Hacıqabul səhiyyəsinin dünəni, bu günü və sabahı

(əvvəli ötən sayımızda)

Şəkərli diabet, irsi qan xəstəlikləri, xroniki böyrək çatışmamazlığı, vərəm, yoluxucu xəstəliklərin immunoprofilaktikası Rayon Mərkəzi Xəstəxanasında müvəffəqiyyətlə həyata keçirilmişdir. Ötən il daha 41 nəfər ilkin onkoloji xəstə qeydə alınmışdır. 2372 nəfərdən qan nümunəsi götürülərək GİÇS-ə görə müayinəyə göndərilmişdir. Rayonda son vaxtlar miqyası bir az da böyüyən vərəmlə mübarizəyə diqqət artırılmışdır. İndi Hacıqabulda onların sayı 316 nəfərə çatmışdır. 2012-ci ildə Hacıqabul rayonunda uşaq ölümü faktı cəmi bir dəfə qeydə alınmışdır.

Həkimlərlə söhbətimizdən məlum oldu ki, rayonda əhalinin sayının az olmasına baxmayaraq, xeyli böyük əraziyə malik Hacıqabulda mərkəzdən 30-40 kilometr uzaqlıqda yerləşən Udulu, Abdulabad, Atbulaq kimi kəndləri həkim nəzarətində saxlamaq elə də asan deyil. Buna görə mütəxəssislərdən ibarət həkim briqadaları hər ay kəndlərə gedir, sakinləri yerlərdə müayinə edirlər. Aşkar olunan xəstələri dispanser müşahidəsinə alır, müvafiq tədbirlər görürlər.

Rayonun Qubalıbaloğlan həkim məntəqəsində işlərini daha yaxşı qurmuşlar. Məntəqənin baş həkimi Gülbəniz Əzizova işini mövcud tələblərə uyğun qurmaqla nizam-intizamlı kollektiv yaratmağa nail olmuşdur.

Ağxalatlılar onu da bildirdilər ki, Mərkəzi Xəstəxananın doğum, terapiya şöbələrində sakinlərin sağlamlığının qorunması daha yüksək səviyyədə həyata keçirilir. Bu sahələrdə daha savadlı, daha bacarıqlı tibb işçiləri çoxdur.

"Hacıqabul səhiyyəsi"

Lap bu günlərdə mənim də iştirak etdiyim "Hacıqabul səhiyyəsi" adlı kitabın təqdimat mərasimində bir sıra media nümayəndələri də iştirak edirdi. Alik Rzayevin min bir əziyyətlə araya-ərsəyə gətirdiyi bu kitabda xeyli maraqlı məqamlar var. Hacıqabul rayonunun tibb işçilərinə həsr edilmiş bu "ilk qaranquş" rayon rəsmilərinin də iştirak etdiyi mərasimdə ən layiqli insanlara verildi.

Hacıqabul rayon səhiyyəsinin tarixinə qısa ekskursiya edən müəllif bu rayonun tibb həyatında öz sözlərini demiş Bələd Nəsirovun, Əkbər İsrafilovun, Mürsəl Əlibəylinin, Əminə Lütfəliyevanın, Həmid Həmidovun adlarını ehtiramla qeyd etməklə bərabər, onların tibb sahəsində gördükləri işlərə də diqqət çəkmişdir. Kitabda maraqlı məqamlardan daha biri ondan ibarətdir ki, Azərbaycan Prezidenti İlham Əliyevin Hacıqabul səhiyyəsi ilə bağlı bütün görüşlərinə burda geniş yer ayrılmışdır. Bu kitabda həmçinin Səhiyyə Naziri Oqtay Şirəliyevin Mərkəzi Rayon Xəstəxanasının yeni tikilmiş binasının açılışında iştirak və çıxış etdiyi göstərilmişdir.

Rayonun müasir tibb həyatına da geniş yer verən Alik Rzayev Hacıqabul şəhərində, eləcə də kəndlərdə fəaliyyət göstərən həkim və tibb işçilərindən daha qabaqcıllarını da unutmamışdır. Təqdimat mərasimində çıxış edən qonaqlar və ev sahibləri kitabın bu sahədə gördüyü işi yüksək qiymətləndirməklə bərabər gələcəkdə daha sanballı nəşrin meydana çıxmasını arzuladılar. Sonda çıxış edən müəllif kitab üzərində işləyərkən qarşılaşdığı bir sıra çətinliklərdən danışmaqla bərabər ona göstərilən qayğılara görə minnətdarlıq etməyi də unutmadı.

"Görüləsi işlərimiz çoxdur"

Danışmağa elə də meylli olmayan Hacıqabul Rayon Mərkəzi Xəstəxanasının baş həkimi Beydulla Ərəstun oğlu Qarayev əslində çox maraqlı həmsöhbətdir. Özü və gördüyü işlərdən bəhs etməyi sevməyən Beydulla həkim həlli vacib məsələlərdən söhbət açmağı daha üstün tutur:

- Çinlilərdə bir söz var: "Bir il sonrasını fikirləşirsənsə düyü ək, 10 il sonrasını düşünürsənsə ağac ək, 50 il sonrasını fikirləşirsənsə sağlam nəsil yetişdir". Mən bu sözlərlə tamam razıyam. Ölkənin, millətin gələcəyi olan bugünkü körpələri biz qorumalıyıq, biz yetişdirməliyik. Rayonumuzda narkomaniya, QİÇS xəstəliyinə tutulmuş insanların çoxluğu məni doğrudan narahat edir. Son vaxtlar vərəmə yoluxmuş sakinlərimiz də artıb. Bax bunlarla hamılıqla çox ciddi mübarizə aparmalıyıq ki, sağlam gələcəyimizə münbit şərait olsun. Paytaxtdan o qədər uzaqda yaşamasaq da, rayonumuza daha 26 nəfər həkim lazımdır. Bunlardan 14 nəfərinə rayon mərkəzində iş verməyə hazırıq. Bu vakant yerlər üçün Səhiyyə nazirliyinə daim məlumat vermişik, "Tibb" qəzetində elanla məlumat vermişik. Travmatoloq, onkoloq, narkoloq həkimlərə ehtiyacımız daha çoxdur. Psixiatr həkim bizə hava, su kimi lazımdır.

Kifayət qədər böyük ərazimiz var, həm də Bakı-Qazax avtomobil yolunun böyük hissəsi rayonumuzun ərazisindən keçir. Bu yollarda da tez-tez avtomobil qəzaları baş verir. Cəmi 4 ədəd təcili yardım maşını ilə bu işlərin öhdəsindən gəlmək mümkün deyil.

Əlavə xəstəxana korpusunun inşasına böyük ehtiyacımız var. Çünki xəstəxananın terapiya, təcili yardım, kadrlar şöbələri, mühasibatlıq, bir sıra kabinetlər, gigiyena-epidemiologiya mərkəzi və digərləri bir mərtəbəli, köhnə, heç bir şəraiti olmayan korpusda yerləşir.

Hacıqabul rayonunda flüqorafiya aparatına da çox böyük ehtiyac var. Bu aparat olmadığı üçün biz əhalinin kütləvi müayinəsində, xüsusən də məktəblilərin və hərbi xidmətə çağırışçıların vərəmə görə müayinəsində çətinliklə üzləşirik.

Hələ də şəxsi evlərdə yerləşən tibb məntəqələrimiz var. Udulu kəndindəki xəstəxana əsaslı təmir olunmalıdır. Bütün bunlarla bərabər Səhiyyə Naziri Oqtay Şirəliyevin də, Hacıqabul rayon İcra Hakimiyyətinin başçısı Əhməd Muxtarovun da rayonumuzun səhiyyəsinə maksimum diqqət ayırmalarını mütləq qeyd etməliyəm. Müəyyən problemlər və qayğılar həmişə olacaq. Çünki həyat bunlarsız marağını itirərdi. Yəqin ki, yaxın vaxtlarda biz daha az problem və qayğılardan danışacağıq.

Bu şübhəsiz belədir, Beydulla həkim. Çünki ölkəmizin iqtisadi inkişafı, regionlara ayrılan xüsusi diqqət bunu deməyə əsas verir.

Səxavət Məmmədli

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.- 2013.- 30 may.-S. 7.