Möhlət Müslümov: "Bu dəryada gözəl üzmək üçün bir ömür də bəs etməz"

"Quyuya su tökməklə dolmaz. Tələbənin qabiliyyəti qanında, canında olmalıdır. Şərt o deyil ki, sənətkar ailəsində böyüyəsən. Allah istedadı sənətkar ailəsində doğulana da verə bilər, ziyalı ailəsində doğulana da, kasıb ailədə doğulana da". Bunu "Azadinform"a açıqlamasında Xalq artisti, Milli Konservatoriyanın professoru Möhlət Müslümov bildirib. Tarzənin fikrincə, musiqi istedadı insana Allah tərəfindən verilir, müəllim isə yalnız istiqamətləndirir: "Bizə bu sənətə gəlmək üçün müraciət edən olanda bir müəllim kimi yoxlayırıq, əgər varsa, 100 adamın içində o bir nəfərin qanında-canında olan qabiliyyət özünü göstərir. Biz də çalışırıq həmin adama düzgün yol göstərək".

Sənətkar professional olmağın sirlərini də açıqladı. O, yaxşı musiqiçi olmaq üçün çalışmağı və bu sənətin bütün qayda-qanunlarına əməl etməyi məsləhət görür: "Qabiliyyəti Allah verir, sonra professional olmaq üçün illər tələb edilir. Mən tərəddüd etmədən cəsarətlə deyirəm ki, bir tarzənin, kamança ifaçısının və ya yaxşı bir xanəndənin yetişməsinə 20-25 il vaxt lazımdır. O da əgər yetişsə. Bu 20-25 ilin içində ali məktəbə qədər olan orta musiqi məktəbi, adi musiqi məktəbi var və ən əsası, təcrübə illəri var. Kamança ifaçısı Fəxrəddin Dadaşov, mən Milli Konservatoriyanın, Mələkxanım Əyyubova Mədəniyyət və İncəsənət Universitetinin professorları olsaq da, biz bu gün də bilmədiklərimizi öyrənirik, yenə də öz üzərimizdə işləyirik".

Sənətkar muğamın xüsusilə çətin bir sənət olduğunu da vurğulayır. Xalq artisti musiqinin bu istiqamətinin zəhmət tələb etdiyini də dedi: "Muğam dəryadır. Bir metr bu dəryaya düşənlər əlin-ayağın isladır və deyir ki, "mən bu dəryanın üzgüçüsüyəm". Mən min metr də bu dəryaya düşsəm, deyə bilmərəm ki, bu dəryada gözəl üzürəm. Bu, qəbahət olar. Bu dəryada gözəl üzmək üçün bir ömür də bəs etməz. Biz indi Mələkxanımla bir dəsgah hazırlayırıq, birdən məşq zamanı mübahisələrə qədər gəlib çıxır. Mənə qaranlıq qalan məqam olanda isə zəng vururam yaşca böyük qocaman ustadlarımıza.

Mən onları özümə müəllim hesab edirəm. Onlardan da öyrənirəm. Gənclərə də məsləhət görürəm ki, ancaq çalışsınlar, öyrənsinlər və özlərindən razı olmasınlar. İndi görürsən ki, 2-3 muğam öyrənir və ifa edir, əvvəldən axıradək heç dəsgahı çala bilmir, tar çalanda tardan çox burnun səsi gəlir deyir ki, mən də muğam ifa edirəm. Amma 60-70 yaşında da öyrənmək lazımdır".

Ədalət.- 2012.- 11 yanvar.- S.8.