İllərin izi

Biləsuvar rayonu 2012-ci ili də uğurla başa vurdu

(əvvəli ötən sayımızda)

Bol məhsulun yolu zəhmətdən keçir

Qeyd etdiyimiz kimi Biləsuvar rayonunda yaşayan sakinlər torpağa bağlı insanlardır. Məhz onların gərgin əməklərinin nəticəsində ötən ildə də aqrar sahədə xeyli uğurlar qazanılmışdır. Ümumi məhsul istehsalının həcmi artmış, məhsuldarlıq yüksəlmiş, nəticədə insanların həyat səviyyəsi xeyli yaxşılaşmışdır. Ötən il rayonda kənd təsərrüfatı məhsulunun həcmi 84,5 milyon manata çatdırılmışdır. Ümumilikdə 60,5 milyon ton taxıl, 11,5 min ton pambıq əldə edilmişdir. 27 min ton süd, diri çəkidə 5,3 min ton ət məhsulu istehsal olunmuşdur.

Torpaqların meliorativ vəziyyətini yaxşılaşdırmaq üçün mövcud kollektor-drenaj sistemlərinin təmiri və lildən təmizlənməsindən ötrü 2012-2014-cü illər üzrə qrafik hazırlanmışdır. Hər il olduğu kimi 2012-ci ildə də 238,7 kilometr kollektor-drenajlar lildən təmizlənmişdir. Torpaqları daha yaxşı suvarmaq üçün 16 ədəd su nasosları, 21 ədəd dizel mühərriki, 6 ədəd elektrik mühərriki, 3 ədəd elektrik transformatorları əsaslı təmir edilmişdir.

Biləsuvarda tərəvəzçiliyi inkişaf etdirmək üçün İtaliya texnologiyası əsasında illik gücü 5500 ton olun istixananın tikintisi son mərhələdədir. 2000 ton tərəvəzin saxlanması üçün soyuducu anbar işə düşdükdən sonra burda 70 nəfər daimi işlə təmin ediləcək.

Təhsil daim gündəmdədir

Biləsuvar rayon təhsilinin son vaxtlar əldə edilmiş bir sıra uğurlarından bəhs etməyimiz təsadüfi deyil. Çünki bu uğurların qazanılması üçün xeyli zəhmət çəkilmişdir. Rayondakı Texniki Peşə məktəbinin direktoru Elşən Seyfullayev də bu barədə həvəslə danışdı. Qeyd etdi ki, məktəblərin maddi-texniki bazalarının möhkəmləndirilməsinin, təhsil müəssisələrinin müasir tələblər əsasında qurulmasının nəticəsidir ki, son illər rayonda 9 yeni məktəb binası inşa edilmişdir. 4 məktəb binası isə əsaslı şəkildə təmir olunmuşdur. Hazırda 1176 yerlik Ağalıkənd kənd orta məktəbinin təmiri də yüksək keyfiyyətlə aparılır. Məktəblərimizin təmiri və tikintisini daha yüksək keyfiyyətlə aparmaq üçün 2013-cü ildə görəcəyimiz işlər haqqında layihələr nəzərdə tutulmuşdur. Qərara almışıq ki, Xırmandalı kənd 2 saylı, Amankənd kənd orta məktəbləri üçün yeni binaların tikintisini aparaq.

Ötən ilki məzunlarımızdan qəbul imtahanlarında 4 nəfəri 600-dən, 26 nəfəri 500-dən çox bal toplaya bildi.

Azərbaycanımızın Milli Qəhrəmanı Mübariz İbrahimovun adını daşıyan lisey-məktəbin uğurları bizi daha çox sevindirir. Məktəbin ilk buraxılışı olan 23 nəfər məzunun hamısı yüksək bal toplayaraq tələbə adını qazanmışlar. Bu uğurlarda, daha doğrusu ali məktəblərə qəbulda şəhər 1, 2, 4 saylı, Bəydili, Aşağı Cürəli, Xırmandalı kənd 1 saylı, Yuxarı Cürəli kənd tam orta məktəblərinin əməyi daha çoxdur. Çalışacağıq ki, uğurlarımız daha çox olsun.

Sonda Elşən müəllim direktoru olduğu Texniki Peşə məktəbindən də ürəklə danışdı.

Sağlam gənclik sağlam gələcəkdir

Sabahın təməli bu gün qoyulur. Bu həmişə belə olacaq, çünki zamanın yönü gələcəyidir. Biləsuvar rayonunda gəncliyin formalaşmasına, inkişaf etməsinə çox geniş meydan verilir. Ona görə də burdakı Olimpiya İdman Kompleksindən, 3000 yerlik stadiondan, 150 sadə idman qurğusundan biləsuvarlı gənclər daha səmərəli istifadə edirlər. Ölkə Prezidenti İlham Əliyevin 2012-ci ili "İdman ili" elan etməsi rayondakı idmançıları da xeyli sevindirmiş və müxtəlif uğurlara aparmışdır.

Yeni Azərbaycan Partiyası Biləsuvar rayon Gənclər Təşkilatının sədri Kamil Qurbanov bu barədə bir qədər də ətraflı məlumat verdi:

- Sabahımızın layiqli davamçıları olan gənclərimizin kamil yetişməsi, intellekt səviyyələrinin yüksəldilməsi üçün dayanmadan iş aparılır. Onların ideya-siyasi, hərbi vətənpərvərlik tərbiyəsinin yüksəldilməsi günün vacib tələblərindəndir. "Azərbaycan Gəncliyi 2011-2015-ci illərdə" Dövlət Proqramı əsasında bu ilin yanvarında elektron səsvermədə biləsuvarlı gənclər yüksək fəallıq göstərərək 2013-cü ilin "Gənclər Paytaxtı" müsabiqəsində qalib oldular. Bu parlaq qələbə bizi gənclərlə daha çox təmasda olmağa sövq edir. Eyni zamanda bu həm də bizim üzərimizə çox böyük məsuliyyət qoyur.

Biləsuvarlı gənclərə Mübariz İbrahimov ruhu aşılayan Gənclər Təşkilatının sədrinə biz də uğurlar arzulayırıq.

Bir sahibkarın əlavəsi

Biləsuvarda olarkən müxtəlif peşə sahibləri ilə bərabər rayonda fəaliyyət göstərən sahibkar Şakir Soltanovla da həmsöhbət ola bildik. Fermer təsərrüfatı ilə məşğul olan Şakir Soltanov öz işləri ilə bağlı xeyli məlumatdan sonra aşağıdakıları da qeyd etməyimizi xahiş etdi:

- Rayonumuzda sahibkarlığıın inkişafına xüsusi fikir verildiyindən bu sahədə irəliləyişimiz daha çoxdur. Bu gün bu barədə nəsə demək doğrudan artıqdır. Fermer olsam da, mən bu gün rayonumuzun mavi qaz təsərrüfatından qısa da olsa bəhs edəcəyəm. Bu gün Biləsuvardakı 26 yaşayış məntəqəsindən 15-i təbii qazla təmin edilmişdir. Burdakı əhalinin sayı isə 63000 nəfərə yaxındır. Ötən il rayonda 120,8 kilometr uzunluğunda qaz xətti çəkilib, 9 ədəd qaz tənzimləmə məntəqəsi quraşdırılıb. Ovçudərə, Təzəkənd, Yuxarı və Aşağı Cürəli, Amankənd, Ağalıkənd kimi yaşayış massivlərində, Biləsuvar şəhərinin "Təyyarə Meydanı" adlanan yaşayış məntəqəsində 22446 nəfər əhali təbii qaz ala bilib. Yəqin ki, çox yaxın vaxtlarda rayonun bütün ərazisində mavi qaz olacaq.

Sahibkar sonda əlavə elədi ki, insanların sosial şəraitləri yaxşı olmalıdır ki, onlar yaxşı işləsin.

Səxavət Məmmədli

Ədalət.- 2013.- 13 fevral.- S.7.