QAX ÖZÜNÜN ƏN YÜKSƏK İNKİŞAF MƏRHƏLƏSİNƏ QƏDƏM QOYMUŞDUR

(əvvəli ötən sayımızda)

Ötən tədris ilində Azərbaycan Gənclər İttifaqının icra etdiyi, Norveç Təbiəti Mühafizə Cəmiyyətinin "Enerji və resuslardan istifadə üzrə beynəlxalq məktəbli layihəsi olimpiadası" çərçivəsində keçirilən "Enerji və ətraf mühit" müsabiqəsinin milli turunda şəhər 4 N-li tam orta məktəbin şagirdləri - Pərvanə və Ayşən Hacızadələr I, şəhər 2 N-li tam orta məktəb-liseyin şagirdləri - Emin Muxtarov, Minayə Əhmədzadə II yeri tutmuşlar. Bu müsabiqənin "Bərpa olunan enerji mənbələrinin tətbiqi" nominasiyası üzrə yarışmasında şəhər 2 N-li tam orta məktəb-liseyin şagirdləri - Səmra Şabanova və Yusif Yusifli qalib olmuşdur. Ümumiyyətlə, respublika ümumtəhsil məktəblərinin şagird və müəllimləri arasında keçirilən 15-dək müsabiqə və yarışmalarda rayonun məktəbliləri və müəllimləri fəal iştirak edərək yüksək bilik və bacarıqlarını nümayiş etdirmişlər.

Yola saldığımız tədris ilində rayonun tam orta məktəblərinin ali məktəblərə qəbul imtahanlarında iştirak etmiş 297 nəfər məzunundan 166 nəfəri tələbə adını qazanmışdır. TQDK-nın abituriyentlərin orta bal göstəriciləri üzrə məlumatı hələlik açıqlanmasa da nəticələr deməyə əsas verir ki, bu mövsümdə də qaxlı məzunlar respublikanın rayonları arasında ön yerlərdə qərarlaşacaqdır. Məlumat üçün bildirək ki, əvvəlki qəbul mövsümündə Qaxlı məzunlar topladıqları orta bal göstəricilərinə görə respublikanın rayonları arasında birinci yerdə idi.

Bəli, bu gün Qax təhsili uzun illər əldə etdiyi uğurları davam etdirməklə özünün inkişaf mərhələsini yaşayır. Bütün bu uğurların əsasında təhsilin inkişafı üçün respublikamızın hər yerində olduğu kimi, Qaxda da yaradılmış əlverişli mühit, təhsilə böyük ictimai maraq dayanır. Rayon təhsili rəhbərlik və ictimaiyyət tərəfindən yüksək diqqət və qayğı ilə əhatə olunmuşdur. Son dövrlər rayon icra hakimiyyətinin başçısı müəllim və şagird kollektivləri ilə mütəmadi olaraq görüşür, onların problem və qayğılarını öyrənərək aradan qaldırılması üçün müvafiq tapşırıqlar verir. Rayon rəhbərliyinin təlimdə uğurlar qazanmış müəllim və şagirdlərlə keçirdiyi görüşlər və bu görüşlərdə onların mükafatlandırılması da rayonda təhsilin inkişafına xidmət edən amillərdəndir.

KƏND TƏSƏRRÜFATINDA MƏHSULDARLIĞIN İNTENSİV YOLLA ARTIRILMASI TƏMİN EDİLİR

Kənd təsərrüfatı məhsulları istehsalının artırılması, xüsusilə məhsuldarlığın intensiv yolla artırılması rayon rəhbərliyinin diqqət mərkəzindədir. Dövlətimizin diqqət və qayğısı, göstərdiyi maliyyə dəstəyi, RİH-in və əlaqədar qurumlarının həyata keçirdikləri maarifləndirmə tədbirləri nəticəsində yaranan əlverişli şərait, bitkiçilikdə aqrotexniki qaydaların tətbiqi, heyvandarlıqda mal-qaranın cins tərkibinin yaxşılaşdırılması, yüksək zoobaytar xidməti sayəsində müvafiq sahələrdə məhsuldarlıq xeyli artmışdır. Taxılçılıqda keyfiyytəli şum və səpin, yüksək reproduksiyalı toxum, üzvü və mineral gübrələrdən yerli-yerində istifadə edilməsi və vaxtlı-vaxtında aqrotexniki tədbirlərin görülməsi nəticəsində hər hektar sahədən götürülən məhsulun həcmi əvvəlki illə müqayisədə 3-5 sentner artmışdır. Son illər rayona dövlətimiz tərəfindən 50 faiz güzəştli qiymətlə, dəyəri 3 il müddətinə ödənilməklə xeyli cins düyə gətirilərək lizinq yolu ilə fermerlərə satılmışdır. İmkanlı fermerlər tərəfindən də rayona yüksək məhsuldar cinslərdən olan mal-qaranın gətirilməsi təmin edilir. Mal-qara arasında süni mayalandırma işinə də diqqət xeyli artmışdır. Belə ki, son dövrlər 3072 baş düyə süni mayalandırılmış, onlardan hələlik 1140 baş yüksək məhsuldarlığa malik cinsdən olan buzovlar alınmışdır. Həyata keçirilən tədbirlər nəticəsində cari ilin 6 ayı ərzində ötən ilin müvafiq dövrü ilə müqayisədə rayonda ət istehaslı 40.6, süd istehsalı 551.3 ton artmışdır. Yun, yumurta istehsalı da xeyli artmışdır. Rayonda yeni inşa olunmuş, bu yaxınlarda istifadəyə veriləcək süd məhsulları emalı müəssisəsi bu bölgədə heyvandarlığın daha da inkişafına xidmət edəcəkdir. Son dövrlər rayonda arıçılığa da meyl xeyli artmış, arı pətəklərinin sayı 7 minə çatmışdır. Bu il yüksək məhsul götürən rayonun arıçıları "Bal bayramı" keçirməyə hazırlaşırlar.

Rayonda meyvə, tərəvəz məhsulları istehsalının artırılması üçün də müvafiq təşkilat, təbliğat tədbirləri görülməkdədir.

VƏTƏNDAŞLARI NARAHAT EDƏN PROBLEMLƏR HƏLLİNİ TAPIR

Azərbaycan Respublikası Prezidenti Admnistrasiyasının tövsiyəsi əsasında həyata keçirilən səyyar qəbullar - RİH başçısının kəndlərdə sakinlərlə görüşləri yerlərdə adamları narahat edən sosial problemlərin öyrənilərək həll olunmasına xidmət edir. Qaxda son illər ənənə şəklini almış bu metoddan olduqca səmərəli istifadə edilir. Cari ilin ötən dövründə Rayon İcra Hakimiyyətinin başçısı Musa Şəkiliyev tərəfindən 29 kənddə belə görüş keçirmişdir. Bu görüşlərdə başçı ilə bərabər rayonun əlaqədar idarə, müəssisə, təşkilat rəhbərləri də iştirak etmişdir. 2600 nəfərdən çox yerli sakinlərin qatıldığı bu görüşlərdə 150 nəfər çıxış edərək adamları narahat edən problem və çətinliklərdən danışmış, 45 məsələ ilə bağlı təklif və rəylərini vermiş, şikayətlərini söyləmişlər. Bir qayda olaraq görüşlərdə irəli sürülən məsələlərin mahiyyəti, problemlərin həlli yolları tədbirdə iştirak edən müvafiq idarə, müəssisə rəhbərlərinin, kəndin ziyalılarının, ağsaqqalların iştirak ilə elə oradaca araşdırılaraq obyektiv qərar qəbul olunur. İrəli sürülən bir sıra məsələlər elə görüş ərəfəsində həllini tapır, müəyyən vaxt tələb edən məsələlərin həlli üçün isə konkret, reallığa söykənən tapşırıqlar, vaxt verilərək icrası RİH tərəfindən nəzarətə götürülür. Görüşlərdə bir çox şəxsi məsələlərlə bərabər kəndlərin xeyli sayda sosial problemlər - yolların təmiri, içməli su ilə təminat, elektrik xətlərinin təmiri və s. problemlər məhz sakinlərin müraciətləri əsasında həllini tapmışdır.

Yerlərdə keçirilən görüşlərin imkanlarından istifadə edən RİH başçısı adamlarla kəndin sosial-iqtisadi durumu, abadlığı ətrafında səmimi söhbətlər edir, iştirakçılara dövlətimizin aqrar siyasətini çatdırır, tövsiyələrini verir. Son dövrlər rayonun hüquq-mühafizə orqanlarında və digər idarə və müəssisələrində də vətəndaşların müraciətlərinə, ərizə və şikayətlərinə, təkliflərinə həssaslıqla yanaşılır. Son bir ildə rayonun idarə, müəssisə və təşkilatlarında vətəndaşların qəbulu, ərizə və şikayətlərinə baxılması vəziyyəti RİH başçısı yanında şuranın 2 iclasında müzakirə olunmuş, bu sahədə işin daha da yaxşılaşdırılması üçün konkret qərarlar qəbul edilmiş, tapşırıq və tövsiyələr verilmişdir.

Bu ilin may ayında regionda, o cümlədən Qaxın Güllük kəndi və bir sıra ətraf kəndlərinin ərazisində baş vermiş güclü zəlzələnin ağır nəticələri ilə tanış olmaq və zərərçəkmiş insanların dərdinə şərik olmaq üçün hadisə yerinə gələn hörmətli Prezidentimiz İlham Əliyevin zəlzələnin nəticələrinin aradan qaldırılması ilə bağlı verdiyi tapşırıqlar, sakinlərlə səmimi söhbəti bu dəhşətli hadisənin adamlarda yaratdığı vahiməni yox etməklə onların dövlətimizə, onun Prezidentinə inamını bir daha artırmışdır. Nəhayət bu günlərdə ölkə başçımızın zəlzələ bölgəsinə təkrar gələrək təbii fəlakətin nəticələrinin aradan qaldırılması üçün aparılan tikinti işləri ilə yerində tanış olması, adamlarla görüşü, qısa müddətdə görülən işlərin həcmi dövlətimizin sosialyönümlü siyasətindən, Prezidentimizin daim xalqımız yanında olmasından xəbər verir. Bu gün ölkə başçısının diqqət və qayğısından ruhlanan rayon sakinləri bölgənin sosial-iqtisadi inkişafı üçün daha əzmlə çalışır, qurub yaradırlar.

Novruz ŞABANOV

Ədalət.- 2012.- 14-15 sentyabr.- S.3.