"ARAMIZDA QALSIN"IN BAŞ QƏHRƏMANI

"Hədəf" rubrikası İntiqam Valehoğlunun təqdimatında

İkinci "Hədəf"imiz tanınmış aktyor Qurban Məsimovdur. Uzun müddət efirlərin ulduzuna çevrilən bu aktyor nədənsə indi mədəniyyət gündəmində deyil. Aktyorun sənət yeniliklərini və baş rol oynadığı "Aramızda qalsın" serialından uzaqlaşma səbəblərini ilk dəfə biləcəksiniz.

- Qurban müəllim, hazırda nə işlə məşğulsunuz?

- Gənc Tamaşaçılar Teatrında "Qaraca qız" tamaşasına quruluşçu rəssam kimi dəvət almışam. Tamaşanın quruluşçu rejissoru Vaqif Əsədovdur. İşlər yekun mərhələsindədir. Hələlik yeni çəkilişlərim yoxdur. Bir beynəlxalq layihə ilə danışıqlarımız gedir. İstedadlı gənclərin müxtəlif seriallara yönlənməsinə yardımçı olmağa çalışıram.

- Bir sözlə, hələlik aktyor kimi fəaliyyətiniz yoxdur...

-Bəli. Bir də "Simsar" teatrında gənc aktyorlarla məşğələlər keçirirəm.

- "Aramızda qalsın" serialından ayrılmağınızın səbəbi hələ də qaranlıqdır.

- Yeni müqavilə şərtlərini qəbul etmədim. Yəni reklamlara ödənişsiz çəkilməkdən imtina etdim.

- Doğrusu mən bu səbəbi çoxdan bilirdim. Amma sizin etirafınız daha maraqlı idi.

- Serial bazarında biz ən zəifimiz qədər güclüyük. Təbii ki, uğurlu aktyor ansamblı serialın uğurunun yarısıdır.

- İndi həmin seriala baxırsınız?

- Öncə də "Aramızda Qalsın"a baxmırdım. Yalnız maraqlı quruluş olanda onun montajdan sonra necə təqdim olunacağını izləyirdim. İndi də ara-sıra imkan olanda hadisələrin gedişinə və aktyorların oyununa baxıram. Amma sırf informatik. Əvvəl isə serial efirə gedəndə çəkilişdə olanda demək olar ki, heç baxa bilmirdim.

- Sizin həmin serialda rol aldığınız vaxtla indikinin fərqi varmı?

- Düşünürəm ki, bunu özünüz daha yaxşı bilirsiniz. Hər halda "Aramızda qalsın" serialının uğurlu bir layihə olmasını istəyirəm və orda çalışan hər kəsə uğurlar diləyirəm.

- Bu sualı əksər peşəkar həmsöhbətlərimə verirəm. Niyə bizim serialların çoxu uğursuz alınır?

- Bu mövzuda günlərlə danışmaq olar. Bu, tamamilə yeni sektordur. Peşəkarların yetişməsinə zaman lazımdır. Peşəkar texniki qrup, aktyorlar, çəkiliş vərdişi gərəkdir uğurlu serial üçün. Zamanla düzələcək yəqin.

- Qayıdaq reklam məsələsinə. Serialın sponsorunun reklamına çəkilmək üçün nə qədər qonorar tələb etmişdiniz?

- Bu, kommersiya sirridir (gülür).

- Bu kommersiya sirri nədirsə, ancaq Azərbaycan üçün keçərlidir.

- Ola bilər.

- Əkrəm Əylisli olayından xəbəriniz var?

- Əsərini oxumamışam, amma baş verənlərdən təəssüflənirəm.

- Niyə hansısa teatrda aktyor kimi fəaliyət göstərmirsiniz?

- İxtisasım rejissorluqdur (gülümsəyir).

- Amma hər kəs sizi aktyor kimi tanıyır

- Razıyam. Düşündüm ki, aktyorluğu da bilməliyəm. Kiçik rejissor işlərim indi də Pantomim teatrında oynanılır və dünyanı gəzir. Ayrı-ayrı festivallarda tamaşalar qurmuşam. Həmçinin şəxsi sifarişlərlə filmlərim, dublyaj işlərim olub.

- Efirlərdən uzaq düşməklə populyarlığınızı itirməkdən qorxmursunuz?

- Qorxu? Populyarlıq sənətkarlıq deyil. Öz işini layiqincə görməyə çalışdıqda, kimə lazımsansa və nəyə gərəksənsə səni tapacaqlar.

- Populyarlıqdan söz düşmüşkən, "Bu şəhərdə"yə baxırsınız?

- Efirdə gedəndə baxıram.

- Bəyənirsiniz?

- O üçlüyə böyük hörmətim var, güclərinə bələdəm. Amma bazar tələbinə uyğun olaraq "Bu şəhərdə" topla sərçə vurmağa məcburdur.

- Sizcə sərçəni vura bilirlər?

- Hədəfə dəyirlər.

- Deməli, bu onların gücü deyil?

- Onlar daha güclüdürlər...

- Nə vaxtsa qadın paltarında səhnəyə çıxmısınız?

- (düşünür) Olub. Məşhur gürcü rejissoru Robert Sturuanın tələbəsi olduğum vaxt onun "Hamletsiz Hamlet adlı layihəsində bir neçə üslubda oynamalı idim.

- Yəni burda ayıb sayılacaq nəsə yoxdur.

- Yoxdur. Amma aktyor da elə oynamalıdır ki, tamaşaçıda ikrah hissi oyatmasın.

Mənə bir filmdə oynamaq təklif edildi. Orda qadına çevrilməliydim və elə oynamalıydım ki, tamaşaçı məni qadın zənn etsin. Lap məşhur "Tutsi" filmindəki kimi (gülür)... Amma imtina etdim.

- Niyə?

- Gördüm ki, xasiyyətimlə təzad təşkil edir. Bu rola başqa aktyoru təklif elədim və oyun üslubunda da həmkarıma kömək elədim. Nəticə həmin aktyordan və filmin rejissorundan asılıdır.

- Dövlət seriallara vəsait ayırır, siz də rejissorsunuz. Bəlkə özünüzü sınayasınız?

- Dəvət etsələr, düşünmək olar. Amma indi serial çəkənlərin çətinliklərini başa düşürəm.

- Günlərin birində sizi türk seriallarında görə bilərikmi?

- Türkiyənin o qədər aktyoru var ki. Onları yerbəyer edirlər, bizə ehtiyacları yoxdur. Onlarda bir aktyor serialdan çıxan kimi digər serial onu alır. Bizdə isə seriala yeni sifət axtarırlar çox vaxt. Ona görə də çəkilənlərin əksəriyyəti aktyor deyil, sifətlərdir. İstərdim ki, təsadüfən seriala düşənlərdən maraqlı aktyorlar çıxsın. Amma dünyada aktyor təhsili olmayan, gözəl görünüşlü modellər də aktyor kurslarında təhsil alırlar.

- Amma belə bir deyim var ki, yaxşı aktyora hər zaman tələbat var. Sizcə rəqabətə davam gətirə bilməzsiniz?

- "Yaxşı aktyora hər zaman tələbat var" deyiminə inanmıram. Burda rejissor və prodüser konsepsiyası daha çox rol oynayır. Rəqabətə gəlincə, bir rola bir neçə nəfəri yoxlayırlarsa, yenə də güclü seçilməlidir.

- Bundan əvvəl hansısa serialda çəkilmisiniz?

- Çəkildiyim ilk serial Ramiz Fətəliyevin ekranlaşdırdığı "Moment istini"da epizod olub. Rauf rolunu oynamışam.

Sonra Ramiz Fətəliyevin Rusiyanın sifarişi ilə çəkdiyi "Qraf Krestovski"də cangüdən Tayr obrazım olub. Serialda sonuncu işim isə "Aramızda qalsın" da baş rol - Mehman olub.

- Yeni təkliflər var?

- Hər dəvətlə də razılaşmaq olmaz.

- Deməli, dəvətlər var, razılaşmırsınız? Burda da maddi şərtlər qane etmir?

- Hələ ki dəvət yoxdur (gülümsəyir).

- Son olaraq sizi sevənlər Qurban Məsimovdan basqa hansı yenilikləri gözləsinlər?

- Məni sevən xanımım və əzizlərimdir. Yaradıcılığımda aldığım ləzzətlə bölüşdüklərim isə heç nə gözləməsinlər. Maraqlı nəsə baş verəndə onlara sürpriz olsun. Valeh etməyi uşaqlıqdan sevirəm.

Məsimov Qurban

Ədalət.-2013.-26 fevral.-S.8.