"Dolu" Şabranda

"Dolu"nun yaradıcı heyəti Şabranda Şəhidlər Xiyabanını ziyarət etdi

Şəhərin icra başçısı Novruz Novruzov: "Bu film bizi qələbəyə səsləyir və aparır"

Aqil Abbas: "Biz yüz faiz Qarabağı işğaldan azad edəcəyik. Çünki içimizdə torpağımıza, vətənimizə, dövlətimizə, Ali Baş Komandanımıza böyük sevgi var. Bu sevgi bizi qələbələrdən qələbələrə aparacaq".

"Dolu" filminin bölgələrdə nümayişi davam edir. Aqil Abbasın eyniadlı romanı əsasında ssenarisini yazdığı, rejissoru Elxan Cəfərov olan "Dolu" sentyabrın 12-də şabranlıların qonağı olub. Yaradıcı heyət müharibə veteranları, qazilər, ağsaqqallarla birgə şəhərin Şəhidlər Xiyabanını ziyarət ediblər.

Qarabağ savaşında 106 şəhid verən, 62 qazisi və iki milli qəhrəmanı olan Şabranda təşkil olunan mərasimdə müharibədə canlarını verən bütün igidlərimizin ruhlarına dualar oxunub. Bir qarış torpağımızın belə, düşmən tapdağında qalmayacağı şəhidlərin ruhu qarşısında bir daha əminliklə vurğulanıb. Mərasim iştirakçıları qeyd ediblər ki, cənab Ali Baş Komandan İlham Əliyev müharibə əmri verən kimi, yenidən silaha sarılıb düşmənlə savaşa girməyə hazırdılar. Onlar prezidentin bu yaxınlrda bir daha səsləndirdiyi "Siz Şuşaya, Xankəndinə, işğalda olan torpaqlara mütləq qayıdacaqsınız" bəyanatından ruhlandıqlarını bildiriblər.

Ziyarətin ardından Şabran mədəniyyət evində "Dolu" filminin əqdimatı keçirilib. Filmin ssenari müəllifi Aqil Abbas, prodüsseri Nadir Əliyev və rejissoru Elxan Cəfərov bu ekran əsərinin uğurlu alınmasında əməyi keçən hər kəsə minnətdarlıq ediblər. Aqil Abbbas çıxışında qeyd edib ki, "Dolu"da hamının yaşadığı və içində gəzdirdiyi ağrılar tamaşaçılara təsirli detallarla çatdırılıb. Filmin musiqisinin insan düşüncəsinə böyük təsirindən danışan ssenari müəllifi dünya səviyyəli görkəmli bəstəkar Polad Bülbüloğlunun təmənnasız əməyini xüsusi ilə qeyd edib və vurğulayıb ki, tamaşaçıların alqışına məhz işə sevgi ilə yanaşmaları səbəb olub: "Biz yüz faiz Qarabağı işğaldan azad edəcəyik. Çünki içimizdə torpağımıza, vətənimizə, dövlətimizə, Ali Baş Komandanımıza böyük sevgi var. Bu sevgi bizi qələbələrdən qələbələrə aparacaq".

"Dolu"nın nümayişi zamanı paytaxtdakı anşlaq İsmayıllıda bir daha əksini tapdığı kimi, Şabranda da təkrar edilib. Tamaşaçılar ekran əsərini böyük coşqu ilə qarsalayıblar.

"Bu film bizi qələbəyə səsləyir və aparır". Bu fikri isə təqdimat mərasimindən sonra yaradıcı heyətlə görüşən Şabran şəhər İcra hakimiyyətinin başçısı Novruz Novruzov səsləndirib. İcra başçısı deyib ki, "Dolu" Qarabağ savaşı haqqında cəkilən ən gözəl filmlərdən biridir: "Dolu"ya baxanda insanların ruhu oynayır. Xüsusilə son səhnəsi adamı mütəəssr edir. Tamaşaçı ekrandan komandirin maneəni keçərək işğalda olan torpaqlarımıza doğru getdiyini görür. Sonra ona filmin bütün qəhrəmanları qoşulur. Mən bir anlıq özümü onların arasında hiss etdim. Hər hansı əsər, film, şüuraltı informasiyanın diqtəsi ilə yazılır, çəklir. Deməli, biz öz torpaqlarımıza komandirimiz, onun aynında addımlayan şəhid anası, kənd müəllimi, Vətən döyüşçüləri kimi, başımızı dik tutub qürurla qayıdacağıq. O günü cənab prezident və Ali Baş Komandan İlham Əliyev bizə yaşadacaq.

Filmdə iştirak edən əsas rolun ifaçılarından Komandir-Məmməd Səfa və Şelli Eldar- Sərdar İsgəndərov Şabran şəhərindəndir Onlar da çıxışlarında qələbə gününə az qaldıqlarını ifadə ediblər.

Əsası eramızdan əvvəl I minilliyin ortalarında qoyulduğu ehtimal edilən Şabran şəhəri Azərbaycanın möhtəşəm qədim şəhərlərindən biridirŞamaxı yuksələnədək Şabran şəhəri Şirvanşahlar dövlətinin paytaxtı idi. Böyük İpək Yolu üzərində yerləşən bu şəhər iqtisadi, ticarət və mədəni mərkəz kimi daim diqqət mərkəzində olmuşdur. Tədricən iqtisadi çətinliklərlə qarşılaşan və tez-tez yadellilərin basqınlarına məruz qalan Şabran XVIII əsrin ortalarında tarix səhnəsindən silinmişdir.

Keçən əsrin 30-cu illərindən başlayaraq həyata keçirilən elmi tədqiqatlar və 5000 kvadratmetrdən çox ərazidə aparılan arxeoloji qazıntılar xalqımızın maddi və mənəvi mədəniyyətini əks etdirən zəngin arxeoloji materiallar əldə etməyə imkan verib.

Anar

Ədalət.- 2012.- 14-15 sentyabr.- S.3.