MUSİQİYƏ BAĞLI ÖMÜR

"Bənövşə" Uşaq Xoru ... İllərin yaddaşından süzülüb gələn bu ad yaşlı nəslə də, indiki nəslə də yaxşı tanışdır. 1958-ci ilin sentyabr ayında Azərbaycan Dövlət Televiziya və Radio Verilişləri komitəsinin nəzdində görkəmli sənətkarımız Əfsər Cavanşirovun rəhbərliyi ilə yaradılan "Bənövşə" Uşaq Xorunda istedadı olan yüzlərlə uşaq ilk addımlarını atıb.

İndi hamımızın yaxşı tanıdığı Zeynəb Xanlarova, Xuraman Qasımova, Nisə Qasımova, Akif İslamzadə, Flora Kərimova, Mələkxanım Əyyubova, Süleyman Zeynalov, Könül Kərimova, Azərin, Nurlan Əzizbəyli və adını çəkmədiyimiz daha neçə-neçə istedadlı müğənnilərin ilk yolu məhz bu kollektivdən keçib. "Bənövşə" Uşaq Xorunun bədii rəhbəri Zülfiyyə İbrahimova müsahibimizdir.

- Zülfiyyə xanım, bildiyimiz kimi "Bənövşə" Uşaq Xorunun yaşı heç də az deyil. Əgər mümkünsə, xorun tarixi haqqında oxucularımıza da məlumat verərdiniz.

- "Bənövşə" Uşaq Xoru 1958-ci ilin sentyabr ayında Azərbaycan Dövlət Televiziya və Radio Verilişləri Komitəsinin nəzdində görkəmli sənətkarımız Əfsər Cavanşirovun rəhbərliyi ilə yaradılıb. Bu xor istedadlı uşaqları ilə hər zaman seçilib. "Bənövşə" Uşaq Xoru Azərbaycan televiziyası nəzdində fəaliyyət göstərən beş bədii kollektivdən biridir. Bu beş musiqi kollektivinə hamımızın yaxşı tanıdığı Mübariz Tağıyev rəhbərlik edir.

- Uşaqlarla işləmək çətin deyil ki... və bir də onları neçə yaşından, hansı şərtlərlə xora qəbul edirsiniz?

- Çətin olsa da öyrəşirsən. Uşaqlar adətən çox həssas olurlar. Bu işdə uşaq psixologiyasını bilmək vacibdir. Onlarla dil tapmaq, onları duymaq, həvəsləndirmək lazımdır. O ki qaldı uşaqların kollektivə qəbul olunmasına burda əsas şərt səsin olmasıdır. Musiqi duyumu və səsi olan uşaqlar beş yaşından xora qəbul olunurlar. On birinci sinfə kimi musiqi təhsili alırlar. Burada uşaq mahnıları öyrədilir, musiqi duyumu artırılır, vokal dərsləri keçirilir. Mən şəxsən deyərdim ki, bizim uşaqların ən problemli cəhəti əksəriyyətinin nitqinin zəif olması və tələffüzlərindəki qüsurlardır. Bütün bunlara baxmayaraq kollektivimizdəki uşaqlar öz istedadları, musiqi duyumları ilə seçilirlər. Onlar ən çətin materialların öhdəsindən gəlirlər. Belə istedadlı uşaqlardan Rəhman Qarayev, Ədilə Əlizadə, Gövhər, Leyla və başqalarının adını çəkə bilərəm. Tələbələrimdən Konservatoriyada, eləcə də Opera və Balet Teatrında işləyənlər var. Lalə Tağıyeva, Esmira Məmmədova, Rəşad Mirzəyev belələrindəndir.

- Zülfiyyə xanım, necə olub ki, həyatınızı musiqiyə bağlamısınız?

- Hələ orta məktəbin beşinci sinfində oxuyarkən musiqiyə həvəsim olub. Pianinodan bizə dərs verən Sevinc müəllimə məni həvəsləndirib. Təhsilimi Bakıda yerləşən 15 nömrəli yeddi illik musiqi məktəbində davam etdirmişəm. Sonra məktəbəqədər musiqi texnikumunda oxudum. 1990-cı il idi. Bizdə xor müəlliməsi olan Bela Vəkilova həm də Opera və Balet Tetrında baş xormeyster idi. 202-ci qrupda oxuyurduq. Qrupda iyirmi altı qız var idi. Bela xanım bizim səsimizi yoxlamağa apardı. Iyirmi altı nəfərdən altı nəfər seçildi. Onlardan biri də mən idim. Opera və Balet Teatrının direktoru Akif Məlikov bizi xora qəbul etdi. Altı qızdan dördü ailə qurduğuna görə işdən getdi.İndi Məlahət Səfərəliyeva ilə mən qalmışam. Məlahət mənim rəfiqəmdir. Teatrın baş xormeysteri əməkdar artist Sevil Hacıyeva ilə bir oxumuşuq. O, hazırda Opera və Balet teatrında xor kollektivinin bədii rəhbəridir. Gözəl kollektivimiz var. Orkestrin drijoru Cavanşir Cəfərovun, baş rejissor Hafiz Quliyevin də adlarını çəkə bilərəm.

- Zülfiyyə xanım, həm "Bənövşə" Uşaq xoruna rəhbərlik etmək, həm də Opera və Balet Teatrında çalışmaq sizə çətinliklər yaratmır ki... bunların öhdəsindən necə gəlirsiniz?

- Yox, əlbəttə ki, yox! Heç bir çətinlik görmürəm. Bəlkə də bu uşaqlıqdan musiqiyə bağlılığımdandır. Onu da deyim ki, mən təkcə musiqi texnikumu ilə kifayətlənməmişəm. Opera və Balet Teatrında işləyə-işləyə sənədlərimi Konservatoriyaya verdim. Qəbul olundum. Zərifə İsmayılova ilə çalışdım. Iki il oxudum. 1994-sü ildə xor drijorluğu şöbəsinə qəbul oldum. Bakalavrda müəllimim Aqil Qafurov idi. Magistrdə isə Yalçın Adıgözəlovla çalışdım. Konservatoriyada altı il təhsil almışam.

- Zülfiyyə xanım, necə oldu ki, "Bənövşə" Uşaq Xoruna gəldiniz? Deyilənə görə, Əfsər Cavanşirov çox tələbkar olub. Onunla işləmək heç də asan deyilmiş...

- 1996-cı ildə Azərbaycan televiziyasında Ramiz Mustafayevin bədii rəhbər olduğu Cahangir Cahangirov adına xor kollektivində işə düzəldim. Orada eşitdim ki, Əfsər Cavanşirov "Bənövşə" Uşaq Xoruna konsertmeyster axtarır. Əfsər müəllimlə görüşdüm və dedim ki, mən xormeysterəm. O, pianinonun qabağına not qoydu və dedi ki, bu əsərə necə drijorluq edərsən? Mən ifa etdim. O, ifamı bəyəndi və dedi ki, sabah işə gələrsən. Əgər uşaqlarla bacarsan, qalıb işləyərsən. Mən dörd il Əfsər Cavanşirovun yanında köməkçi xormeyster işlədim. Sonra xormeyster keçdim. Əfsər müəllim 2005-ci ildə rəhmətə getdi. 2006-cı ildə hörmətli sənətkarımız Mübariz Tağıyevin təqdimatı ilə "Bənövşə" Uşaq Xoruna bədii rəhbər seçildim. Onu da deyim ki, Azərbaycan Teleradiosu olmasaydı, "Bənövşə" Uşaq Xoru bu qədər uzun ömürlü olmazdı. Bu kollektivin bu gün də fəaliyyət göstərməsində Teleradio rəhbərliyinin, şəxsən qurumun sədri Arif Alışanovun rolu böyükdür.

Mən inanıram ki, "Bənövşə" Uşaq Xoru öz gözəl layihələri və yenilikləri ilə nəinki Azərbaycanda, eləcə də xarici ölkələrdə tanınacaqdır.

 

 

Adil ŞİRİN

 

Ədalət.- 2012.- 19 yanvar.- S.7.