Vətənə və Xalqa layiqli xidmət...

Azərbaycan Respublikasının dövlət atributlarından biri də Azərbaycan ordusu ilə yanaşı Daxili İşlər Nazirliyidir, bu nazirliyin sistemində olan idarələr və qoşun hissələridir, polis orqanlarıdır. Məlumdur ki, hər bir müstəqil dövlət bir neçə böyük sütun üstündə fəaliyyət göstərə bilir. Hər bir dövlət üçün, o cümlədən müstəqil Azərbaycan dövləti üçün bu sütunlardan biri də Daxili İşlər Nazirliyi, polis orqanlarıdır.

Heydər Əliyev,

Azərbaycan xalqının ümümmilli lideri

Azərbaycan polisi çox mühüm funksiyanı icra edir. Hər bir müstəqil dövlət üçün onun daxili işlər orqanları xüsusi əhəmiyyətə malikdir. Azərbaycanda ictimai-siyasi sabitliyin, asayişin qorunmasında polisin rolu çox yüksəkdir.

İlham Əliyev

Azərbaycan Respublikasının Prezidenti

Nərimanov metrostansiyasının yaxınlığında yerləşən Uşaq Stamotoloji Mərkəzinin yanında taksi xidməti göstərənlərdən birinə yaxınlaşıb "İçərişəhər"ə gedəcəyimi bildirdim.

Ortaboylu, ağsaçlı sürücü ani bir cəldliklə çantamı alıb "Allah sizləri bizə çox görməsin, sizlər olmasaydınız bu gün mən həyatda yox idim" deyəndə həm maraqlı bir yol-yoldaşı tapdığıma, həm də maraqlı bir yazının mövzusu olacaq bir hadisə haqqında eşidəcəyimə sevindim. Bir də axı söhbət paqondaşlarımızdan, onların xidməti fəaliyyətindən, vətəndaşlara münasibətindən gedirdi.

İndi oxuduğunuz yazını taksi sürücüsü Namaz Yadigarov başına gələn bir əhvalat kimi necə danışıbsa, mən də nöqtəsinə, vergülünə toxunmadan sizinlə bölüşürəm.

"Bəlkə də Qarabağ uğrunda döyüşəndə heç ağlıma gətirməzdim ki, məni qanı-qanımdan, canı-canımdan olan biri, yəni öz azərbaycanlım bıçaqla dəlik-deşik edəcək. Üstündən aylar keçsə də hələ də günahımın nə olduğunu, onun məni nəyin üstündə vurduğunu anlaya bilmirəm.

Hadisə belə olub. Soyuq yanvar axşamıydı. Taksi xidməti göstərən dostlarımla Uşaq Stamotoloji Mərkəzinin qarşısında dayanmışdıq. Soyuq qılınc kimi kəssə də canımızı dişimizə tutub bir parça çörəkpuluna görə dözürdük. Saat 11 olardı. Üç nəfər gəldi. Onlardan biri qabağa gəlib mənim maşınıma söykəndi. O biri isə saymazyana "Kimindi ə, bu maşın,- deyib səsini ucaltdı və dedi: "Komsomol". Mən dilləndim: "Qardaş, Komsomol dairəsi aeroport yolu üstədi". Sözümü qurtarmamış o biri dostuna tərəf dönüb: "Bu nə deyir, mənə ilişir? Mən bunu bu saat "yortacam" deyib,- söyə-söyə üstümə şığıdı. Onda gördüm ki, böyrümə nəsə sancıldı. İki, üç dəfə hərəkəti təkrar elədi. Yerə yıxıldım, o isə əl çəkmək istəmirdi. Əlim, ayağım və qarnım qan içində idi. Taksi sürənlərdən Şamil adlı dostumuz özündə güc tapıb bıçağı onun əlindən vurub yerə saldı. Mən ona məni xəstəxanaya deyil, polis idarəsinə çatdırmağı xahiş etdim. Sonra nə oldu xatırlamıram"...

Əziz paqondaşlarım, Namaz kişi ilə yol boyu uzanan söhbətimiz zamanı ona kömək edən, ona xəsarət yetirənləri yaxalayan polis əməkdaşlarından birinin yaşadığım ərazidə xidmət aparan, Nərimanov RPİ-nin Post-Patrul Xidməti bölüyünün polis nəfəri, polis baş serjantı Nazim Həsənov olduğunu biləndə bir anlıq təsəvvür edin ki, necə sevindim. Telefon nömrəmi Namaz kişiyə verib axşam onu xilas edən polislə-Nazimlə görüşəcəyimi dedim və onu da birlikdə çay içməyə dəvət etdim...

Polis baş serjantı Nazim Həsənovu məhəlləmizdə hamı yaxşı tanıyır. Onu, sözün əsl mənasında, hər kəs özünə doğma, yaxın bilir. Nazimi insanlara sevdirən zəhmətkeşliyi və insanpərvərliyidir. Dəfələrlə şahidi olmuşam ki, o, yolu keçməkdə çətinlik çəkən yaşlı insanların qoluna girib, məktəbli uşaqların əlindən tutub yolu keçirib.

Paqondaşım tarixçidir. 1991-ci ildə BDU-nun tarix fakültəsini bitirib. Rus və ingilis dillərini mükəmməl bilir. Yeri gəlmişkən, onu da qeyd edim ki, ölkəmizdə keçirilən "Eurovision" mahnı yarışması zamanı onun əcnəbi dilləri bilməsi ölkəmizə gələnlərə şəhərimizdə gəzməli-görməli yerləri ziyarət etmələri, zəngin maddi və mənəvi dəyərlərimiz haqqında ətraflı bilgiyə malik olmaları üçün yaxından kömək olub...

Şəhriyar parkında görüşdük. Namaz kişi "Bax, mənim həyatımı qurtaran, məni ölümün cəngindən alan budur",- deyib onun boynunu qucaqladı...

Söhbət zamanı yenidən həmin günə qayıtdılar...

Nazim Hüseynov danışmağa başladı: "Mən Namaz kişini çoxdan tanıyıram. O, ikinci qrup Qarabağ müharibəsi əlilidir. Füzulidən olan məcburi köçkündür. Füzülinin Üçtəpə deyilən ərazisində yaralı yoldaşını döyüş meydanından çıxararkən minaya düşüb. O yerlərə yaxşı bələdəm, çünki o zaman mən də orada döyüşmüşəm. Ancaq inanın səmimiyyətimə ki, həmin gün onu gətirən taksidə onun özünün yaralı olduğunu mən bilməmişəm. Məlumatı alan kimi həmkarlarım Mikayıl Sayılovla və Ramal Əliyevlə birlikdə hadisə yerinə tələsdik. Hər tərəf qan idi. Hadisənin şahidi olan Şamil adlı taksi sürücüsü ilə birlikdə cinayəti törədənlərin arxasınca düşdük. Onlar Fətəli xan Xoyski küçəsi ilə hərəkət edirdilər. Maşını saxladıb onlara yaxınlaşanda içkili olduqları məlum oldu. Hadisənin şahidi olan Şamil kişi bildirdi ki, Namazı vuran onların arasında yoxdur. Sonradan 18-ci PB əməkdaşlarının apardığı əməliyyat-axtarış fəaliyyəti nəticəsində Namaza ağır bədən xəsarətləri yetirmiş Şahbazov Əli Qəşəm oğlu yaxalanmış və istintaqa təslim edilmişdir. Fikrimcə, mən və paqondaşlarım elə bir böyük qəhrəmanlıq göstərməmişik. Öz insanlıq və vəzifə borcümüzü yerinə yetirmişik"...

Həmkarımı diqqətlə dinləyən Namaz kişi gözlərinin yaşını silib - "Qardaşoğlu, o hadisədən sonra xatirimdən silinməyən bir nüans baş verdi və hər dəfə yadıma düşəndə beləcə kövrəlirəm", - dedi:

"15 gün olardı ki, xəstəxanadan çıxmışdım. Birdən axşamüstü qapımız döyüldü. Açanda gözlərimə inanmadım. Gələn Nazim idi. Bazarlıq edib yolunu bizdən salmışdı. Mən də Nazimi çoxdan tanıyırdım və xəyalıma belə gətirməzdim ki, o, həm də mənim xilaskarım olacaq"...

Vaxt sanki uçmuşdu. Maraqlı bir hadisənin qəhrəmanları ilə görüşdən xoşhal olmuşdum. Və ürəyimdə bir zamanlar qanını, canını Vətən torpaqları uğrunda döyüşlərdə qurban verən, əlil və şikəst olan, bu gün də sıralarımızda cinayətkarlıqla mübarizə aparan, ictimai asayişin keşiyində ayıq-sayıq duran paqondaşlarımıza- Azərbaycan Polisinə "afərin" dedim.

Ona olan inamı, etimadı şərəflə doğruldan polis baş serjantı Nazim Həsənov kimi Vətənin mərd övladlarının iftixar hissi keçirməyə, fəxr etməyə tam haqları var və bizlər də onlarla, onların bu işıqlı əməlləri ilə qürur duyuruq.

Hafiz Təmirov,

polis baş leytenantı

Ədalət.- 2012.- 20 sentyabr.- S.4.