BU VƏTƏNİN TORPAĞINA, SUYUNA...

(əvvəli ötən saylarımızda)

Rayon Məşğulluq Mərkəzinə 2012-ci ilin 9 ayında 431 nəfər vətəndaş müraciət etmiş və qeydiyyata alınmışdır. Qeydiyyatda olan vətəndaşlardan 312 nəfəri idarə və müəssisələrdə münasib işlə təmin edilmişdir ki, onlardan 169 nəfəri qadınlar olmuşdur.

Dövlət Sosial Müdafiə Fondunun Masallı rayon şöbəsi tərəfindən cari ilin 9 ayında proqnoz tapşırıqları büdcədən maliyyələşən təşkilatlar üzrə 3193,1 min manata qarşı 3068,0 min manat və ya 96,1%, qeyri-büdcə təşkilatları və fiziki şəxslər üzrə 800,4 min manata qarşı 697.4 min manat və ya 87.1% yerinə yetirilmişdir. Şöbədə hazırda 28 min 315 nəfər əmək pensiyaçısı uçotdadır. Hesabat dövrü ərzində ümumilikdə 522 nəfərə əmək pensiyası təyin olunmuşdur.

Dövlət Sosial Müdafiə Fondunun Masallı filialında görülən tədbirlərə baxmayaraq hələ də bir çox problemlər qalmaqdadır. Xüsusən də sosial sığorta haqlarının tam yığılması və ödəmədən yayınanlar haqqında qanuni ölçü götürülməsi üçün bütün tədbirlər həyata keçirilməlidir. Habelə debitor borcu olan bələdiyyələrlə müəyyən iş aparılsa da lazımi nəticə əldə edilməmişdir.

2012-ci ilin 9 ayı ərzində Masallı Rayon Əhalinin Sosial Müdafiəsi Mərkəzinə 3499 ailə Ünvanlı Dövlət Sosial Yardımı almaq üçün müraciət etmiş, onlardan 3442 ailəyə Ünvanlı Dövlət Sosial Yardım təyinatı aparılmış, 57 ailənin tələbindən qanuna müvafiq olaraq imtina edilmişdir. Yardım təyinatı aparılmış ailələrə aylıq 440 min 516 manat vəsait ödənilmişdir.

Cənab Prezident qeyd etmişdir ki, bu il kənd yollarına müasir Azərbaycan tarixində ən böyük vəsait qoyulmuşdur.Bu istiqamətdə Masallıda da xeyli işlər görülmüş və hazırda bu işlər davam etdirilir. Belə ki, ölkə əhəmiyyətli Ələt-Astara avtomobil yolunun tikintisi ilə əlaqədar rayonun Sərçuvar kəndi ərazisindən başlayaraq yolun Masallı rayonundan keçən hissəsinin çəkilməsi işləri aparılır. Həmçinin cənab Prezidentin sərəncamları ilə ayrılmış vəsaitlər hesabına Masallı rayonunda kəndlərarası yolların əsaslı təmiri və yenidən qurulması istiqamətində xeyli işlərin görülməsinə baxmayaraq hələ də bir çox kənd yollarının təmirinə ehtiyac vardır

Hazırkı vaxta rayon üzrə ümumi qaz abonentlərinin sayı 22 min 985-ə barəbərdir. Rayon ərazisində qazdan sayğacsız istifadə edən abonent yoxdur. Dövlət Proqramı əsasında rayon mərkəzi və 22 yaşayış məntəqəsinə bir pilləli sistem üzrə yeni qaz xəttinin çəkilməsi ilə əlaqədar 13 yaşayış məntəqəsində qaz xətlərinin çəkilişi yekunlaşdırılaraq Musaküçə kəndində 760, Səmidxan kəndində 81, Seybətin kəndində 395 və Gəyəçöl kəndində 636 abonentin qaz təchizatı bərpa edilmişdir. Qazlaşdırılması nəzərdə tutulmuş kəndlərdən Həsənli, Təkdam, Məmmədxanlı, Hacıtəpə, Xırmandalı, Ərəb və Köçəkli kəndlərinin kənddaxili qaz xətlərinin çəkilişi yekunlaşdırılaraq abonentlərin mənzillərinə 2085 ədəd sayğac quraşdırılmış və bu kəndlərə təbii qazın verilməsi üçün hazırlıq işləri görülür. Həmçinin rayonun Lürən və Pircana kəndlərində də qaz xətlərinin çəkilişi yekunlaşdırılmış və 100 evə sayğac quraşdırılmışdır. Hazırda Eminli, Qarğalıq kəndlərinə yeni qaz xəttinin çəkilişi, Təklə kəndində və Ərkivan qəsəbəsində köhnə qaz xətlərinin yenidən quraşdırılması işləri davam etdirilir. Lakin nəzərdə tutulan 12 kəndin qazlaşdırılması işlərinə hələ də başlanılmamışdır.

01 aprel 2012-ci il tarixə Masallı rayonu üzrə mövcud ATS-lərin montaj tutumu 29000, istifadə tutumu isə 25000 abonentə bərabərdir. Rayondakı bütün ATS-lər elektronlaşdırıldığından kəndlərin sürətli internet xətti ilə təmin edilməsi günün vacib tələbidir və bu istiqamətdə davamlı tədbirlər həyata keçirilməlidir.

Azərbaycan hökumətinin Dünya Bankı ilə imzaladığı kredit sazişinə əsasən Meliorasiya və Su Təsərrüfatı ASC tərəfindən Masallı şəhərinin içməli su təchizatının və kanalizasiya sisteminin yenidən qurulması işlərinə başlanılmışdır. Bununla da Masallı şəhər sakinlərini uzun illərdən bəri narahat edən bu böyük problem qısa vaxtdan sonra öz həllini tapacaqdır.

Bu gün Masallı rayon sakinlərini ən çox narahat edən məsələlərdən biri də rayonun əksər kəndlərində içməli su xəttinin və ya qaynaqlarının olmamasıdır. Bu məsələ ölkə rəhbərinin daim diqqət mərkəzindədir. Cənab Prezident öz nitqində də vurğulamışdır ki, növbəti müddətdə bütün rayon mərkəzləri, bütün şəhərlər içməli su ilə təmin ediləcəkdir. Bunu etmək üçün konkret tapşırıqlar verilib və məqsədlərə çatmaq üçün gələn il investisiya proqramında kifayət qədər böyük məbləğ nəzərdə tutulmuşdur.

Masallı rayonunda da mövcud olan içməli su probleminin həlli məqsədilə rayon rəhbərliyi tərəfindən məsələ qaldırılmış və qısa vaxtda bu istiqamətdə müsbət nəticələr əldə olunmuşdur. Belə ki, "Azərsu" ASC-i "Birləşmiş Su-kanal" MMC tərəfindən Muğan zonasında yerləşən 15 kəndin və Gəyəçöl-Qızılağac istiqamətində olan 13 kəndin içməli su təchizatının yaxşılaşdırılması məqsədilə yaxın vaxtlarda həmin istiqamətlərdə olan kəndlərə içməli su xəttinin çəkilməsinə başlanılacaqdır.

Ekologiya

2012-ci ilin 9 ayı ərzində Viləşçay Su Anbarı İstismar İdarəsi tərəfindən rayon ərazisindəki suvarma kanallarında 125 min kub metr həcmində 55 km uzunluğunda kanallarda lildən təmizləmə işləri aparılmışdır. Həmçinin rayon ərazisində olan çaylarda təmizləmə işləri görülmüş və dambaları möhkəmləndirilmişdir. Lakin Viləşçay Su Anbarı İstismar İdarəsinin mövcud imkanları onu deməyə əsas verir ki, bu idarə rəhbərliyi öz işinə yenidən baxmalı və rayonun sosial-iqtisati inkişafında daha fəal iştirak etməlidir.

Hesabat dövrü ərzində Masallı Meşə Mühafizəsi və Bərpası Müəssisəsi tərəfindən 37 ha sahədə meşə səpini, 18 ha sahədə meşə əkini işləri aparılmış, 29 ha sahə kollardan təmizlənmişdir. 10 ha sahədə ağaclarda olan ziyanverici həşəratlar təmizlənmişdir. Ziyanvericilərə qarşı 899 ha ərazi dərmanlanmışdır. Bununla bərabər bu sahədə də bəzi problemlər mövcuddur. Belə ki, meşələrin qanunsuz qırılması, meşə torpaqlarının zəbt olunması və çirkləndirilməsi hallarına qarşı lazımı səviyyədə mübarizə aparılmır.

Başçı məruzəsində qeyd etdi:

- Burada bir məsələni də vurğulamaq istəyirəm ki, ağac əkini kampaniyası üçün xüsusi hazırlıq işləri qısa müddətdə yekunlaşdırılmalı və artıq bu işlərə başlanılmalıdır. Hesab etməliyik ki, bu gün də "Ekologiya ili" davam edir və bu çərçivədə rayonda 200 min ağacın əkilməsini təmin etməliyik.

(ardı gələn sayımızda)

Məzahir ƏHMƏDOĞLU

Ədalət.-2012.-25 oktyabr.-S.7.