Bayat

Bulvarda

Quzum, heç nə istəmə sən,

Bax dənizə, doyunca bax.

"Bulvar" adlı bu aləmdən

Yadında tək o qalacaq.

Ona pay ver göz yaşından,

Bir az hava alaq, gedək.

Gəl, dənizin yaddaşında

Biz də belə qalaq, gedək.

Bu da dənizin qırağı,

Eləcə bax, ötüb keçək.

İstədiyin oyuncağı

Sənə leylək gətirəcək.

Ləngər vurur, yuxuludur,

Gəmi suda batar birdən.

Karusellər qorxuludur,

Tut əlimi, gedək burdan.

Yesən, boğazın ağrıyar,

Dondurmadan gözünü çək.

20-cə qəpik pulum var,

Onunla da evə gedək...

Bu, elə bir günah ki...

***

Bir kişi qocalacaq mənimlə

bir ömür boyu

bir damın altında.

Həyatımı daim

bir hüzn bürüyəcək,

bir kişi qollarım arasında

ürəyimin hərarətindən əriyəcək.

O, sən olmayacaqsan dostum,

sən olmayacaqsan...

Onun gözlərində

sənin baxışlarını axtaracam,

dodağında

öpüşlərini.

İkinci dəfə doğulacam

başqa birinin olmaq üçün

sənin sevgində boğulacam

başqa birindən

qisas almaq üçün.

Yaşlı qadınların

"Qoşa qarıyın",

"Bir yastıqda qocalın" kimi

qarğışlarından sonra

xoşbəxt olmağım mümkünsüz...

Qovuşacam sənə

özümü

ürəyimin şah damarından asdıqda,

qocalacam

bir kişi ilə bir yastıqda.

O, sən olmayacaqsan, dostum,

sən olmayacaqsan.

Mən səni sevdim, dostum,

tək səni sevdim...

Səninlə qocalmaq

mümkünmü heç?

Bu, elə bir günah ki,

Sənə demərəm

günahımdan keç!..

Mən ayrılıqların dostuyam,

arkadaş...

Sən sevən ürəyinlə mənimlə üz-üzə, göz-gözə

oturma...

Sən də içkiyə qurşanarsan

özünü

... tərki-dünya olunmuş sanarsan...

Mənim kimi bir qədəh içkidə

boğularsan,

ya da bir siqaret atəşində yanarsan,

yanarsan...

***

Qal elə mələk kimi,

Girmə şeytan donuna.

Ayaqlarım yerimir,

məni məcbur aparma

məhəbbətin sonuna...

***

Bu yol gedər-gələr yoldu,

Bu yollardan gözünü çək.

Könlüm, gəl birgə ağlayaq,

Getdi yenə, gəldiyi tək...

Ölüm sevgi kimidir,

Sevgi də ölüm.

Hamı kimi ölməyim,

Sevgidən ölüm...

***

Nə bir gözdə sevinc oldum,

Nə bir gözdən mən yağmıram.

Anamın qarnına sığdım,

İndi dünyaya sığmıram...

***

Tənhayam...

Görmürəm indi açdığım təzə wordu...

Elə bil ki, dağılıb

dünyanın ata yurdu,

qırılıb nəsli, köku...

... Dəyməyin həyatımın replayinə,

mən ölmək istəyirəm...

Çalınır uzaqlarda həyatımın soundtrakı...

Öləydim belə kaş ki...

Yalançı sevgilər,

ayrılıq oldu mənə qənim,

Bu qara dünyada

ağ word açdım-

olsun kəfənim...

İllər keçib sevgimizdən

Bu gerçəkdi, güman deyil,

Bir ömürdü, bir an deyil...

Zaman da o zaman deyil,

... İllər keçib sevgimizdən...

İradəsiz olduq deyə,

Ayrılıb döndük özgəyə...

Yol gedir yeni sevgiyə-

İllər keçib sevgimizdən.

Vaxtı deyil, baxtı qına,

Ürəyini bir də sına...

Bağışlasın saflığına-

İllər keçib sevgimizdən...

Mən, sən, Torqovı

(Sevinc üçün)

Mən, sən, Torqovı,

Yenə olaq üçümüz...

Bir az mağazaları gəzək,

Gözlərimiz bayram eləsin,

sonra baxa-baxa qalsın

ala bilmədiyimiz paltarlara...

Bir az da kədərə bürünsün gözlərimiz.

Tanrı taleyimiz kimi

gözlərimizə də sevinci

şişin burnunda verir...

Mən, sən, Torqovı,

yenə olaq üçümüz...

Bir az da vaxt itirək

türk kafelərində biz...

Ürəyimizdə cibimizi sayaq,

son qəpiyimizi də burda qoyaq...

Vitrinlərin önündən

şütüyüb keçək Zaman kimi...

Qan ağlasın içimiz...

Mən, sən, Torqovı,

yenə olaq üçümüz...

Bir qədəh soyuq gecə

Bütün sədlər ilk misraya qədərdir,

bütün sədləri keçək, dostum,

gəl içək, dostum!

Bir qədəh soyuq gecə içək

Bir bənd təzə şeirin üstündən.

İçək

bizi ilk misrayadək qovan

ilk məhəbbətimizin sağlığına!

Bir sağlıq da

qafiyələrdə gizlən-qaç oynadığımız

sevgilərə deyək

Doyunca içək, dostum...

Unudaq bu dünyanı

içə-içə

yaza-yaza...

Bir azdan yenə bizi

son misradan sürüyə-sürüyə

aparacaqlar

xarabamıza...

Gecə yarı

Şəhərin yuxulu gözləri süzülür

şərab kimi

səhərə sarı

Bir azdan

gecə öz libasını soyunacaq,

adamlar gecəni çılpaq görmək üçün

yuxudan oyanacaq...

***

Həyat adlı o cəllad

Kəsməsəydi yollarımıg

Mən ölümün boynuna

Dolayardım qollarımı...

***

Sevgi ilə dostluğun arasında

bircə qarış yol varmış...

O bir qarış yola da

tufan gələr,

çovğun düşər,

ya da ki

qar yağarmış...

***

Bu yol gedər-gələr yoldur,

Bu yollardan gözünü çək.

Könlüm, gəl birgə ağlayaq,

Getdi yenə gəldiyi tək...

***

Bu gecə başqa bir gecə,

Payızın da qar-qışı var,

Payız heç getmək istəmir-

Pəncərəmdə göz yaşı var...

***

Bu ağ-qara şəkildəki

balaca dostlarımın gözləri dolub...

Bir az da baxsam

boynuna sarılacaqlar xatirələrimin...

Bu, şərab deyil...

Dostum, bir tək

sən anlayırsan məni.

Bu, şərab deyil, dostum,

Bir daş ürəyin yaraladığı

sevgimi

al qanıdır.

Çəkdiyim isə

tənhalığın nazıdır.

Bu dumanı da

dağlar göndərib mənə.

Özləri gələ bilməyən dağlar

Arxa-dayağımdı, dostum-

Onlara söykənib

ayrılığa dözəcəyəm.

Bir azdan

dumanları dağlara qovacam

başımdan,

Bir az da göylərə verəcəm

göz yaşımdan.

Yenə başıma düşən,

sümüyümə düşməyən

bu sevda havasına

oynamaq çətin,

dostum.

Bilirəm,

sonu yoxdu bu məhəbbətin...

Xuraman Hüseynzadə

Ədalət.-2012.-28 yanvar.- S.20.