Məni bağışlama, ürək
Ramiz Qusarçaylı - 55
Qarlı sətirlər
Ağ yaza oxşayır qışın gəlişi,
ağaclar bu səhər ağ yarpaqlayır.
Baxıram,
baxışım qara ilişir,
dönürəm, gözümü işıq bağlayır ...
Zirvələr əl çəkir bulud saçına,
dağılır üzünə naz çiçəkləri.
Şəlalə çevrilir qar ağacına
asılır qayadan buz çiçəkləri.
Açılır göylərin şimşək sapandı,
ayı hikkəsindən qarı kötəklər.
Qalıb qar altında ...
meşəçi andı, ?
qalıb qar altında qara kötüklər ...
Göyərməz göy çənə
göyəm kolu da,
qar dolu hər
yuva ağ cama bənzər.
Qırov
qırmalayar qırqovulu
da,
çırpar qanadından
Günəşi
zər-zər ...
Qovur sahilindən
çayın soyuğu,
lilparda lillənən
quşun səsini.
Dinləyə bilmirəm
qaratoyuğu
sağsağan qaçırır
zənguləsini ...
Ağ yuxu içində itir bulaqlar,
indi də sözünü
ağ sükut deyir;
Çıxdınız dumandan, çəndən, a dağlar,
qışınız mübarək, qarınız xeyir !..
Məni bağışlama, ürək
Hələ səndən doymamışam,
Məni bağışlama,
ürək.
Səndə ürək
qoymamışam
Məni bağışlama,
ürək.
Şər törəyən,
xeyir barsız,
Dünyadı da...
etibarsız..
Yaşayıram arsız-arsız,
Məni bağışlama,
ürək.
Çadır-çadır yurd göyərtdim,
Qəbir-qəbir ad göyərtdim,
Öz içimdə
yad göyərtdim
Məni bağışlama,
ürək.
Gah Kərkiyəm, gah Vediyəm,
Gah Daşaltı şəhidiyəm,
Neyniyim ki, yoxdu yiyəm
Məni bağışlama,
ürək.
Ömür sözdə
əriyən şam,
Suyun üstdə
od olmuşam.
Mən özümdən
qovulmuşam
Məni bağışlama,
ürək.
Kürək oldum kürəksizə,
Gərək oldum gərəksizə,
Ürək verdim ürəksizə
Məni bağışlama,
ürək.
Bağrın başı didim-didim,
Səni qoyub hara gedim.
Dolanıram yetim-yetim
Məni bağışlama,
ürək.
Gül küləyi
bağışlasa,
Göy mələyi bağışlasa,
Daş lələyi bağışlasa
Məni bağışlama, ürək,
Ürək, məni
bağışlama...
Güldürür
İki üstəgəl iki,
Cəm adamı
güldürür.
Yaltağın gözündəki
Nəm adamı
güldürür.
Ər umma hər
oğuldan,
Cəng göyərmir
nağıldan,
Ağıl verir ağıldan
Kəm, - adamı
güldürür.
Söz sinəsi
dağlıdı,
Yazı
göyə
bağlıdı,
Həm adamı ağladır
Həm adamı
güldürür.
Bədəndə ruh, ruhda qəm,
Gülüşdə ah, ahda qəm,
Nökərdə kef, şahda qəm
Qəm adamı
güldürür.
Mənlik deyil
Bu səngər haqq səngəridi,
Zəhmində çox cəng əridi,
Ləngərim söz ləngəridi
Yüngül hava mənlik
deyil.
Öz göyüm var,
öz mələyim,
Öz xəttim
var,
öz lələyim,
Öz məzarım,
öz bələyim
Haram yuva mənlik
deyil.
Davam nə
can davasıdı,
Nə də
yorğan davasıdı,
Azərbaycan davasıdı,-
Ayrı dava mənlik
deyil.
Hava
Əllərin yaman üşüyür,
Cibində hava necədir?!
Vətən adlı bu quyunun
Dibində hava necədir?!
Çox
da dildə gəzir adın,
Yesirisən bir manatın...
Sənə gülən
deputatın
"Cip"ində
hava necədir?!
Palanı
yox palançının,
Evi yanmır yalançının...
Mələk donlu talançının
Küpündə hava necədir?!
Qurdalama
hər
zadı çox,
Hər zadın da var
zadı çox...
Arvadının arvadı çox
Kəbində hava necədir?!
Yad toxum yava havası,
Dərmanı
"toba" havası...
Xırmanda yaba havası
Səpində hava necədir?!
Gör nələrlə dolub beyin,
Qandı
sözə
içirdiyin...
Boğazına keçirdiyin
İpində hava necədir?!
Bu qurban olduğum Vətən
Düşməndən dərs
yükü alıb,
Dərdinə daldığım Vətən...
Qarabağda "2" alıb,
Sinifdə qaldığım Vətən...
Oğul-oğul çiçəkləndi,
Şəhid-şəhid ləçəkləndi,
Xocalıda çilikləndi
Əlimdən saldığım Vətən...
Gedir, yad əldə can gedir,
Can-can Azərbaycan
gedir,
Gör kimlərə qurban gedir
Bu qurban olduğum Vətən....
Dünya
Nə əksən erməni
çıxır,
Alağına şükür, Dünya.
O da mənə qənim
çıxır
Dolağına şükür, Dünya.
Bir səsdi,
bir hənir,-hamı,
Gündə bir boy enir hamı,
Bir-birini
minir hamı
Ulağına şükür, Dünya.
Toyuq ağlı, quş biliyi,
Kürsüdə tuğyan eləyir,
İt də
yemir kişiliyi
Yalağına şükür, Dünya.
Papağı yox sanır arvad,
Kişinin nöqsanı arvad,
Yüzündən doxsanı arvad...
Balağına şükür, Dünya.
Alim özünü aldadır,
Şair
sözünü aldadır,
Ata qızını aldadır
Çalağına şükür, Dünya.
Adam-adam aşınır Yer,
Qiyamətə daşınır Yer,
Daha Göydən
boşanır Yer
Talağına şükür, Dünya.
Pəri
İlham
pərin
gələndə mənə də bir şeir yazarsan,- demişdi Bəhram.Hər məni
görəndə:-Şair,pəri
gəlmədi? - deyə
soruşurdu. Bu günlərdə Bəhram müqəddəs Həcc
ziyarətindən qayıtdı və...məni
görən
kimi yenə həmin sualı verdi,
mən
cavabında bu şeiri oxudum
Gözləyirəm nə
vaxtdı,
Pəri gəlmir, ay Hacı.
Bir misranı yazıram,-
Biri gəlmir, ay Hacı.
Boy qalmayıb boylarda,
Toy qalmayıb toylarda,
Ölü axır çaylar
da
Diri gəlmir, ay Hacı.
Nə qılınc şək, nə
qəmə,
Günah
yuyulmur demə...
Ha dartıram əlimə
Dəri gəlmir, ay Hacı.
Dərddi dərdin
ilhamı,
Dərddən keflənib
hamı,
Xilasına imamı
Piri gəlmir, ay Hacı.
Getdi əldən o yerlər,
O ilahi dəyərlər.
Yeri gəlsə...deyirlər,
Yeri gəlmir?.. ay Hacı.
Dərinlər üzdən
gedir,
Dayazlar dizdən
gedir,
Nə gedir bizdən gedir
Bəri gəlmir, ay Hacı.
Odam, torpağam, suyam,
Püskürür daşım, qayam,
Mən bir söz ovundayam
Şeri gəlmir,
ay Hacı.
Kəs, bu şairin də
dadına baxaq
Kəs, bu şairin də
dadına baxaq,
Baxaq, sözlərində diş yeri varmı...
Yoxuşlar öpübmü ayaqlarını,
Baxaq, dizlərində daş yeri varmı...
Axıb
şumlayırmı yanaqlarını,
Baxaq, gözlərində yaş yeri varmı...
Aldada bilirmi uşaqlarını,
Baxaq, bir yavanlıq iş yeri varmı...
Sezibmi vicdanın qınaqlarını
Baxaq, izlərində çaş yeri varmı...
Kəs, bu şairin də
dadına baxaq,
Baxaq, bir şeirinin içində
nə
var?!.
Varsa, nələr çəkir
orda Qarabağ,
Baxaq, Kəlbəcərdə,
Laçında nə
var?!.
Qəm qatıb, qəm səpib könül varına,
Şuşa həsrətindən yazırmı yenə...
Boylanıb nazirin villalarına
Qafiyə gəzirmi
vətən şeirinə...
Yüz dəfə ölsə
də
şahlar, əmirlər,
Şairlər
bir dəfə
ölməyə güc saxlayırlar.
Indi şairləri
güllələmirlər,
Indi şairləri
ac saxlayırlar...
Kəs, bu şairin də
dadına baxaq,
Baxaq, bir mədhiyyə markası varmı...
Cildində sifariş birkası
varmı...
Baxaq, məhmiz
çəkib
ilham atına
Ötürmü bu yerin qoyunlarını...
Zəng vurub çoxüzlü deputatına
Üzünə vururmu oyunlarını...
Kəs, bu şairin də
dadına baxaq,
Baxaq, həmrəyliyi varmı evində,
Bir kişi bəyliyi varmı evində,
Yenə siyasətdə qurdalanırmı,
Dəyişə bilibmi öz həyatını...
Ikinci arvadı şeir qanırmı
Sevdirə bilibmi külliyyatını...
Kəs, bu şairin də
dadına baxaq,
Baxaq, bir adamlıq dəyəri varmı...
Baxaq, bir udumluq xeyiri
varmı...
Bir misra edamlıq şeiri varmı...
Çəkir
Şeytana bax millətin
Kitabına üz çəkir.
Kefi kökdü qeybətin
Lal da laldan söz çəkir.
Dərd göyərir, tağlanır,
Xalq acından buğlanır
Gəlin köçən oğlanın
Qeyrətini qız çəkir ?!.
Vurun, bölün min kərə,
Min oyundu, min bərə,
Gəl qayıdaq Minbərə
Gör kim kimi
tez çəkir.
Hər dodaq bir ah yazır,
Qul düşünür şah
yazır,
Nə yazır Allah yazır
Kim nə
çəkir
düz çəkir.
Ədalət.-2013.-21
dekabr.-S.14.