Xalq şairi Məmməd Araza həsr edilən poçt markası tədavülə buraxılıb

Naxçıvan Muxtar Respublikası Rabitə və İnformasiya Texnologiyaları Nazirliyinin sifarişi ilə Məmməd Arazın 80 illik yubileyinə həsr edilmiş poçt markası hazırlanaraq tədavülə buraxılıb.

Üzərində Məmməd Arazın portreti əks olunmuş marka 20 min tirajla buraxılıb. Markanın nominal dəyəri 20 qəpikdir. Bundan başqa, Məmməd Arazın 80 illik yubileyinə həsr edilmiş suvenir bukleti və "Birinci gün” zərfi də hazırlanıb. Doğma Vətənə bağlılıq, istiqlalçılıq, vətəndaşlıq hisslərinin tərənnümü, fikir dərinliyi və sadəlik, poetik təfəkkürün genişliyi kimi yüksək keyfiyyətlər Məmməd Araz yaradıcılığına uzunömürlülük bəxş etmiş, onun qələminə məxsus əsərlər geniş oxucu kütləsinin rəğbətini qazanıb. Məmməd Arazın əsərləri dünya xalqlarının dillərinə tərcümə edilərək nəşr olunmuş, onun bədii tərcümələri sayəsində isə Azərbaycan oxucusu dünya poeziyasının ən yaxşı nümunələri ilə tanış olmaq imkanı əldə edib. Parlaq istedadı və təkrarolunmaz yaradıcılığı ilə böyük şöhrət qazanan Xalq şairi Məmməd Araz Azərbaycan ədəbiyyatının inkişafındakı xidmətlərinə görə ümummilli lider Heydər Əliyev tərəfindən Azərbaycan Respublikasının "İstiqlal” ordeni ilə təltif olunub, adına "Məmməd Araz” ədəbi mükafatı təsis edilib.

Ədalət.-2013.-7 dekabr.-S.3.