"Məmməd Araz xalqın özü idi" - yubiley gecəsi

Akademik Milli Dram Teatrında xalq şairi Məmməd Arazın dövlət səviyyəli yubiley tədbiri keçirildi.

Adalet.Az xəbər verir ki, böyük şairin 80 illik yübiley gecəsində Mədəniyyət və Turizm naziri Əbülfəz Qarayev, Baş nazirin müavini, xalq yazıçısı Elçin Əfəndiyev, millət vəkilləri Sabir Rüstəmxanlı, Nizami Cəfərov, Fəttah Heydərov, vitse-spiker Ziyafət Əsgərov Qüdrət Həsənquliyev, Fazil Mustafa, Bəxtiyar Əliyev, Eldar İbrahimov Hadı Rəcəbli və Aqil Abbas iştirak ediblər.

Zalda boş yer yox idi. Buna baxmayaraq Məmməd Araz işığına yığışanlar tədbiri ayaq üstə izləyirdilər.

Tədbirdə böyük şairin ailə üzvləri iştirak edirdilər. Çıxış üçün ilk söz Nizami Cəfərova verildi.

Ədəbiyyatşünas M. Araz poeziyasının dərinliyindən söz açaraq onun şeirlərinin orijinal olduğunu bildirdi. Nizami Cəfərov vurğuladı ki, Vətəndən, millətdən, xalqdan çox şairlər yazıb, ancaq Məmməd Araz üslubuna, texnologiyasına və istedadına görə tamamilə orijinal əsərlər yaratmağı bacardı: "Məmməd Araz xalqın sözünü deməyə haqq qazanmışdı. O təpədən dırnağa xalqın özü idi. Xalq Məmməd Araza onun adından danışmağa icazə vermişdi”.

Millət vəkili Fəttah Heydərov da çıxışında Məmməd Araz dühasından danışdı. Şairlə tez-tez təmasda olduğunu xatırladan F.Heydərov Məmməd Arazın bir şair, bir insan kimi nəhəng xarakterə sahib olduğunu dedi: "Mən Məmməd Arazla çox yaxın olmuşam. Onun xatirəsi əbədi olaraq yaddaşıma köçüb. Hər dəfə Nursu kəndinə gedəndə dağlara baxıb bu böyük insanın bir misrasını pıçıldayıram: "Duman salamat qal, dağ salamat qal”. Məmməd Araz bütün dovürlərin şairidir, o həmişə əbədi yaşayacaq".

Yübiley gecəsində ailə adından millət vəkili Aqil Abbas danışdı. Məmməd Araza göstərdikləri qayğıya, ayırdıqları diqqətə görə ulu öndər Heydər Əliyevə və onun davamçısı, indiki prezident İlham Əliyevə minnətdarlığını bildirən Aqil Abbas, Məmməd Arazın xoşbəxt şair olduğunu dedi: "Məmməd Arazın bütün arzuları həyata keçdi. O özünü xoşbəxt şair sayırdı. Məmməd Araz təkcə iki arzusu həyata keçməyib ki, onu da cənab İlham Əliyevin başçılığı ilə bütün xalqımız gerçəkləşdirəcək. Bunun biri Araz şrımı, biri isə Qarabağ. Biz hər iki problemi həll edəcəyik. Bax onda Məmməd Araz daha da rahatlıq tapacaq”.

Tədbirin rəsmi hissəsindən sonra bədi gecə başladı. Tanınmış qiraət ustaları Məmməd Arazın şeirlərini dedilər. Müğənnilər bu şeirlərə bəstələnmiş mahnıları ifa etdilər. İki saatdan artıq davam edən yubiley gecəsi alqışlarla sona çatdı.

Ədalət.-2013.-11 dekabr.-S.3.