Amaliya Pənahova: "Bütün seriallarımızın dili qüsurludur"

Xalq artisti Amaliya Pənahova ilə müsahibəsi

- Amaliya xanım, Azərbaycan tamaşaçısı sizi professional kino və teatr aktyoru kimi tanıyır. Bir aktrisa olaraq Azərbaycan mədəniyyətində gördüyünüz işlər, göstərdiyiniz xidmət misilsiz və danılmazdır. Səhv etmiriksə, "Məhkumlar" bədii televiziya serialında canlandırdığınız Amaliya obrazı karyeranız boyu bir serialda həyat verəcəyiniz ilk roldur.

- Düzdür, rəsmən bu mənim bir televiziya serialında ilk işimdir. Ancaq xatırlatmaq istəyirəm ki, bir neçə il bundan öncə Türkiyə və Azərbaycanın müştərək istehsalı olan dörd seriyalı bir filmdə çəkilmişəm. Nəzərə alsaq ki, "Məhkumlar"ın 10 seriyasında iştirakım planlaşdırılıb, əlbəttə, müqayisədə buradakı işim daha iri həcmlidir. Ümumiyyətlə, mən "Məhkumlar" başda olmaqla bu gün çəkilməkdə olan bütün seriallara uğurlar arzulayıram. Nöqsanlar, qüsurlar ola bilər. Çünki bu, bir başlanğıcdır. İstənilən yeni işin əvvəlində müəyyən səhvlər ola bilər və bunu böyük bir faciə tək yox, tam təbii bir hal kimi qəbul etmək lazımdır. Hər şey zamanla yoluna qoyulacaq, bütün çətinliklər, çatışmazlıqlar tədricən arxada qalacaq. Unutmaq lazım deyil ki, inkişafın yolu, təcrübədən, təkamüldən keçir. Yadda saxlayaq ki, hazırkı mərhələ bir sınaq dövrüdür. Biz böyük ölçüdə istədiyimizə, məhz bu sınaq mərhələsi yekunlaşdıqdan sonra çata biləcəyik.

Amma bu proses boyu əsas qazanclarımızdan biri də yeni adların, yeni simaların - rejissorların, aktyorların, operatorların, prodüserdən tutmuş işıqçıya qədər müxtəlif istedadlı gənclərin meydana çıxması olacaq. Sanki bu bir ələkdir, kimlərsə bu ələkdən ələnəcək, kimlərsə özünü, istedadını təsdiqləyərək üzdə qalacaq. Sözün həqiqi mənasında, hazırkı mərhələnin çox böyük əhəmiyyəti var. Bir daha vurğulamaq istəyirəm ki, məhz bu zaman kəsiyində bir çox gənc istedadlar aşkarlanacaq, cəmiyyətdə tanınacaq, seviləcək. Bu mənada, düşünürəm ki, dövlət tərəfindən milli teleserialların çəkilməsinə verilən böyük maddi və mənəvi dəstək yalnız müsbət nəticələrə gətirib çıxaracaq. Nə qədər dünya təcrübəsindən öyrənməyə cəhd etsək, bəhrələnsək, bir o qədər tez uğura yaxınlaşa, qarşıya qoyulmuş məqsədə nail ola bilərik. Şübhəm yoxdur ki, bir neçə ildən sonra bizdə də Rusiyadakı, xüsusilə də Türkiyədəki kimi geniş tamaşaçı auditoriyasının rəğbətini qazanmış keyfiyyətli işlər ortaya qoyulacaq.

- Siz böyük təcrübəyə malik ustad bir sənətkarsınız. Buna görə də bir qədər konkret danışmağınızı istərdik: bizim seriallarda çatışmayan nədir? Tamaşaçı sevgisini və uğur qazanmaq üçün ilk növbədə nə etmək, hansı addımları atmaq lazımdır?

- Bizim serialların çatışmayan əsas cəhətlərindən biri professionallara az müraciət olunmasıdır. Şübhəsiz, professinallar olan yerdə keyfiyyət də yüksək olur. Və istər-istəməz bu profesionallarla, ustadlarla işləyən gənclər də onlardan öyrənir, əsl sənət məktəbi keçməli olur. Bu, çox mühüm amildir və bizim serial çəkilişləri ilə məşğul olan həm prodüserlərimiz, həm də rejissorlarımız bu məqama xüsusi diqqət və həssaslıqla yanaşmalıdırlar.

- Hal-hazırda çəkildiyiniz "Məhkumlar" bədii televiziya serialı ilə bağlı münasibətinizi bilmək maraqlı olardı.

- Mən "Məhkumlar"ın təqdimat mərasimində də, bildirmişdim ki, bu çox effektli bir layihə, uğurlu bir başlanğıcdır. Çünki ümumilikdə, "Məhkumlar" serialının yaradıcı və texniki heyəti profesionallardan ibarət bir komanda olaraq formalaşıb. Ən əsası da, bax, elə budur. Elə bu vacib amil keyfiyyəti də, uğuru da təmin edir. Düşünürəm, məhz elə bunun nəticəsidir ki, "Məhkumlar" tamaşaçıların sevgisini və rəğbətini qazanıb.

- Siz hazırda "Məhkumlar"da Amaliya obrazını canlandırırsınız. Bu obrazla bağlı mülahizələrinizi, fikirlərinizi oxucularımızla bölüşmənizi istərdik.

- Bu yeni Amaliyayla əlaqədar ilk təəssüratlarım çox xoşdur. Nəzərinizə catdırım ki, mən bu obraza hələ 10 seriya əvvəldən çəkilməliydim. Amma gah digər işlərimlə bağlı ölkədə olmadım, gah səhhətimdə müəyyən problemlər yarandı və mənim çəkilişlərə qatılmağım bir qədər yubandı. Amma bu müddət ərzində serialın rejissoru Yaşar Əhmədov və ssenaristi Vüsal bəy mənimlə mütəmadi olaraq əlaqə saxlayırdılar. Görünür, qismət bu günəymiş. Çəkildiyim Amaliya maraqlı bir obrazdır və mən də çalışacağam ki, nəsə fərqli bir iş ortaya qoyaq. Çünki şəxsən mənim özüm üçün də müasir dövrün biznes-ledisini, işgüzar qadınının xarakterini canlandırmaq çox maraqlıdır. Ümid edirəm ki, yaxşı bir iş alınacaq.

- "Məhkumlar" komandası əsasən gənclərdən təşkil olunub. Bu günki gənclərlə işləmək sizdə hansı təəssüratları yaradır?

- Mən hər zaman gənclərlə işləməyi xoşlamışam və tam səmimiyyətimlə deyirəm ki, çox vaxt da özüm buna can atmışam. Bildiyiniz kimi rəhbəri olduğum Bakı Bələdiyyə Teatrı 20 ildən artıqdır ki, fəaliyyət göstərir və bu gündə onun kollektivinin səksən faizini gənclər təşkil edir. Mən həmişə istedadlı gənclərə böyük etimad göstərmişəm, Allaha şükürlər olsun ki, onlar da hər zaman mənim etimadımı doğruldublar. "Məhkumlar"ın çəkilişləri davam etdikcə, şahidi oluram ki, bu komandaya əsasən bacarıqlı, peşəsinə ürəkdən bağlı olan istedadlı gənclər toplaşıblar. Hər birinə sənətdə uğurlar arzulayıram.

- Karyeranız boyu əsasən tammetrajlı bədii filmlərdə çəkilmisiniz. Bu, bir həqiqətdir ki, tammetrajlı filmlərlə seriallar arasında bir sıra fərqli cəhətlər var. Bu fərqli məqamlarla bağlı düşüncələriniz hər kəs üçün maraqlı olar.

- Xüsusi vurğulamaq istəyirəm ki, serialların çoxluğu naminə nə gəldi, hansı mövzu oldu çəkmək qətiyyən düzgün deyil. Məqsəd sənətin səviyyəsini yüksəltmək, mənəviyyata xidmət etmək olmalıdır. Bacardıqca bayağı mövzulardan qaçılmalı, düşündürücü, problematik mövzulara üstünlük verilməlidir. Belə olan təqdirdə, tamaşaçı da kinodan, sənətdən uzaq düşməz, sevə-sevə ekran qarşısında oturar. Əsas məqsəd gənclərimizin problemlərini işıqlandırmaq, adət-ənənələrimizi, tariximizi yaşatmaq olmalıdır. Yadıma düşmüşkən, daha bir məqama diqqət çəkmək istəyirəm. Bu da seriallarımızın diliylə bağlıdır. Televiziya rəhbərləri bu məsələyə xüsusi həssaslıqla yanaşmalıdırlar. Bu gün yayımlanan bütün seriallarımızın dili qüsurludur. Biz heç bir güzəştə getmədən dilimizim saflığını qorumalı, ədəbi dilimizi yaşatmalı, inkişaf etdirməli, layiqli şəkildə gələcək nəsillərə ötürməliyik. Ən böyük arzum isə tarixi mövzuda serialların çəkilməsidir. Düzdür, bunun üçün çox vəsait lazımdır, amma şərəfli tariximizi yaşatmaq, gənclərimizə təbliğ etmək və gələcək nəsillərə catdırmaq naminə bu çox vacibdir.

Ədalət.-2013.-16 aprel.-S.8.