Azdrama ilə Bakı Ali Neft Məktəbi arasında müqavilə imzalandı

Bakı Ali Neft Məktəbi Azərbaycan Akademik Milli Dram Teatrı ilə əməkdaşlıq müqaviləsi imzalamış ilk ali təhsil müəssisəsidir.

Publika.Az-ın məlumatına görə, Bakı Ali Neft Məktəbinin rektoru Elmar Qasımov və Azərbaycan Akademik Milli Dram Teatrının direktoru İsrafil İsrafilov tərəfindən hər iki qurum arasında əməkdaşlıq əlaqələrinin yaradılması ilə bağlı müqavilə imzalanmışdır.

Əməkdaşlığın məqsədi Bakı Ali Neft Məktəbinin tələbələrinin mədəni səviyyəsinin yüksəldilməsi, onların dünya görüşlərinin genişləndirilməsi və sosial-mədəni tələblərinin ödənilməsidir.

Müqavilə çərçivəsində Bakı Ali Neft Məktəbi mütəmadi olaraq teatrın repertuar cədvəli haqqında əvvəlcədən məlumatlar əldə edəcək və tələbələrin zövqünü formalaşdırmaq üçün onların dünya ədəbiyyatı və Azərbaycan klassiklərinin əsərləri əsasında qoyulmuş tamaşaları kollektiv şəkildə seyr etmələrinə şərait yaradılacaqdır. Bu zaman dövlətçilik, vətənpərvərlik və qəhrəmanlıq mövzularında qoyulmuş səhnə əsərlərinə baxışların təşkilinə xüsusi önəm veriləcəkdir. Ən azı ayda bir dəfə Ali məktəbin bütün kollektivi bir tamaşaya baxacaqdır.

Əməkdaşlıq çərçivəsində həyata keçirilən tədbirlər pofessor-müəllim heyəti və tələbə ictimaiyyəti tərəfindən maraqla qarşılanmışdır.

Ədalət.-2013.-18 yanvar.-S.8.