicran səbrimi kəsir,

Gözümə dağların dumanı çökür.

Bu necə oyundu, bu necə söhbət,

Qınında paslanıb, çürüyür qeyrət.

Saçıma qar yağır, qəlbimə həsrət,

Gözümə dağların dumanı çökür.

Daha açılmayır qolum, qanadım,

Bağlanıb nədənsə tay basaratım.

Əriyir şam kimi ömrüm, həyatım,

Gözümə dağların dumanı çökür.

Başımı qatıbdı bu əsən külək,

Haqsız əməllərə göz yumur fələk.

Üstümə yeriyir arxalı köpək,

Gözümə dağların dumanı çökür.

Sinəsi çatlayır torpağın, daşın,

Çəkişi ağırdı bu gələn qışın.

Dərd-qəmi çoxalıb qohum, qardaşın,

Gözümə dağların dumanı çökür.

SEVİR

Hərənin bir yurdu var,

Kədər ürəyi sevir.

Hamı xoşbəxtlik sevir,

Arı pətəyi sevir.

Zirvələr qar xoşlayır,

Sevənlər nar xoşlayır,

Adamlar var xoşlayır,

Şeytan kələyi sevir.

Fələk çəkir örkəni,

Sünbül eyləyir dəni.

Dağlar dumanı, çəni,

Çoban tütəyi sevir.

İnsandı yurdun tacı,

Vüsal baldı, dərd acı.

İgid atı, qılıncı,

Gözəl ipəyi sevir.

Gözəldi gülün nazı,

Nazdı dindirən sazı

Çiçək baharı, yazı,

Bülbül çiçəyi sevir.

Yazma ömrə günahı,

Ümidlə aç sabahı.

İnsan uca Allahı,

Allah mələyi sevir.

KEÇİB

Fələklər qəsdimə durub,

Qəlbimə min yara vurub.

Dərd sinəmdə yuva qurub,

Bu kədər qarğışdan keçib.

Canım od-alovda bişib,

İşim qayaya ilişib,

Sözüm olub yerə düşüb,

Sözüm olub daşdan keçib.

Mələklər var sağ-solumda,

Bülbül ağlar gül solanda.

Oğullar var el yolunda,

Canından, başından keçib.

Dilimə yatmaz hər bir ad,

Çox sınayıb məni həyat.

Ürəyimi yandıran od,

O gözdən, o qaşdan keçib.

Ömrün gözəl çağı hanı,

Duman, çən tutub hər yanı.

Bəxtin xöşbəxtlik karvanı,

Yatmışam obaşdan keçib.

BAXMAZ

Gözlərim üzündən, gözündən öpər,

Gözlərim gözünün nazına baxmaz.

Dinib yox söyləsən, gözünü sıxsan,

Gözlərim bir daha üzünə baxmaz.

İstəsən məndən küs, ya da acıqlan,

Demirəm sən məndən uzaqda dolan.

Neyləsin həsrətdən saralıb, solan,

Ürəyim heç kimin sözünə baxmaz.

Həsrətdən ağlayır, sızlayır ürək,

Mənimlə düz gəlmir nədənsə fələk.

Gözlərim yaş tökər yaz buludu tək,

Dərd-qəmin çoxuna, azına baxmaz.

ÖYRƏTDİN

Gözlərim sənə öyrəşdi,

Məni yamanca kövrəltdin.

Heç bilmirəm bu nə işdi,

Mənə sevməyi öyrətdin.

Çıxdın yolumun üstünə,

Taleyimi dəyişdin sən.

Baxdın mənim gözlərimə,

Elə bildim bir günəşsən.

Sığmırdım mən yerə-göyə,

Deyirdim dünya mənimdi.

Düşdüm eşqin bəlasına,

Dünyadan küsmüşəm indi.

Naz-qəmzən üzüb canımı,

Sevdirmisən dərdi mənə.

Nənən ölsün naz yiyəsi,

Atdın məni duman-çənə.

Bilməz idim sevda nədi,

Ürəyimi talan etdin.

Mənə ağlamaq öyrətdin,

Mənə yalvarmaq öyrətdin.

SƏN ƏSGƏR GEDİRSƏN

Əsir torpaqların hayına tələs,

Gərəkdi borcunu qaytara hər kəs.

Ürəyi titrədir bu nalə, bu səs,