O YERDƏ Kİ, İNAM VAR...

...İnsan dünyaya gəldiyi gündən böyük arzularla yaşayır. O böyük arzular həyata keçdikcə, bax onda o insan mənən daha da vüqarlı olur. Təbii ki, arzuların həyata keçməsi və çin olması üçün əziyyət çəkmək, tər tökmək və işləmək lazımdır. O yerdə ki, inasn qolunu çırmayıb böyük işlər görür, layihələr həyata keçirir, təbii ki, gec-tez onun əməlləri xariqələr yaradır...

GÖZƏL ŞƏHƏR İMİŞLİ

Bu şəhərə dəfələrlə yolum düşüb. Amma heç vaxt bu dəfə gördüyüm, gəzdiyim və insanları ilə ünsiyyətdə olduğum İmişlini yaddan çıxarmayacağam. Ən azından ona görə ki, hər addımında bir yenilik, hər işində bir uğur var. Uğur qazanmaq isə elə asan deyil. Əlbəttə, İmişlidə regionların sosial-iqtisadi inkişafına dair Dövlət Proqramına uyğun olaraq möhtəşəm layihələrin həyata keçirilməsi elə də asan başa gəlmir. Bir il yarımda demək olar ki, bu şəhərdə çox böyük dəyişikliklər, abadlıq və quruculuq işləri görülüb.

Adama asan gəlir, amma bir də görürsən ki, balaca bir işi gerçəkləşdirmək üçün nə qədər vaxt tələb olunur.

İmişlidə son illər o qədər möhtəşəm işlər görülüb ki, bunu barmaqla saymaq olmaz. Şəhərin küçə və prospektlərinin əksəriyyəti yenidən tikilib və istifadəyə verilib. Bu gün də İmişlidə hara baş çəkirsən, orda böyük quruculuq işlərinin, abadlığın şahidi olursan. Şahidi olursan ki, küçələr əsaslı surətdə yenidən tikilir, səkilərə mərmər daşlar düzülür və eyni zamanda, böyük abadlıq işləri həyata keçirilir. İmişli sanki bu gün böyük tikinti meydanına bənzəyir. Əlbəttə, şəhərin gözəlləşməsi, abadlaşması üçün bayaq dediyimiz kimi, hamılıqla böyük işlər görülür...

İCRA BAŞÇISININ İNAMI

Rayon icra hakimiyyəti başçısı Vilyam Hacıyev çox ziyalı, işgüzar və bacarıqlı bir insandır. Təbii ki, ölkə başçısı Vilyam müəllimi bu rayona başçı təyin edəndə onun qarşısında müəyyən tapşırıqlar da qoyub. İlk növbədə rayonda sosial-iqtisadi proqrama uyğun olaraq böyük işlər görmək, abadlıq və quruculuq işlərini sürətləndirmək Vilyam Hacıyev bu rayona icra başçısı təyin edilən ilk gündən möhtəşəm işlərə start verib. Yəni rayonun abadlaşdırılması, quruculuq işlərinin sürətləndirilməsi üçün böyük addımlar atılıb. İcra başçısı ilk növbədə böyük layihələrin həyata keçirilməsində elə İmişli camaatına, ziyalılara və zəhmətkeş insanlara güvənib. Təbii ki, harda inam və əzmkarlıq varsa, orda da konkret əməli nəticə zaman-zaman özünü göstərir.

Rayon icra hakimiyyətinin başçısı V.Hacıyev bizimlə söhbətində bildirdi ki, biz İmişlidə ölkə prezidenti, cənab İlham Əliyevə və insanlara güvənərək böyük layihələrə imza atdıq. Qısa zaman kəsiyində Heydər Əliyev parkı yenidən quruldu. Bununla yanaşı, Gənclər Mərkəzi, Heydər Əliyev muzeyi və digər yeni tikililər müasir tələblərə uyğun olaraq, inşa edildi. Əlbəttə, ilk növbədə rayonda insanlar arasında yüksək əhval-ruhiyyə, ovqatı yaradıldı. Bütün bunlar isə onu deməyə əsas verdi ki, böyük abadlıq və quruculuq işləri zaman-zaman irəliyə doğru addımladı.

Bir faktı da qeyd edək ki, rayon icra hakimiyyətinin başçısı çox nikbin və mübariz bir ziyalıdır. Ölkə prezidenti İlham Əliyevə sadiq olan ən etibarlı kadrlardandır. Çünki o, rayona gəldiyi ilk gündən insanların etimadını, məhəbbətini qazana bilib.

İNSANLARA DİQQƏT ARTIR

İmişlidə sosial-iqtisadi inkişafla yanaşı, quruculuq və abadlıqla bərabər, insanlara böyük qayğı və diqqət göstərilir. İlk növbədə şəhid ailələrinə, müharibə iştirakçılarına və əmək veteranlarına qayğı heç vaxt diqqətdən kənarda qalmır. Burda demək olar ki, hər bir insanın, hər bir imişli sakininin öz yeri və öz nüfuzu var. Elə məhz onlar da rayonda gedən tikinti, quruculuq və abadlıq işlərində yaxından iştirak edirlər.

Yaşlı, ağsaqqal kişilərdən biri ilə söhbətimiz çox maraqlı alındı. Həmin ağsaqqal heç bizim jurnalist olduğumuzu belə bilmirdi. Sadəcə olaraq, rayona qonaq gəldiyimizi xatırlatdıq. O, isə dedi ki, xoş gəlmisiniz. Bizim qapımız həmişə qonaq-qara üzünə açıq olub. Son vaxtlar da vəziyyətimiz bir az da yaxşılaşıb. Dolanışığımız da pis deyil. Şükür Allaha, əkinimiz var, biçinimiz var, həyət-bacamızda da mal-qaramız. İşləyən adam üçün çətinlik yoxdur. Gərək zəhmət çəkəsən və bəhrəsini də görəsən. Rayonumuzun icra başçısı cavan olmağına baxmayaraq, ağsaqqal adamdır. Hamının yerini yaxşı bilir. Çətinliyimiz də olanda, rayona gedirik və o kişi də bizə kömək əlini uzadır. Sizi inandırım ki, başçının qəbuluna gedən hər hansı adam çətinlik çəkmir və az bir müddətdə qəbuluna düşüb dərdini ona deyə bilir. Elə bizə də bu lazımdı. Başçı camaatı başa düşürsə, qəbul edirsə, bizim dərdimizə şərik olursa, bundan yaxşı şey yoxdu.

İŞ YERLƏRİ AÇILIR

İmişlidə son vaxtlar çoxlu sayda iş yerləri açılıb. Bunların əksəriyyəti daimi olsa da, mövsümü xarakterli iş yerləri də olur. Aydındır ki, iş yeri olanda insanlar özlərini daha rahat hiss edir və ailəsinin yanına üzü ağ qayıdırlar. Əlbəttə, çörək qazanmaq, iş yeri tapmaq və orda duruş tapmaq o qədər də asan deyil. Bir də görürsən ki, bəzisi bir iş tapır, çətinliyə dözməyib bir müddətdən sonra ordan uzaqlaşır. Amma işləyən adam üçün heç vaxt həyat çətin olmur.

Məhz İmişlidə də müxtəlif istehsalat sahələrində, müəssisələrdə və fermer təsərrüfatlarında çoxlu sayda insanlar çalışırlar. Elə Şəkər Zavodunu yada salmaq bəs edər. Burda çoxlu sayda imişlili əmək fəaliyyəti ilə məşğul olur və balalarına çorək qazanırlar. Ümumiyyətlə, son vaxtlar İmişlidə kənd təsərrüfatının inkişafı ilə yanaşı, sənayenin də yüksəlişinə böyük diqqət yetirilir. Belə ki, indi İmişlidə çoxlu sayda sənaye müəssisələri fəaliyyət göstərir. Bu isə o deməkdir ki, ölkədən insana və vətəndaşa böyük qayğı göstərilir və onların işlə təmin olunması üçün ciddi addımlar atılır.

(Ardı var)

Faiq QİSMƏTOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2013.-4 iyun.-S.7.