Zaqatala-həmişə təzə qala

(əvvəli ötən sayımızda)

Güc həmişə birlikdədi

Zaqatalada zəlzələdən ziyan çəkən rayon sakinləri üçün yeni evlərin tikintisi bir neçə şirkətə həvalə olunub. Onlardan biri də AVS Tikinti-Quraşdırma Şirkətidi. Sahə rəisi Mehman Təhməzov bizimlə söhbətində bildirdi ki, tikintinin aparılmasına 42 ədəd texnika cəlb olunub. Şirkət ərazidə beton zavodu da quraşdırıb. Sutkada 400 kub sement istehsal edən zavodda işlər iki növbədə həyata keçirilir.

Muxax Zaqatalanın ən böyük yaşayış məntəqələrindən biridi. Kənddə 8 minə yaxın əhali yaşayır. Bu il mayın 7-də baş verən təbii fəlakət Muxaxa da ciddi ziyan vurub. Bu gün AVS şirkəti kənddə zəlzələdən ziyan çəkən ailələr üçün 201 ev inşa edir. Şirkət rəsmiləri Zaqatala Rayon İcra Hakimiyyəti başçısının Muxax kəndi üzrə nümayəndəsi Abdulkərim Şabanovla, Muxax bələdiyyəsinin sədri Akif Abdullayevlə gündəlik toplantı keçirərək görülən işləri müzakirə edir, qarşıya çıxan problemləri birgə və operativ həll etməyə çalışırlar.

İcra nümayəndəsinin müavini Əli Mahmudov hesab edir ki, belə müzakirələr işin vaxtında və keyfiyyətlə görülməsinə imkan yaradır: "Atalar nahaq deməyiblər ki, güc birlikdədi. Muxaxda tikinti işlərini aparan AVS şirkətinin nümayəndələri ilə sıx əməkdaşlıq edirik. Zəlzələdən ziyan çəkən sakinlər üçün evlərin inşasında işlər keyfiyyətlə görülür. Şirkətin iş icraçıları, mühəndisləri və fəhlələri ürəklə çalışır, üzərlərinə düşən vəzifələri layiqincə yerinə yetirirlər. İnanıram ki, insanlar yeni evlərinə köçəndən sonra onlar üçün yaradılan bu şəraitdən razı qalacaqlar".

Həmsöhbətimin sözlərinə görə, yerli hakimiyyət orqanları zəlzələdən ziyan çəkən sakinlərin problemləri ilə yaxından maraqlanır, belə günlərdə onlara mənəvi dayaq durmağa çalışırlar: "Ölkə başçısı Zaqatalada olarkən rəhbər işçilərə bunu bir vəzifə olaraq tapşırdı. Zaqatala Rayon İcra Hakimiyyətinin başçısı Mübariz Əhmədzadənin, rayon fövqəladə hallar komissiyasının tapşırıqlarına uyğun olaraq yerlərdə bu məsələlərə ciddi önəm verilir".

Eviniz tikilsin!

Muxaxdakı inşaat işləri ilə yaxından tanış olmaq üçün kəndi gəzirik. Tikinti aparılan həyətlərdən birində bizi 84 yaşlı Sona Mahmudova adlı sakin qarşılayır: "Həyat yoldaşımla birgə çox çətin günlər görmüşük. Amma mayın 7-də baş verən zəlzələni yaddan çıxara bilmirik. Təbii fəlakət üzündən evimiz dağıldı. Elə bildik ki, hər şey bir anda məhv oldu. Əlimizi hər yerdən üzmüşdük. Sağ olsun prezidentimiz İlham Əliyev, bizə yeni evin tikilməsi üçün tapşırıq verdi. Həyat yoldaşım ağır xəstə yatırdı. Amma inşaat işləri başlayan gündən durub gəzir. Dövlətimizin bu qayğısı bizi həyata yenidən qaytardı. Rayon rəhbərliyi bizimlə tez-tez maraqlanır. Tikintidə çalışanlar bizə diqqət və qayğı ilə yanaşırlar. Onları öz doğmalarımdan ayıra bilmirəm. İnşallah, yaxın günlərdə 3 otaqlı evimiz hazır olacaq. Həmin gün hamınızı təzə evimizə dəvət edəcəm".

Məktəb də diqqətdən kənarda deyil

Zaqatalada qabaqcıl təhsil müəssisələrindən söhbət düşəndə A. Bubuşov adına 1 saylı Muxax kənd orta məktəbinin adı birincilər sırasında çəkilir. Ötən tədris ilində bu məktəbin məzunu olan 50 şagirddən 16-sı müxtəlif ali məktəblərə qəbul olunub. Bir neçə ay öncə baş verən təbii fəlakət məktəbin binasında da izlər buraxıb. Lakin AVS şirkəti əməkdaşlarının operativ və mütəşəkkil fəaliyyəti nəticəsində 480 şagirdin təhsil aldığı məktəbin binası qısa müddətdə təmir olunub. Məktəbin direktoru Ədalət Novruzova da inşaatçıların işindən razılığını bildirdi: "Tikinti şirkətinin bütün əməkdaşlarına təşəkkürümüzü bildiririk. İşləri yeni tədris ilinə kimi yekunlaşdırdılar. Zəlzələ baş verən gün və sonrakı vaxtlarda müşahidə olunan qorxu və həyəcan artıq arxada qalıb, hamı məktəbə əminliklə gəlib dərs prosesində yaxından iştirak edir. Müəllim və şagirdlərimizin sevincini sözlə ifadə etmək mümkün deyil. Biz də öz növbəmizdə çalışacağıq ki, göstərilən bu qayğıya işimizlə cavab verək".

Sabunçu. Bakıda yox, Zaqatalada

İndi yolumuz Sabunçu tərəfədi. Söhbət Bakının Sabunçu rayonundan yox, Zaqatala rayonundakı Sabunçu kəndindən gedir. Dağ kəndinin çətin keçilən yollarını iş icraçısı Şahvələd Aslanovun sürdüyü avtomobilin köməyi ilə arxada qoyuruq.

Şirkət Sabunçuda təbii fəlakətdən ziyan çəkən 7 ailə üçün yeni evin tikintisinə başlayıb. Bütün çətinliklərə baxmayaraq, burada işlər sürətlə davam edir. Yeni inşa olunan evlərdən biri Ramazan Usubovun ailəsinə məxsusdu. Ailənin başçısı ən çətin anlarda onlara dayaq duran insanlara minnətdarlığını çatdırmaq istəyir: "Zəlzələdən sonra evsiz-eşiksiz qalmışdıq. Nə yaxşı ki, insanlar çətin anlarda birləşməyi bacardılar. Ölkə prezidenti, rayon rəhbərliyi, tikinti şirkətinə başçılıq edənlər bizi darda qoymadılar".

İş icraçısı Ceyhun Hüseynov tikintinin keyfiyyətlə görülməsi üçün aparılan işlərə ciddi nəzarət edir. Onun sözlərinə görə, hava şəraiti imkan verərsə, Sabunçu sakinləri ilin sonuna kimi öz yeni evlərinə köçəcəklər.

Zəlzələnin törətdiyi fəsadları aradan qaldırmaq üçün şirkətin əməkdaşları hətta şənbə və bazar günləri də çalışırlar. Sürücülər Yaqub Məmmədov, Ramiz İsayev bizimlə söhbətdə bildirdilər ki, qarşıya qoyulan tapşırıqları vaxtında yerinə yetirmək üçün bütün qüvvələrini səfərbər ediblər.

Xatırladaq ki, Zaqatalada tikinti işlərinə iyun ayında start verən AVS şirkəti noyabrın əvvəlinədək 100 evi, dekabrda isə qalan 158 evi sakinlərin istifadəsinə verməyi planlaşdırır.

Mənziliniz mübarək!

Etibar CƏBRAYILOĞLU

Ədalət.-2012.-20 oktyabr.-S.5.