100 İLDİR YAŞAYIR EŞQİN, ƏMƏLİN

Görkəmli maarif xadimi, müdrik şəxsiyyət Surxay Qurbanovun əziz və unudulmaz xatirəsinə ithaf edirəm

Səni bəxş edəndə SEYİDLİ kəndi,

Bir evin ən nurlu çırağı yandı.

Elə bil səmadan bir ulduz endi,

Arzular gül açdı, ömür uzandı.

Atanın, ananın güldü gözləri,

Başları üstündə nurlandı səma.

Günəşin üzünə döndü üzləri,

Şirin arzuları qovuşdu kama!

Ayları, illəri qoyub arxada,

Qeyrətlə böyüyüb sən yaşa doldun.

Taleyin bağlandı şərəfli ada,-

Xalqına layiqli müəllim oldun.

İşıqlı zəkanla şam kimi yandın,

Qovdun həyatından dumanı, çəni;

Yaşadı xalqına sədaqət andın

Sağ qalan şagirdlər anırlar səni!

Vətənin torpağı darda qalanda,

Dözmədin... canını elədin fəda!

Əsla sarsılmadın ən çətin anda,-

Agır döyüşlərdə düşəndə oda!

Qamətin bənzərdi uca çinara,

Dağlardan almışdın şah vüqarını.

Düşsən də çətinə, getsən də hara,

AĞDAMA bağladın düz ilqarını!

Yurduna layiqli ad qoyub getdin,

Anam QARABAĞDIR,

nəslin, soyadın.

Sən elə yaşayıb, sən elə etdin,-

Adını ucaldır hər bir övladın!

Yaxşılıq etmişdin bəsdi deyincə,

Əzəldən beləydi sənin təməlin.

Barın tükənməzdir min il yeyincə,

100 ildir yaşayır eşqin, əməlin!

Əjdər Qiyaslı,

İqtisadçı alim, şair

Ədalət.-2012.-18 oktyabr.-S.6.