"Ömür dedikləri bir karvan yolu"

Baharın ilk günündə dünyaya gələn ölməz Səməd Vurğun misralarıdır bunlar. Özündə çox mətləbləri əks etdirən bu "karvan yolundan" kimlər keçməyib ki? Dünyanın yaranışından elə bu ana qədər bu karvan yolunu keçənlərin sayını da heç kəs bilmir zatən. Dünyanın yaddaşında qalanlar, insanların xatirəsində yaşayanlar isə xoşbəxt ömrün sahibləridir. Bir də xoşbəxt o kəslərdir ki, kişilik, xeyirxahlıq rəmzi kimi ürəklərdə, yaddaşlarda yaşasın, əzizlənsin. Özündən sonra gələnlərə necə yaşamağı, necə sevməyi, necə sevilməyi əməlləri ilə sübut etsin.

O da bu xalqın sadə bir nümayəndəsi idi. Ancaq sadə olmayan ömür payını elə yaşadı ki, sadəliyi, gözəlliyi, ülviyyəti, paklığı onu zaman-zaman yaşadacaq. Hələ örnək olacaq bir çox ömürlərə. İnsanlar onun kimi yaşamağa, onun kimi iz qoymağa çalışacaq. Çalışacaqlar ki, bu yurdun ən məşhur insanları ilə bərabər, ən adi sakinləri belə bu insan haqqında dediklərini onlar barəsində də desinlər. Onun kimi yaddaşlarda əbədi yaşasınlar, təbəssümlə xatırlansınlar.

Ötən əsrin ortalarında ömür payını bu dünya ilə bölüşən İbrahim kişidən danışmaq istəyirəm. İbrahim Musa oğlu Qurbanovdan. İlk gəncliyindən ömrünü torpağa, zəhmətə, insanlara həsr edən bu kişinin qismətində nələr yox imiş...

Bacarıqlı, işgüzar, təsərrüfat rəhbəri kimi Salyan, Neftçala, Cəlilabad rayonlarında insanlara xidmət etmək, onlarla dost, sirdaş olmaq, gecə-gündüzün nə olduğunu bilmədən yorulmadan çalışaraq ölkə rəhbərliyinin etimadını qazanmaq.

Zəhmətinin müqabilində ən mötəbər məclislərə dəvət almaq, ictimai-siyasi dünyagörüşünə görə yüksək orqanlara üzv olmaq. Əməyin ən yüksək dərəcəsinə "Sosialist Əməyi Qəhrəmanı" adına layiq görülmək.

Xeyirxah, səxavətli insan kimi minlərlə soydaşlarına maddi və mənəvi dayaq durmaq. Yüzlərlə gəncin əlindən tutub ərsəyə gətirmək.

Kökdən, soydan gələn milli xüsusiyyətlərin ən gözəl nümunələrini inkişaf etdirərək nümunəyə çevrilmək. Ulu Öndər Heydər Əliyev kimi bir dühanın ən yaxın silahdaşı, dostu olmaq.

Gözəl ailə başçısı, sadiq ömür-gün yoldaşı olmaqla cəmiyyətə işıqlı, sağlam övladlar vermək.

Və onu tanıyanların ürəklərində tərtəmiz sevgi, məhəbbət, inam qazanmaq, KİŞİ ömrü yaşamaq.

Elə yalnız bunlar bir ömür payının qismətidirsə, çox xoşbəxt insandır İbrahim kişi. Onun ədəbindən, ərkanından, halallığından, sədaqətindən yararlananların sayı daha çox olsaydı, dünyamız nə itirərdi görəsən?..

Dəfələrlə şahidi olmuşam ki, işlədiyi və iz qoyduğu hər hansı bir rayonda, idarə və təşkilatda İbrahim kişinin adı xüsusi bir ehtiramla çəkilir. Ehtiram və məhəbbətlə çəkilir bir də ona görə ki, İbrahim kişinin tanımadığı adamlar belə onun qapısından naümid, həyətindən əliboş qayıtmayıb.

Yox, insanları yaşadan nə onun yüksək rütbəsi, nə ali mükafatı, nə də ad-sanıdır. İnsanı hafizələrdə yaşadan onun torpağına, el-obasına, insanlara sevgisidir, ehtiramıdır.

Fəaliyyət göstərdiyi bütün rayonlarda çox sevilən İbrahim Musa oğlu Qurbanova münasibətin Cəlilabad rayonunda bir dəfə bariz nümunəsini gördüm. Mötəbər bir ağsaqqalın xatirə gecəsində məclisin ağsaqqalı belə dedi: "Yaşadığımız Cəlilabad rayonunun hər daşında əməyi, nəfəsi olan İbrahim kişinin də ruhu şad olsun! Rayonumuzun həyatında tarix yazan sakinlərimizə rəhbər və dost olan o kişinin bizim boynumuzda haqqı çoxdur". Bütün məclis indi həyatda olmayan İbrahim kişiyə bir ağızdan rəhmət oxudu.

Martın 22-də ömrə bənzədilən karvan yolunu ləyaqətlə, şərəflə başa vurmuş bu el ağsaqqalının doğum günüdür.

Doğum günün mübarək, İBRAHİM KİŞİ!

Səxavət Məmmədli

Ədalət.-2013.-19 mart.-S.5.