GƏLƏCƏYƏ UZANAN YOL...

(əvvəli ötən sayımızda)

SEVİNDİRİCİ ANLAR

İnsanın əziyyəti və zəhməti müsbət nəticə verəndə o sanki bütün arzusuna qovuşmuş olur. Əgər bağban ağaclara qulluq edirsə və onun meyvə gətirməyini səbirsizliklə gözləyirsə, günlərin birində də həmin ağaclar bar verəndə bağbanın sevincinin həddi-hüdudu olmur. Bax müəllimlər də belədir. Onlar dərs dedikləri məzunların ali və orta ixtisa məktəblərinə qəbul olunduqlarını eşidəndə ürəkləri köksünə sığmır. Başqa sözlə demiş olsaq, sevincdən ürəkləri dağ boyda olur.

Rayon təhsil şöbəsinin müdiri Almaz xanım deyir ki, təhsil müəssisəsinin əsas vəzifəsi cəmiyyətə və vətənə tərbiyəli, əxlaqlı insanlar verməkdir. Bununla yanaşı, əsas göstərici kimi, məzunların ali məktəbə qəbul olunması böyük önəm kəsb edir. Çünki ən azından ona görə ki, müəllimin 11 il çəkdiyi əziyyət, şagird ali məktəbə qəbul olanda öz bəhrəsini verir. 11 il müəllim və pedaqoq o uşaqların üstündə yarpaq kimi əsir və onların nazı ilə oynayır. Hətta ipə-sapa yatmayan şagirdləri belə pedaqoq düz yola qaytaranda, onu intizama dəvət edəndə, elə bir dünyanı həmin müəllimə verirsən. Sonradan da yolunu azan şağird hiss edir ki, müəllim ancaq onun gələcəyi üçün lazımi addımları atırmış.

Ötən il bizim məktəbləri bitirən 202 nəfər məzun müxtəlif ali məktəbə qəbul olub. Bunların arasında 500-600 arasında bal toplayan 17 məzun, 600-dən çox bal toplayan 9 məzunumuz olub. Bu il də tam orta məktəbləri və eləcə də orta məktəbləri bitirən 206 məzunumuz müxtəlif ali məktəbə, 112 şagirdimiz isə orta ixtisas təhsil ocaqlarına qəbul olublar.

Bir faktı da qeyd edim ki, ali məktəbə yüksək balla qəbul olan məzunlar rayon icra hakimiyyəti və təhsil şöbəsi tərəfindən mükafatlandırılıb.

Savadlı, istedadlı və bacarıqlı şagird hər zaman ona göstərilən qayğını və diqqəti hiss eləməlidir. Şagird hiss eləməlidir ki, onun arxasında bir qüvvə var və o qüvvə həmişə ona yardımçı olacaq.

İCRA BAŞÇISININ TƏHSİLƏ DİQQƏTİ

Rayon təhsil şöbəsinin müdiri Almaz Həşimova bizə bir sevindirici faktı da dedi ki, təhsilə həmişə Füzulidə böyük diqqət yetirilib. Bu gün isə rayon icra hakimiyyətinin başçısı, hörmətli Alı Alıyev təhsilin inkişafına və sürətli tərəqqisinə böyük önəm verir. Bir qayda olaraq, istedadlı və savadlı şagirdlərə Alı müəllim tərəfindən böyük dəstək gəlir. O, dəfələrlə bizimlə söhbətində bildirib ki, təhsil sahəsində hansı problem yaranırsa, ona çatdıraq və o da lazımi köməkliyi bizə göstərsin. Biz də hər hansı həll edə bilmədiyimiz problem olanda Alı müəllimə deyirik, o da qısa zaman kəsiyində məsələlərin müsbət həllinə böyük köməklik göstərir.

Əlbəttə, təhsil dövlətin əsas strateji xəttindən biridir. O ölkədə ki, təhsilə önəm verilir və diqqət mərkəzində saxlanılır, həmin ölkədə təhsilin yüksək inkişafı hiss olunur. Bizim də məmləkətimizdə ölkə prezidenti İlham Əliyev təhsilin dünya standartlarına cavab verməsi üçün böyük işlər görür. Bircə qalır bu məsələləri yerlərdə icra etmək. O da maraqlıdır ki, bu gün Füzulidə işğaldan azad olunan yaşayış sahələrində məktəblərin yenidən tikilməsinə və əsaslı təmirinə böyük önəm verilir. Bu önəm də onunla bağlıdır ki, cəbhə bölgəsi olan Füzulidə yeni məktəblər tikilsin və şagirdlərin, müəllimlərin istifadəsinə verilsin.

MƏKTƏBLƏR TƏMİR EDİLİR VƏ YENİLƏRİ TİKİLİR

Hamı yaxşı bilir ki, Füzuli rayonu 1993-cü ilin avqustun 23-də ermənilər tərəfindən işğal edilib. Onlar işğal etdikləri yaşayış sahələrindəki binaları, məktəbləri, xəstəxanaları yandırıb, yerlə-yeksan eləyiblər. Hətta ermənilər o qədər azğınlaşıblar ki, onlar Horadiz kimi böyük bir şəhəri od vurub yandırmışdılar. Bütün bunlar ermənilərin necə bir qaniçən millət olduğunu bir daha sübut edir.

Böyük öndər Heydər Əliyevin apardığı siyasət nəticəsində 1994-cü ilin yanvarın əvvəllərində milli ordumuz Füzulinin Horadiz şəhərini və 22 yaşayış məntəqəsini erməni işğalından azad elədi. Erməni işğalı zamanı yandırılmış kəndlər, binalar, məktəblər və xəstəxanalar yenidən tikilərək bərpa edildi. 1997-2011-ci illər ərzində rayonda çoxlu sayda məktəblər bərpa edildi və yenidən tikildi. Horadiz şəhərində, Əhmədbəyli, Mahmudlu, Aşağı Kürdmahmudlu, Əhmədalılar, Babi, Mollaməhərrəmli, Şükürbəyli, Kərimbəyli, Alxanlı, Yuxarı Kürdmahmudlu, Qarabağ, Araz Dilağarda, Böyük Bəhmənli, Bala Bəhmənlig kəndlərində yanmış məktəblər yenidən bərpa edildi. Bununla yanaşı, Qayıdış, Gecəgözlü, Zobucuq və digər yaşayış sahələrində yeni məktəblər tikilərək istifadəyə verilib. Yeni tədris ilində də rayonda bir neçə yeni tikilmiş məktəbin açılışı olacaq. Onlardan biri də Horadiz şəhərindəki müasir tələblərə cavab verən tam orta məktəbdir. Həmin məktəbin açılışı sentyabrın 17-də keçiriləcək.

"MÜƏLLİMLƏR HƏR CÜR QAYĞIYA LAYİQDİR"

Bu sözləri bizimlə söhbətində rayon təhsil şöbəsinin müdiri Almaz Həşimova dedi. O dedi ki, müəllim peşəsi qədər çətin və məsuliyyətli iş çox azdır. Çünki bu peşənin sahibi ilk növbədə savadlı, bacarıqlı və səbirli olmalıdır. İndiki uşaqlar heç də 40 il bundan əvvəlin yeniyetmələri deyillər. Onlarla dil tapmaq, onlarla söhbət eləmək o qədər də asan deyil. Buna görə də pedaqoqdan, müəllimdən çox böyük bacarıq və təcrübə tələb olunur. Bacarıq və təcrübəsi olan müəllimlər bu işin öhdəsindən vaxtında gələ bilirlər. Ancaq elə ki, hansısa müəllim bir balaca zəiflik göstərdi, yumşaqlıq elədi, bax onda onun işi çətinə düşür. Biz də çətinə düşən müəllimlərə vaxtında köməklik göstərir və daha təcrübəli pedaqoqları onlara yardım etməyi tövsiyə edirik.

Almaz xanım onu da dedi ki, bu gün Füzulidə 80 ümumtəhsil məktəb fəaliyyət göstərir. Onlardan 74-ü orta məktəb, 5-i əsas məktəb, 1-i isə ibtidai məktəbdir. Rayonumuzun ərazisində isə 44 məktəb fəaliyyət göstərir. Ümumiyyətlə, rayon məktəblərində 12094 şagird təhsil alır. Onların təlim-tərbiyəsi ilə isə 2236 müəllim məşgul olur. Bu müəllimlərdən 1549 nəfəri ali təhsillidir.

Biz bir daha hiss elədik ki, Füzuli təhsil sistemi öz keçmiş ənənələrinə və uğurlarına söykənərək gələcəyə doğru inamlı addımlarla irəliləyir. Çünki Füzuli təhsil sisteminin sükanı çox savadlı, təcrübəli və ziyalı bir xanımın əlindədir. Bu sükan həmişə zamanından və məkanından asılı olmayaraq, Füzulidə etibarlı əllərdə olub. Etibarlı əllər isə Füzuli təhsilini addım-addım işıqlı sabaha doğru aparır...

Faiq QİSMƏTOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.- 2012.- 8 sentyabr.- S.4.