Azərbaycanın gözəl guşəsi Laçın

İndi o Ağcabədinin "Taxta körpü" adlanan ərazisinə sığınıb

(əvvəli ötən sayımızda)

Taxta körpüdə bir sıra unudulmaz görüşlər keçirən İlham Əliyev və xanımı 552 ailəlik qəsəbənin rəsmi açılışını reallaşdırmışlar. Sakinlərə səmimi təbriklərini çatdıran prezident mərasimdəki çıxışında laçınlılar haqqında belə demişdir:

"Əziz dostlar, siz Laçın rayon sakinlərisiniz. Laçın Azərbaycanın gözəl guşələrindən biridir. Laçınlılar bütün dövrlərdə Azərbaycana, azərbaycançılıq fəlsəfəsinə sadiq olmuşlar. Bu gün də bu belədir. Laçının işğal altına düşməsi təkcə laçınlıların deyil, bizim hamımızın böyük faciəsidir. Çünki Laçının gözəl abidələri indi dağıdılıbdır. Bizim dini abidələrimiz dağıdılıbdır. Muzey eksponatlarımız talan edilibdir, evlər dağıdılıbdır. Laçınlıların evlərində indi düşmənlər yaşayır. Bu da bir dərddir". Daha sonra nikbinlik və inamla danışan İlham Əliyev və xanımı qəsəbədəki 360 yerlik məktəb binasında yaradılan şəraitlə tanış olmuşlar. Məktəbin həyətindəki abadlıq işlərindən, idman zalından, ümumən burdakı şəraitdən razı qalan qonaqlar xatirə şəkli çəkdirməyi də unutmamışlar. Laçından olan məşhur şəxsiyyətlər haqqında məlumatları əks etdirmiş stendə baxan prezidentə Azərbaycan Xalq Cümhuriyyətinin ilk hərbi naziri Xosrov bəy Sultanov haqqında da ətraflı məlumat verilmişdir. 24 dekabr 2011-ci il Taxta körpüdə beləcə tarixləşib.

Göygöl rayonunda yaşayan

laçınlılardan biri - Abdulla müəllim

Haqqında çox eşitdiyim, ancaq heç vaxt olmadığım Taxta körpüdə həyat öz axarı ilə davam edir. Kiçik bir şəhərciyi xatırladan bu qəsəbədə hər şey yerində olsa da, sanki nəsə çatmır. Əslində nəyin çatmadığını axtarmaq da lazım deyil. Çünki işindən, tutduğu mövqedən asılı olmayaraq burdakı hər bir laçınlının köçkün olduğu hiss edilir, bilinir. Onlar burda, bu qəsəbədə dağlardakı kimi ərklə, hündürdən danışmırlar, danışa bilmirlər.

Laçın rayon İcra Hakimiyyətinin inzibati binasında, yaşıllığa qərq olunmuş geniş həyətdəki oturacaqlarda xeyli adam var. Onlarla söhbətdən məlum olur ki, son vaxtlar hər gün bura müxtəlif məqsədlə üz tutanlara mütəmadi rast gəlmək olur. Respublikanın 58 rayon və şəhərinə səpələnmiş laçınlılar 04 mart 2013-cü ildə rayona yeni təyin edilmiş icra başçısı Akif İsmayıl oğlu Səlimovla daha sıx münasibət qurmağa maraqlıdırlar. Əvvəllər Laçın rayonunda polis rəisi olan, Qarabağ müharibəsində bir sıra şücaətlər göstərərək neçə-neçə həmyerlisini ölümün ağuşundan alan Akif müəllimdən insanların daha çox gözləntiləri olduğu həmin andaca hiss edilir. Bir vaxtlar axarlı-baxarlı Laçının Şamkənd kəndində yaşayan, indi isə Göygöl rayonunda məskunlaşan Abdulla müəllimlə burda təsadüfən qarşılaşırıq. Ötənlərin xoş xatirələrini də birgə yaşayırıq. Həyat və köçkünlük onu xeyli dəyişsə də, əvvəlki kimi səmimi və mehribandır:

- Heç ağlımıza gələrdimi ki, biz nə vaxtsa öz torpaqlarımızda köçkün həyatı yaşayacağıq. İndi Azərbaycanın çox az rayonunda laçınlıya rast gəlməzsən. Daha çox Taxta körpüdə, sonra Abşeronda, Bakının Binəqədi, Qaradağ, Xəzər rayonlarında məskunlaşmışlar. Elə Sumqayıtda, Bərdədə, Şəkidə, Tərtərdə, İsmayıllıda da az deyilik. Biz dağlarda yaşadığımızdan çalışmışıq ki, imkan daxilində Azərbaycanın dağ rayonlarında məskən salaq. Qaldı burda gördüyün bu insanlara - bunlar həm burda yaşayanlar, həm də başqa yerdən gələn laçınlılardır. Hərənin bir dərd-səri var, bir xahişi, bir müraciəti var. Akif müəllim də gələndən qəbul günlərinin vaxtını ləğv eləyib. Həftənin bütün günləri burda qəbuldur. Şənbə-bazar günləri də Akif müəllim öz otağındadır. İndi xeyli azalıblar, əvvəl lap çox idilər. Təzə başçımız hamını tanıyır, hamı da ürəyindən keçənləri onunla bölüşür. Ona görə də belə vəziyyət alınıb. Sağ olsun, biz ondan çox razıyıq, hər birimizə kömək etməyə, dayaq durmağa həmişə hazırdır. Hə, nə deyirsən, bəlkə mənimlə gedək Göygölə? Sabah səni yenə qaytararam bura. Gedib-qayıtmağımızın cəmi 320 kilometr mənzili var. Göygöl Laçın olmasa da, orada özümə babat güzəran qurmuşam.

Çalışmışam ki, Şamkənd kəndində özün gördüyün şəraitimə uyğun Göygöldə də bir şey yaradım. Ancaq bunların heç biri Laçınlı günlərin 1 saatına dəyməz...

Yaşı altmışı haqlasa da, uşaq kimi kövrəlmişdi Abdulla Cahangirov. Mən laçınlıları öz yurdlarını belə sevən görmüşəm həmişə. Onlar üçün Laçındakı adi bir daş parçası dünyanın ən böyük, ən məşhur şəhərlərindən qiymətlidir.

Ümid sonda ölür

Axır ki, vaxt tapıb görüşə bilirik. Laçın rayon İcra Hakimiyyətinin icra başçısının iş otağı hədsiz sadədir. İcra başçısı Akif Səlimov yorğunluğunu gizlətməyə çalışsa da, bu həmin andaca hiss edilirdi:

- Mən başqa cür edə bilmərəm. Hamı məni tanıyır, hamı da məndən diqqət, qayğı gözləyir. Əslində bu onların haqqıdır. Mən də hansı missiyanı üzərimə götürdüyümü bilirəm. Mən möhtərəm Prezidentimiz İlham Əliyevin etimadını necə olur-olsun doğrultmalıyam. İşlərimiz pis getmir, gün-güzəranımız da qaydasındadır. Bu gün Laçın sakinlərində və fermer təsərrüfatlarında 34010 başa qədər iribuynuzlu, 199697 baş xırdabuynuzlu mal-qara, qoyun-keçi var. Taxta körpüdəki abadlıq-quruculuq işlərini də özün gəzib görmüsən. Bu qəsəbədə 25 kilometr uzunluğunda qaz xətti çəkilib, 5 kilometr içməli su xəttində təmir-bərpa işləri aparılıb. Elektrik enerjimiz daimidir. Ən böyük qayğımız hələ də şəraitsizlikdən əziyyət çəkən insanlarımızdır. Onların mənzil şəraitini yaxşılaşdırmaq bizim ən ümdə vəzifəmizdir. Əminəm ki, biz bunu da yoluna qoyacağıq, torpaqlarımızı da qaytaracağıq. Ümidsiz, inamsız yaşamaq olmaz ki. Ancaq buna şərait və vaxt lazımdır. Elə bilirəm ki, buna lap az qalıb. İnşallah, yaxın vaxtlarda sənin də yaşadığın Laçın rayonunun Şamkənd kəndində yenidən toy-düyünlər quracağıq.

...Qəbula gələnlər hələ tükənmədiyindən mən otağı tərk etmək zorundayam. Həm də xəyalən Şamkənd kəndində yaşamaqdan gözəl nə ola bilər ki?

Səxavət Məmmədli

Ədalət.-2013.-7 iyun.-S.7.