Dağların füsunkar gözəli Lerik

(Əvvəli ötən sayımızda)

Lerik-Qosmaliyan-Kəlvəz avtomobil yolunun tikintisi davam etdirilir. Artıq bu yolun 18 kilometri hazırdır. Bu tikintidə mühəndis işləyən Əlimərdan Talıbovun dediklərindən:

-Dağlıq ərazidə yol çəkmək nə qədər çətindirsə, bu yolu saxlamaq ondan da çətindir. Qədərindən artıq yüklənmiş iri yük maşınları, dağ selləri yolların əsas qənimidir. Kiçik bir dağıntıdan sonra yola düşən yağışlar onun ömrünü çox sürətlə qısaldır.

Yol mühəndisi sonda onu da qeyd elədi ki, çox yaxın vaxtlarda onlar öz işlərini yüksək keyfiyyətlə axıra çatdıracaqlar.

Hər gün bir az da gözəlləşən rayon

Burda öz rayonlarının uğurları ilə sevinən ziyalılar çoxdur. Onlardan biri də Heydər Əliyev Mərkəzinin direktoru Hüsaməddin Abbasovdur. 2010-cu il 25 iyunda açılışı olan Mərkəzdə bu gün 138 şəkil və 49 sənədin surəti qorunur. İxtisasca jurnalist olan Hüsaməddin müəllim Lerikdə aparılan abadlıq-quruculuq işləri barədə fərəhlə danışdı:

-Son illərdə Lerikdə nə qədər inzibati və sosial binaların tikintisinin aparıldığını demək çətindir. Elə rayon mərkəzindəki bu kiçik parkdakı aura çox şeydən xəbər verir. Burdakı Heydər Əliyevin heykəli, dalğalanan üçrəngli bayrağımız, Lerik rayon İcra Hakimiyyətinin yeni inzibati binası, təmir edilmiş Rayon Mərkəzi Xəstəxanası, elə bu Mərkəzin özü Lerikə bir yaraşıqdır. Uzunömürlülər muzeyinin, Dövlət Sosial Müdafiə Fondunun rayon şöbəsinin, rayon prokurorluğunun, məhkəmənin yeni binaları dediklərimə sübutdur. Lerikdə 18 ümumtəhsil məktəbi əsaslı təmir edilmiş, 7 məktəb binası isə inşa olunmuşdur. Daha 8 məktəbimizdə tikinti davam etdirilir. Nazirlər Kabinetinin tapşırığına əsasən rayondakı bütün məktəblərə, uşaq bağçalarına baxış keçirilmişdir. Sonda mütəxəssislər akt tərtib edib müvafiq qurumlara vermişlər ki, Lerikdəki 39 məktəbdə, 10 uşaq bağçasında tikintinin aparılması zəruridir. Daha 17 məktəbdə və 3 uşaq bağçasında əsaslı təmir aparılmalıdır. 2013-cü ildə Lerikdə daha 5 məktəbin tikintisi, 2 məktəbin əsaslı təmir edilməsi üçün texniki işlər həyata keçirilir. Bu işlərdə İcra Hakimiyyətinin başçısı Rövşən Bağırovun xidməti əvəzsizdir.

Bir sözlə, indi Lerikdə yaşamaq daha maraqlıdır.

Rayonun aqrar uğurları

Rayonda ən inkişaf etmiş sahələrdən biri də heyvandarlıqdır. Yeni cins mal-qaranın yetişdirilməsi ilə əlaqədar 2009-2013-cü illərdə bir sıra tədbirlər həyata keçirilmiş, mal-qaranın cins tərkibinin dəyişdirilməsi sayəsində uğurlara nail olunmuşdur. Həyata keçirilmiş tədbirlər nəticəsində iribuynuzlu mal-qaranın, qoyun və keçilərin baş sayı ötən ilin müvafiq dövrünə nisbətən xeyli artmışdır. Ət, süd, yun və yumurta istehsalı da çoxalmışdır.

Rayonun bütün təsərrüfatlarında yazlıq bitkilərin əkini müvəffəqiyyətlə aparılmışdır. Ötən ilin müvafiq dövrünə nisbətən 340 hektar çox əkin işi həyata keçirilmişdir. Əkilmiş yazlıq bitkilərin 713 hektarı kartof, 198 hektarı tərəvəz, 62 hektarı dənli və dənli-paxlalı bitkilər təşkil edir. Leriklilər yaxın günlərdə 1300 hektar taxıl sahəsinin biçilməsini uğurla həyata keçirəcəklər.

Lerikdə sahibkarlığın inkişafı da rayon iqtisadiyyatına xeyli təsir göstərir. Rayonun Piran kəndi yaxınlığında iş adamı tərəfindən ət, yumurta, quş istehsalı ilə məşğul olacaq broyler fabrikinin tikintisinə 2011-ci ilin mart ayında başlanılmışdır. İndi burda son tamamlama işləri həyata keçirilir. Müəssisənin ümumi dəyəri ilkin hesablamalara görə 18 milyon manatdır. Müəssisənin tikintisi başa çatdıqdan sonra burda yüzlərlə lerikli işlə təmin olunacaqdır.

Mavi alov ucqar dağ kəndlərində

Uzun illər leriklilər yanacağa olan tələbatlarını meşənin hesabına həyata keçirmişlər. İndi onlar bu qayğıdan tam azad olmaq ərəfəsindədirlər.

2006-cı ildə Lerik şəhəri, 2011-2013-cü illərdə isə daha 21 yaşayış məntəqəsi mavi yanacaqla təmin edilmişdir. İndi rayonun daha 24 kəndinə qaz xətlərinin çəkilişi davam etdirilir. Masallı-Lerik yüksək təzyiqli qaz xətti üzərində yerləşən Kirəvud, Əliabad, Nücü, Şingədolan, Nüvədi, Noda inzibati ərazi vahidlərində yerləşən 34 yaşayış məntəqəsində qaz xətlərinin çəkilməsi üçün "Azəriqaz" İstehsalat Birliyinə müraciət edilmişdir. Yəqin ki, yaxın vaxtlarda bütün bunlar öz həllini tapacaqdır.

2013-cü ilin iyun ayının son günlərində isə rayon mərkəzindən kifayət qədər uzaqda yerləşən Qosmaliyan kəndində mavi qazın verilməsi üçün təntənəli yığıncaq keçirilmişdir. Bu kəndlə bərabər qonşu Totani, Hiveri, Nuravud kəndlərində də sakinlər bu sevinci yaşamışlar. Azərbaycan Respublikası Dövlət Neft Şirkətinin prezidenti Rövnəq Abdullayev, vitse-prezident Xoşbəxt Yusifzadə, "Azəriqaz" İstehsalat Birliyinin direktoru Əkbər Hacıyev, Lerikdə millət vəkili seçilən İqbal Məmmədov bu yığıncağın iştirakçıları olmuşdur. Ucqar dağ kəndlərində mavi qaz çəkilişləri davam etdirilir. Yəqin ki, yaxın vaxtlarda bu leriklilər bu təbii nemətdən istifadə edə biləcəklər.

Səxavət Məmmədli

Ədalət.- 2013.- 6 iyul.- S. 4.