ŞİRVANIN AĞDAŞI, AĞ İNCİSİDİR...

İnamlı olmaq səlahiyyəti

Son illərin sosial iqtisadi və mədəni uğurları respublikamızın həyatında ciddi və tarixi inkişafdan xəbər verir. Artıq ən pessimist insanlar da reallıqlarla barışıb bu inkişafı etiraf edirlər. Bütün bunlar isə bizi sevindirir, daha gözəl gələcək üçün ümidlərimizi artırır. İki möhtəşəm Dövlət Proqramının icrası illərində biz əsasən nələrə öyrəşdik? Elektrik enerjisinin, qaz yanacağının müntəzəmliyinə, su təchizatının yaxşıya doğru formalaşmasına, şəhər və qəsəbələrin, rayon mərkəzlərinin tanınmaz dərəcədə müasirləşməsinə, tikinti-quraşdırma işlərinin modernləşməsinə, ən müasir və yaraşıqlı məktəblərin, səhiyyə müəssisələrinin xalqın istifadəsinə verilməsinə, yeni müəssisələrin açılışlarına, aqrar sahənin inkişafına... Çox şeylərə!

Ümummilli lider Heydər Əliyevin müəyyənləşdirdiyi inkişaf strategiyasının Prezident İlham Əliyev tərəfindən qətiyyətlə davam etdirilməsi iqtisadiyyatın bütün sahələrində böyük nailiyyətlərin əldə olunmasını, makroiqtisadi sabitliyin möhkəmləndirilməsini və tarazlı iqtisadi inkişafı təmin etdi.

Vətənə, Xalqa və Prezidentə sədaqət nümunəsi

...Ağdaş rayonu da ölkənin digər bölgələri kimi sürətlə inkişaf etməkdədir. Qədim Ərəş yurdu bu gün ən müasir şəhərlərlə yarışacaq əhval-ruhiyyədə, görkəmdədir. Ağdaş Rayon İcra Hakimiyyətinin başçısı Tofiq İbrahimov əsl təşkilatçılıq və rəhbərlik nümunəsi göstərərək camaatla əl-ələ verib qazanılan uğurların daha da möhkəmlənməsinə çalışır. Zəngin təcrübəyə malik olan T.İbrahimov işgüzarlığı, sadəliyi və səmimiliyi ilə sakinlər arasında böyük nüfuz sahibidir. Təbii ki, cənab Prezidentin də rəhbər işçilərdən ən çox tələb etdiyi elə bu cür mövqe qazanılmasıdır.

Bütün sahələrdə hiss olunan inkişaf sakinlərdə ruh yüksəkliyi yaradır. Ağdaşlılar öz rayonlarını gerçəkdən çox sevir, onun keçmişi və bu günü ilə fəxr edirlər. Ağdaşlılar şəhəri bəzəyən müasir tikililəri, xidmət obyektlərini, olimpiya kompleksini, park və bağları qürurla seyr edirlər. Rayon əhalisi Heydər Əliyev parkını, burada istirahət etməyi çox sevirlər.

Qədim Ərəş yurdu

Əhalisinin sayı 100 min nəfəri ötmüş rayonlardan olan Ağdaşdan söhbət açarkən onun keçmişinə də qısa bir ekskurs etmək zərurəti yaranır. Tarixi keçmişimiz uzun illər sovet ideologiyası çərçivəsində öyrənildiyinə və araşdırıldığına görə Azərbaycan ərazisindəki bir çox yerlər və baş verən hadisələr düzgün istiqamətini itirməli olmuşdu. Məsələn, son dövrlərədək qədim Ərəş sultanlığı və Ərəş şəhəri haqqında tarixçilərdən başqa məhdud sayda insanın məlumatı ola bilərdi. Yəni indi müasir Ağdaş rayonunun orta əsrlərdə Səfəvi-Osmanlı müharibələri zamanı dağılıb əzəmətini itirən, sonralar Evliya Çələbi, İsgəndər Münşi, Antoni Cekinson, Korneli de Bruin və başqalarının məlumatlarında xatırlanan Ərəş yurdunun adını yaşatmağa iddialı olması təəccüb doğurmamalıdır. Tariximiz reallıqlar üzərində yeni araşdırmalarla təstiqlənməlidir. Söhbət konkret olaraq Ağdaş-Ərəş məsələsindən gedirsə, varislik burada ərazinin, nəsildən-nəsilə ötürülən ənənələrin və digər faktların əsasında ciddi məna daşıyır və özünü doğruldur.

Uğur strategiyası: il sona çatır

İndi yenidən qayıdaq Ərəş yurdunun bu günlərinə. Söhbət açdığımız kimi, rayonda bütün istiqamətlər üzrə inkişaf öz axarı ilə davam etməkdədir. 2013-cü il də sona çatmaq üzrədir. İl yekunlaşmamış biz hələ ötən doqquz ayın statistikasına nəzər yetirəndə xeyli işlər görüldüyünün şahidi oluruq. Eyni zamanda ilin daha böyük uğurlarla başa vurulacağına, üzümüzə gələn 2014-cü ildə bir çox yeniliklərin reallaşacağına inanırıq.

İnkişafın dinamikliyi

2013-cü Ağdaş rayonunda da sosial-iqtisadi inkişafa nail olunması sahəsində mühüm tədbirlər görülmüşdür. Bu dövrdə abadlıq-quruculuq sahəsində tədbirlərin həyata keçirilməsi davam etdirilmiş və əhalinin kommunal xidmətlərlə normal təmin olunması sahəsində məqsədyönlü işlər görülmüş, Ağdaş şəhərində yeni inzibati mərkəzin yaradılması, orada Heydər Əliyev Mərkəzinin, "Bayraq" meydanının, rayon İcra Hakimiyyəti və Yeni Azərbaycan Partiyası Ağdaş rayon təşkilatı üçün inzibati binaların, eləcə də Yanğından Mühafizə idarəsi üçün yeni binanın tikinti işləri davam etmişdir. Eyni zamanda yeni yaradılmış inzibati mərkəzin yaxınlığında bütün yardımçı və xidmət sahələri olan yeni məscid binasının tikintisinə başlanılmış və hazırda tikinti işləri davam edir.

Möhtərəm Prezidentimiz cənab İlham Əliyevin 2012-ci ilin dekabr ayında təsdiq etdiyi Ağdaş şəhərinin ərazisinin genişləndirilməsi barədə qanunauyğun olaraq şəhər ərazisinə daxil edilən yaşayış məntəqələrinin də normal kommunal xidmətlərlə təmin edilməsi üçün lazımi tədbirlər görülməkdədir.

Rayonda 20 minə yaxın əhalinin və 12 yaşayış məntəqəsinin istifadə etdiyi 34 km uzunluğunda Ləki-Pirəzə-Xınaxlı kənd avtomobil yolunun əsaslı təmirinə başlanmış və yolun 18.1 km hissəsinə asfalt vurulmuş, digər hissəsində isə işlər davam etdirilir.

(ardı gələn sayımızda)

Məzahir ƏHMƏDOĞLU

ədalət.-2013.-17 dekabr.-S.7.