Müasir Şirvan şəhəri

(əvvəli ötən sayımızda)

Şirvan həm də energetiklər şəhəridir

Bu doğrudan belədir. Bir sıra mühüm sənaye obyektləri olan bu şəhərdə uzun müddət fəaliyyət göstərən DRES ölkənin enerji təsərrüfatında müstəsna yer tutmuşdur.

Yenilənməsi qaçılmaz olan bu müəssisənin lap yaxınlığında indi "Cənub" Elektrik Stansiyası inşa edilir. Təməli Azərbaycan Respublikasının Prezidenti İlham Əliyev tərəfindən qoyulan stansiya 780 meqavat gücündə olmaqla həm təbii qaz, həm də mazutla işləyəcəkdir.

Bölgənin elektrik enerjisinə olan təlabatının çox hissəsini ödəyəcək Elektrik Stansiyasının inşasını "Azenko" şirkəti həyata keçirir.

Havanın xeyli soyuq olmasına baxmayaraq burda iş bir dəqiqə də olsa dayanmır. Tikintinin iş icraçılarından biri olan Rahil Mütəllimovla qısaca söhbət eləməyə vaxt tapa bildim:

- İndi tikintinin ən qızğın çağıdır. Ötən il ərzində "Cənub" Elektrik Stansiyasının maşın zalında hər birinin çəkisi 439 ton olan I, II, III və IV qaz turbinləri köməkçi avadanlıqları ilə birgə inşa edilmişdir.

Maşın zalındakı I və II buxar turbinlərinin tikintisi yekunlaşmışdır. Maşın zalının 7200 kvadrat metr dam, 17180 kvadrat metr divar örtüyünün sendviç panelləri, 4 qazanda hər birinin çəkisi 938,5 ton olan buxar qızdırıcıları quraşdırılmışdır.

Uzunluğu 2500 metr olan 2 soyuducu su xəttinin sahil nasosxanasında, kondensatorların girişinə qədər olan hissədə işlər yekunlaşmışdır. Kabel tunelləri yağış və məişət sularının axıdılması üçün ötürücülər, kanalizasiya xətlərinin çəkilməsi işləri başa çatdırılmışdır. Belə, bilmirəm bunlar sizi qane etdimi?

Açığı bir sıra texniki adları soruşmağa, aydınlaşdırmağa vaxt qalmadığından xüdahafizləşməli oldum.

Yollar salınır,binalar təmir edilir,yaşıllıqlar da artır

Ən müxtəlif işlərlə bərabər Şirvan şəhərində yolların təmirinə xüsusi önəm verilir.

Dediyim kimi şəhərin kanalizasiya xətləri müasir tələbləri ödəmədiyindən yağış sularının küçələrdə yığılması labüddür. Bu da son nəticədə yolların dağılmasına səbəb olur. Bu qayğılar isə əsasən "Şirvan Tol Tikinti-3"ASC-nin üzərindədir.

Ötən il bu müəssisə tərəfindən şəhərin Müslüm Maqomayev, Puşkin, Ə.Qarayev, Xəqani, Ş.Şükürov, Ə.Bayramov, H.Cavid, M.Ə.Sabir, Vidadi adına və digər küçələrdə, Hacı Qəhrəmanlı və Bayramlı qəsəbələrində asfalt-beton işləri görülmüşdür. 2011-ci ildə bu müəssisə uzunluğu 14 kilometrə yaxın sahədə iş görmüşdür. Şəhərin 34 saylı Yol İstismar idarəsi tərəfindən isə Hacıqabul-Şirvan avtomobil yolunun xeyli hissəsi təmir edilmiş, 5,6 kilometr məsafəyə isə asfalt çəkilmişdir. Şirvanda yerləşən "Yol-İnşaat" MMC tərəfindən şəhərin Natavan küçəsində, M.Ə.Rəsulzadə prospektində aparılan asfalt-beton işlərinin ümumi həcmi 15200 kvadrat metr sahəni əhatə edir.

Mənzil İstismar İdarəsinin rəisi Eyyub Gülmmədov da 2011-ci ilin yekunlarını uğurlu sayır. Onun dediklərinə görə H.Əliyev, H.Z.Tağıyev, T.İsmayılov, Xəqani, 28 may və başqa küçələrdə yerləşən binalarda sosial şərait üçün müxtəlif təmir işləri aparılmış, şəhər sakinlərinin narazılığına səbəb olan yöndəmsiz və köhnə tikililər sökülmüşdür. Bu işlər əsasən T.İsmayılov, Xəqani, 20 Yanvar, 28 may küçələrində aparılmışdır.

Eyyub müəllim Şirvan şəhərində yaşıllıqların, gül-çiçək kollarının salınmasından da həvəslə danışdı. Bu mübaliğəsiz belədir.

Çünki şəhərin hər bir sakini, hər bir qonağı burdakı meydançaları, yaşıllıqları, park və bağları bəzəyən gül-çiçək kollarını xüsusi qiymətləndirirlər. Həmsöhbətim əlavə etdi ki, H.Əliyev prospektində və parkında, Naxçıvan, İ.Qayıbov, H.Z.Tağıyev küçələrində, Füzuli və Səməd Vurğun parklarında ümumilikdə 5335 ədəd ağac, 3800 ədəd qızılgül, 18925 ədəd müxtəlif növ mövsümi gül kolları, 1580 kvadrat metr qazon ot toxumu əkilmişdir.

Şirvan şəhərində yeni ənənə

Bu ənənə yön saldığım əyalət şəhərlərinin heç birində yoxdur. Nümunəvi məhəllələrin yaradılması ənənəsi məhz bu şəhərdə yaradılmışdır. Belə nümunəvi məhəllələr təkcə şəhərin simasını dəyişmir, həm də insanların istirahəti, körpələrin əyləncəsi üçün çox gözəl şərait yaradır.

Günün axırında Şirvan şəhər veteranlar Şurasının sədri Musa Quliyevlə 2011-ci ildə salınmış H.Əliyev prospektindəki 13, 14, 15 saylı binaların qarşısındakı nümunəvi məhəllədə görüşdük. Musa kişi xatirələri xatirələrə calayıb məni H.Z.Tağıyev və H.Əliyev prospektləri arasındakı, 20 Yanvar, Xəqani küçələrindəki binaların qarşısında salınmış nümunəvi məhəllələri gəzirdi.

Bir-birindən təmiz, səliqəli, yeni məhəllələrdə doğrudan da hər şey nümunəvidir. Tamet döşəmələr, uşaq əyləncə və idman qurğuları, rahat oturacaqlar, müasir işıqlandırma qurğuları, yaşıllıqlar, gül kolları, burdakı hər şey şəhərin sakinləri üçündür. Bu məhəllələrdəki ən önəmli tikililərdən biri də burda müxtəlif tədbirlər üçün inşa edilmiş binalardır:

- Bilirəm, mənimlə elə-belə gəzmirsən, yəqin yazı hazırlayacaqsan. Gördüklərini, bildiklərini yazsan bəsdir. Regionlarda həyat daha maraqlı olur, çünki bura ayrıca fikir verilir. Şirvan şəhər İcra Hakimiyyətinin başçısı Mərdan Talıb oğlu Camalovun əməyini mütləq qeyd edərsən.

Bu şəhər üçün elədiklərinin bir nümunəsi də bu məhəllələrdir. Şəhər bələdiyyəsi də imkanı daxilində bu işlərdə fəal iştirak edir. İndi məni bir xəstəxanaya apar. 2011-ci ildə xəstəxananın əsas binası, bir sıra şöbələri əsaslı təmirdən sonra bir ayrı aləm olub. Poliklinika lap xoşuma gəlir, bəlkə də mən belə fikirləşirəm. Yəqin yaxın vaxtlarda açılışı olar. Hə, belə, qocaların ən çox üz tutduqları yerlərdən biri də buradır. Ancaq hamı da qocala bilmir ha...

...Yəqin mənim yaşadığım Şirvan şəhəri də nə vaxtsa qocalacaq. Ancaq insandan fərqli olaraq şəhəri yeni məhəllələr kimi yeniləşdirmək olur. Buna isə yəqin ki, hələ xeyli var.

Səxavət Məmmədli

Ədalət.- 2012.- 11 yanvar.- S.7.