SONA BÜLBÜLLƏR

Qədirin qanadlı mələklərisiz

Ay sona bülbüllər, sona bülbüllər

Hayana uçursuz, uçun bəri siz,

Bir az hayan olun ona bülbüllər.

Ay sona bülbüllər, sona bülbüllər.

Gəlin, nəğmə deyin sözünün üstdə

Sizi mehman edər gözünün üstdə

Yığışın başına dəstəbədəstə

Coşsun, təbi gəlsin cana, bülbüllər.

Ay sona bülbüllər, sona bülbüllər.

Sizi yolunuzda, əridir canın

Gəlin nəğmənizlə qoşa diyanın.

"Yar", "yar" oxuyanda onu da anın

Qoy gileylənməsin yenə, bülbüllər.

Ay sona bülbüllər, sona bülbüllər.

Dərin dəryalarda gəmisi qalıb.

Onun biçilməmiş zəmisi qalıb

Arzusu, istəyi-cəmisi qalıb

Siz də şərik olun buna, bülbüllər.

Ay sona bülbüllər, sona bülbüllər.

Əlini atıbdır o, yara dəyib

Heyif yara deyil, divara dəyib

Bəlkə huşa gedib dübarə dəyib

Xatırlayır handan-hana, bülbüllər.

Ay sona bülbüllər, sona bülbüllər.

Gül göndərən yarı tapın gətirin

Üz döndərən yara verin, yetirin

Nəğməylə oyadın gülü, bitirin

Qoymayın yarpıza dönə, bülbüllər.

Ay sona bülbüllər, sona bülbüllər.

Uçun pərvazlanın Qədir bağında

Oxuyun, nazlanın solu-sağında

Şıltaqlıq etməyin gül budağında

Köksünüz boyanar qana, bülbüllər.

Ay sona bülbüllər, sona bülbüllər.

Bülbül sorağıyla gəzir dağları

Yaşıl çəmənləri, güllü bağları

Uzansın ömrünün vurğun çağları

Səslənin, çatmasın sona bülbüllər.

Ay sona bülbüllər, sona bülbüllər.

Səsinin sehriylə ahu-zar çəkir

Gözü yolda qalıb intizar çəkir

Qəm yükü ağırdır o ki var çəkir

İstəyər çiyninə qona bülbüllər,

Ay sona bülbüllər, sona bülbüllər.

İlahi nurunda, Yusif camallı

Leyli həsrətiylə ürəyi qanlı

Oxuyur eşq ilə Kərəm misallı

Qoymayın alışıb yana, bülbüllər

Ay sona bülbüllər, sona bülbüllər.

Maşallah bu səsə, Allah, göz dəyər

Kənar oxumayın, ona söz dəyər

İnciyər, dayanar, bir az dincələr

Qalarsınız yana-yana, bülbüllər.

Ay sona bülbüllər, sona bülbüllər.

Balalar eşidib, yuvaya sınır

Çiçəklər oyanır, çəmənlər, dinir

Səsi ucaldıqca dünya isini

Qoymayın bu odu sönə, bülbüllər.

Ay sona bülbüllər, sona bülbüllər.

Çağırın Mustafa köməyə gəlsin

O da öz sözünü deməyə gəlsin

Balalar yığışıb yeməyə gəlsin

Bir büsat yaradın ana bülbüllər.

Ay sona bülbüllər, sona bülbüllər.

Səsin sehrindəyəm fikrim yan gedir

Eşqiylə yanaram, can qurban gedir.

Qəlbimdə çağlayan bir ümman gedir

Siz də gəlin bu ümmana, bülbüllər

Ay sona bülbüllər, sona bülbüllər.

Hacı Hicran Ələkbər oğlu

Ədalət.-2012.-31 yanvar.- S.7.