AQİL ABBAS FİLMİN NÜMAYİŞİNİ YARIDA KƏSMƏK İSTƏDİ

Bu da Ağdama, Şuşaya gedən yol. 19 ildi ayaq izinə həsrət qalan yol. Sonuncu səngər. Burdan o yana erməni işğalı altındadı.

Sonuncu səngər. "Dolu" filminin başlanğıcı və finalının çəkildiyi səngər.

Filmin sonunda uşağın dediyi kimi:

- Əmi, ora getmə, orda erməni var. Srağagün sən durduğun yerdə iki nəfər əsgərimizi vurdular.

Yenə həmin səngər, amma bu dəfə film çəkilmir, filmin yaradıcı heyəti həmin səngərin qənşərində üzü Qarabağa baxırlar. Bir him lazımdı üzü Şuşaya getmək üçün. İnşallah.

Ssenari müəllifi Aqil Abbas, quruluşçu rejissoru Elxan Cəfərov olan "Dolu" filminin rayonlarda təqdimatı davam edir. Bu dəfə Ağdamdayıq. Filmin qəhrəmanları getdilər Ağdama. Gün o gün olsun biz də gedək.

Yaradıcı heyət ənənəyə sadiq qalaraq ilk dəfə Quzanlıdakı Şəhidlər abidəsini ziyarət etdilər. Abidəyə tər çiçək dəstələri qoydular. Rayon icra hakimiyyətinin başçısı Nizami Sadıqov bu abidənin necə yaranması haqqında qonaqlara məlumat verir:

- Burda adları yazılanların hamısı ağdamlı deyil, amma kim Ağdamda şəhid olubsa, onların hamısı ağdamlıdı. Ona görə onların da adını burda əbədiləşdirmişik.

Ağdamda 7 minə yaxın insan şəhid olub ki, onun 1500-dən artığı başqa bölgələrdən könüllü olaraq gəlib Vətən torpağını qoruyanlardı. Bu rayondan 16 nəfər Milli Qəhrəman var.

Quzanlıda ilk dəfə olan ziyarətçilərdən biri burda gedən abadlıq və quruculuq işlərinə diqqət çəkərək qəsəbəni şəhər səviyyəsinə isə cavabında deyir: gətirdiyinə görə icra başçısına minnətdarlıq edir. Nizami müəllim "Biz camaatla birgə Ağdamın yeni planını hazırlamışıq. İnşallah, şəhərimizi işğaldan azad edib möhtəşəm memarlıq üslubunda yenidən quracağıq. Cənab prezident İlham Əliyev məni bu vəzifəyə təyin edəndə tapşırıb ki, Ağdam şəhərini necə tikmək planını hazırlayaq".

Sonra Nizami müəllim bildirir ki, film stadionda nümayiş etdiriləcək. Çünki hamı bu filmə baxmaq istəyir, kiminsə könlünə toxunmaq olmaz.

Bəlkə də Azərbaycanda ilk dəfə stadionda film göstəriləcək.

Filmin icraçı direktoru Nadir Mehdiyev etiraz edir ki, filmi stadionda göstərmək mümkün deyil. Nizami müəllim isə bildirir ki, mümkün olmayan bir şey yoxdu.

Onu da qeyd edək ki, film bir gün əvvəl Ağcabədidə nümayiş etdirilmişdi, orda da rayon icra hakimiyyətinin başçısı Şahin Məmmədov filmin Mədəniyyət Evində deyil, açıq havada göstərilməsini israr eləmişdi. Və qısa zamanda da Heydər Əliyev parkında filmin yüksək səviyyədə göstərilməsi üçün rayon icra hakimiyyəti əlindən gələni əsirgəməmişdi. Və həmin gün parkda 2 min nəfərdən artıq ağcabədili filmi izləyə bildi.

Axşam saat 7-dən bir az keçib. Yaradıcı heyətlə stadiona daxil oluruq. Və təəccübümüzü gizlədə bilmirik. İynə atsan yerə düşməz. 3 min tamaşaçı tutan stadionda yüzlərlə adam ayaq üstə dayanıb.

Nizami müəllim tədbiri açır, bütün ağdamlılar adından yaradıcı heyəti salamlayır və minnətdarlığını bildirir. Daha sonra filmin yaradıcı heyəti tamaşaçılara təqdim edilir.

Stadiondakı böyük monitorda filmin nümayişi başlanır.

Elxan Cəfərovu narahat edən bu olur ki, bir belə insan sakit halda filmi izləyə bilməyəcək. Stadion, açıq hava, müxtəlif də insanlar və bu da filmin daha effektli alınmasına maneçilik edəcək.

Amma gözlənilənlərin əksinə olur. Milçək uçsa səsi eşidiləcək bir sükut yaranır.

Və az keçməmiş stadiona təcili yardım maşınları daxil olur, bir az keçmiş yenə təcili yardım maşını... Təbii ki, bir çaşqınlıq yaranır.

Nizami müəllim Zülfü müəllimi çağırır ki, nə olub?

Məlum olur ki, tamaşaçılar arasında ürəyi gedənlər, huşunu itirənlər, özünü pis hiss eləyənlər var. Həkimlər onların bəzilərini xəstəxanaya daşıyır, bəzilərinə isə elə yerindəcə yardım göstərirlər.

Aqil Abbas filmin dayandırılmasını xahiş edir. Bəlkə də ilk dəfə Aqil Abbasın xahişi Ağdamda yerə düşür. Onun xahişi həm tamaşaçılar, həm də rayon rəhbərliyi tərəfindən etirazla qarşılanır. Film davam edir.

Kim idi ürəyi gedənlər, huşunu itirənlər, özlərini pis hiss edənlər? Demək olar ki, bunların 90 faizi qadınlar və qızlar idi. O qadınlar və qızlar ki, filmdə şəhid olmuş övladlarını, ərlərini görürdülər. O qızlar ki, atalarını, qardaşlarını, sevdikləri oğlanları görürdülər.

- Bax, o mənim oğlum idi...

- Vay dədəm, mənim qardaşımı vurdular...

- Bu Müəllim mənim atamıydı...

Filmdə Komandir səngəri keçib üzü Şuşaya doğru addımlayanda və bütün şəhid qardaşları onun arxasınca gedəndə və millət də onların ardınca üzü Şuşaya yürüyəndə bütün stadion ayağa qalxır. Əvvəl-əvvəl bir sükut çökür, sonra alqış səsləri. Alqış səsləri dayanmır. Film bitib, amma yenə heç kəs stadionu tərk eləmir.

HEÇ KƏS STADİONU TƏRK ELƏMİR...

SANKİ HAMI BİR ƏMR GÖZLƏYİR. KOMANDİRİN ARXASINCA ÜZÜ ŞUŞAYA GETMƏK ÜÇÜN!

Və hamı inanır ki, Möhtərəm Prezidentimiz, Ali Baş Komandanımız İlham Əliyev cənabları bu əmri verəcək.

VƏ "DOLU" FİLMİNİN ARDI ŞUŞADA ÇƏKİLƏCƏK!

Rüstəm HACIYEV

Ədalət.-2012.-25 oktyabr.-S.4.