AZƏRBAYCANLI GƏNC FİRUDİN KRIMDA "İLİN ADAMI"DIR

Firudin Orucov ilk Azərbaycanlıdır ki, Ukrayna Respublikasının Krım vilayətində - iri bir regionda, çoxlu digər millətlərin nümayəndələrinin də sığındığı kurort bölgəsində bu fəxri ada layiq görülüb. Yox, bu gənc soydaşımız elə də yaşlı deyil, 1990-cı ilin 31 yanvarında Şəmkirin Təzəkənd adlı yaşayış məskənində anadan olub, vur-tut iyirmi iki yaşın içindədir, hələ bütün parlaq gələcəyi qabaqdadır. Krımda "İlin adamı" adını millətlərin bilik-bacarıq, intellekt, iş təcrübəsi yarışmasında, Yalta şəhərində gərgin fəaliyyəti, ağlı sayəsində qazanıb.

Firudin kimi hərtərəfli gənclərin həyatı təkcə xarici ölkələrdə yaşayan cavan həmvətənlərimizə deyil, eyni zamanda Azərbaycanda qurub-yaradan yaşıdlarına da bir nümunə və örnəkdir. Ona görə, tərcümeyi-halının geniş verilməsinə, fəaliyyətinin işıqlandırılmasına ehtiyac var. Məşhur yunan müdriklərindən biri deyir ki, insan həmişə həyatın bütün qovğalarına hazır olmalıdır. Firudinin atası Əli müəllim vətəndə çox sınaqlara düşdü. Lazım gələndə çətin illərdə silah götürüb torpağının müdafiəsinə qalxanlara da qoşuldu, dinc həyatda da zəhmətin dadını gördü. Artıq hərc-mərclik, ölkəni bürüyən xaos onu təngə gətirmək üzrəydi. Heydər Əliyevin hakimiyyətə gəlişi, pozuq silahlı qüvvələrin ram edilməsi isə dinc quruculuğa başlamaq demək idi. Əli Orucov o günlərdən söhbət düşərkən dedi:

- Heç Vətən dəyişmək fikrində deyildim. Çünki mən doğma Şəmkirimə, ata-baba yurduma, böyük Azərbaycanıma bütün varlığım qədər bağlıyam. Daimi gedib-gəlir, telefon əlaqələri saxlayır, qohum-əqrəbayla, tanış-bilişlə hal-əhval tutur, ölkəmizin ictimai-siyasi vəziyyəti ilə ciddi maraqlanıram. Qardaşım Zahid Simferopolda Dövlət qulluğunda çalışırdı, o, bir gün "gəl Krıma, uşaqları da gətir, havanızı dəyişib gedərsiz" çağırışı ilə bizi ailəvi evinə qonaq dəvət elədi. İnanın, bu yerlər mənə o qədər doğma gəldi, uzun müddət unuda bilmədim. 1994-cü ildə köç-külfətimi götürüb qədim Krım türklərinin paytaxtına - Simferopola köçdüm. Onda Firudinin dörd yaşı vardı. Mən ali hüquq təhsili aldım, münasib işlə təmin olundum, Azərbaycan diaspor təşkilatının fəallarına qoşuldum. Özüm də, oğlum da Azərbaycan Konqresinin Krımdakı təşkilatının ən fəallarındanıq. Ancaq mən daha çox biznes fəaliyyəti ilə məşğulam, Firudinin ictimai-siyasi fəallığına isə indi hamı həsəd aparır.

Lap erkən yaşından yazıb-oxumağı öyrənən balaca Firudin ailənin sevimlisiydi. Olduqca diribaş, görüb-götürən təsiri bağışlayan uşaq zəkası ilə hamını heyran qoyurdu. Orta məktəb illərində - 4 və 38 saylı məktəblərdə təhsil alarkən eyni vaxtda bir neçə dil mənimsədi: ingilis, rus, ukrayn, türk, Azərbaycan dillərini mükəmməl öyrənməklə dərs əlaçısı kimi də tanındı, müxtəlif olimpiadaların qalibi adını qazandı, erkən attestat alıb Tavriya Milli Universitetinin hüquq fakültəsinin dekanı, məşhur alim-pedaqoq Haluk Kaba Əlioğunun şəxsi tərcüməçisi funksiyasını yerinə yetirməyə başladı. Türkiyədə təcrübə mübadiləsində özünü yaxşı tərəfdən göstərdi.

Universiteti mükəmməl surətdə başa vuran gənc həmyerlimiz işsiz qalmadı. Müxtəlif təşkilat və şirkətlər ona "elçi" düşdü. Onların sırasında dövlətyönlü müəssisələr də var idi, özəltipli müəssisə və təşkilatlar da. Lakin ailə Firudini hələlik kənara buraxmaq istəmədi və o, Simferopolda yerli bələdiyyə orqanlarında çalışdı, daha doğrusu, təşkilatın qanunsuz tikililər üzrə hüquq müdafiəçisi oldu, cəmiyyətdə tanındı. Və bir gün hiss elədi ki, bu vəzifə onun bütün imkanlarının tam açılması üçün dardı...

Firudinə xeyli yeni təkliflər gəldi, seçim qarşısında qaldı və birdən-birə Yalta variantına üstünlük verdi. Bu haqda qənaətləri belədir:

- Yaltada - Qara dənzin lap ləpədöyənində "Qaranquş yuvası" adlı qəsr-malikanə var. Sahildə sərt qayalıqların üstündədir. Təxminən yüz il öncə, 1912-ci ildə orda tarixi mədəniyyət muzeyi tikilib. İndiyəcən fəaliyyət göstərir. 1927-ci ildə ehtiyatsızlıq ucundan uçulub-dağılıb. 1967-ci ildə isə təzədən bərpa olunub. Tamamilə yeni üslubda inşa olunan bu təbii muzey "Krımın vizit kartı" adlanır, turistlərin ən çox bəyəndikləri, seyr etdikləri mini-ərazidir. İndi mən muzeydə direktor müaviniyəm.

Yalta qayalıqlar arasında salınan möhtəşəm tarixi şəhərdir. Aşağı hissəsini Qara dənizin göy suları müşayiət edir, yuxarıdan isə vəhşi təbiət bütün yaşıl görkəmi ilə insanlara meydan açıb. Meyvə və meşə ağacları hündürmərtəbəli binalarla boyaboydur, qranit daşların arasından fışqıran dağ çeşmələr baxanları valeh etməyə bilmir. Yalta şəhərinin hər tini, küçəsi, döngəsi gözəldir, həmyerlimizin çalışdığı "Qaranquş yuvası" isə həqiqətən möcüzəvi yerdir. Muzeyə yaxın və uzaq ölkələrdən hər gün 5-6, bəzən 7-8 min adam axışıb gəlir.

Muzeyin kiçik kollektivi var. Bələdçilər göz açmağa imkan tapmırlar. Çünki giriş pulludur: yaşlılar içəri keçmək üçün 30 Ukrayna qrivini, uşaqlar isə 10 qrivin ödəməlidirlər. "Qaranquş yuvası"nda tez-tez mədəniyyət istiqamətli tədbirlər həyata keçirilir, sərgilər təşkil olunur. Bu yaxınlarda hamının marağına səbəb olan rəssamlıq sərgisində dünya şöhrətli qrafika və mənzərə ustalarının - Şişkinin, Levitanın, Paleanovun, Alesovun, Savçasovun, Maqdesinanın əsərlərinin nümayişi hər kəsin xoşuna gəlib. Bunu rəy və təkliflər kitabında yazılan səmimi ürək sözləri də təsdiq edir. Bu kimi işlərin baş ifaçısı və təşkilatçısı isə soydaşımız Firudindir.

Bəs Firudin Orucov Krımda ötən il "İlin adamı" adını necə qazanıb? Krım Azərbaycanlıları Konqresinin sədri Rəhim Hümbətovun söylədiklərindən: "Firudin həmişə bizim başımızı ucaldıb. Tələbəlik dövründə də, indi də. O, böyük gələcəyə və potensiala malikdir. Sadəcə onun arxasında durmaq, ona dəstək olmaq gərəkdir ki, bütün potensialı üzə çıxsın. Bizim bölgədə bədnam millətin nümayəndələri də az deyil, biri Firudinin məntiqinin qabağında danışa bilmir. Krımda seçilmək asan gəlməsin. Firudin zehni, ağlı, fərasəti sayəsində qalib gəlib. Ötən ilin yayında Yalta şəhər rəhbərliyi "Sağlam həyat tərzi" devizi altında tədbir keçirmək üçün xüsusi layihə irəli sürüb. Firudingildən başqa mərasimə "Redbulk" şirkəti də qatılıb. Layihəni yekdilliklə Firudin və onun komandası udub. Onu da deyək ki, "Sağlam həyat tərzi" çərçivəsində suyatullanma yarışında neçə-neçə xarici ölkənin nümayəndəsi iştirak edib. Rusiya qalib olub. Yarışı 27 mindən çox tamaşaçı izləyib, 150 teleşirkət verilən idman mərasimini canlı yayımlayıb. Tamaşaçıların sayı o qədər çox olub ki, hətta yarışı gəmilərdən və qayalıqlardan da seyr ediblər. Bax, bu layihəni uğurla həyata keçirdiyinə görə Firudin Əli oğlu mükafatlandırılıb. Krımda ilk Azərbaycanlı kimi tarixə düşüb, "İlin adamı" nominasiyasında hamını geridə qoyub, birincilik qazanıb.

Yeri gəlmişkən, Firudinin bacısı Nərmin Tibb Universitetinin tələbəsidir, qardaşının bütün uğurlarına ürəkdən sevinir. Ataları Əli Orucov Krım Azərbaycanlıları Konqresi sədrinin müavinidir. Özünün "Süfrəm" adlandırdığı restoran-əyləncə mərkəzində həmişə qonaq-qaraya halal süfrə açır, türkçülüyü, turançılığı, Azərbaycançılığı təbliğ edir.

Ədalət.-2012.-1 sentyabr.-S.6.