MÜƏLLİM ADININ ŞƏRƏFİ ƏLÇATMAZ UCALIQDIR

(əvvəli ötən sayımızda)

Bütün bunları əks etdirən mövzu planları tutulur. Planlar kafedra üzrə ümumi qəbul edilir. Planlarda tədqiqat istiqamətləri, ümumi bölmələr, illər üzrə şaxələnmiş mövzular və yarım-mövzular müəyyənləşdirilir.

Bu tədqiqat işinin planları yaxın perspektiv üçün 3-5 illik müddətə, o da öz növbəsində illər üzrə görüləcək işlərin planlarına çevrilir. Təqvim ilinin əvvəlində mövzu planları kafedra iclasında geniş müzakirə olunur. Bürada hər əməkdaşın yerinə yetirilməsini planlaşdırdığı tədqiqat mövzusunun profilə uyğunluğu, aktuallığı bunun üçün maddi və ya elmi bazanın mövcudluğu araşdırılır. Bundan sonra kompleks halda cari və illik planlar təsdiq olunaraq filial Direktor Şurasının təsdiqinə verilir. AMİ Zaqatala filialının Direktor Şurası, Metodik Şura, elmi cəmiyyət tədqiqat işlərinin yerinə yetirilməsini istiqamətləndirir, ona kömək edir, ən yaxşı işlər beynəlxalq və ya yerli konfranslara təqdim olunur. Hər ilin yekununda elmi-tədqiqat işlərinin yerinə yetirilməsinə həsr olunmuş konfranslar keçirilir.

İnnovasiya, ixtiraçılıq və patent-lisenziya fəaliyyəti

İnnovasiya fəaliyyətinin həyata keçirilməsi məqsədilə filial Elmi Cəmiyyətinin nəzdində innovasiya qrupu yaradılmışdır. Buraya bacarıqlı məktəbşünaslar, pedaqoq-alimlər və yeniliklə gənc kadrlar daxil edilmişdir. Əlavə təhsil bölməsi üzrə fəaliyyət göstərən müasir təlim metodları və innovasiyalar kabineti yeni elmi təşəbbüslərin öyrənilməsi və yayılmasında əhəmiyyətli rol oynayır. Həmçinin nəzərdə tutulmuşdur ki, hər hansı tədqiqatçı, gənc müəllim istər müasir dərsin yenidən qurulması, qabaqcıl təlim texnologiyalarının tətbiqi, istərsə də özünün fəaliyyət sahəsinə daxil olan digər istiqamətlərdə hər hansı səmərələşdirici təkliflə çıxış edərsə, ona xüsusi dəstək göstərilir. İnnovasiya fəaliyyətinin işi bununla məhdudlaşmır. Filial elmi fəaliyyətinin diqqət mərkəzində əsas o məsələ yer tutur ki, bunlar hazırkı təhsil prosesinin təkmilləşdirilməsinə xidmət edir.

Elmi konfransların planlaşdırılması və keçirilməsi

Azərbaycan Müəllimlər İnstitutunun Zaqatala filialında elmi konfranslar bir qayda olaraq ildə 2 dəfə yerinə yetirilmiş elmi-tədqiqat işlərinin yekunlarına həsr olunur. Professor-müəllim heyəti və tələbələr tərəfindən yerinə yetirilən hər iki elmi tədqiqat işlərinin yekunları cari təqvim ilinin noyabrında keçirilmişdir. Filialda 2013-cü il üzrə elmi fəaliyyətin yekunları aşağıdakı ardıcıllıqla keçirilib, müvəffəqiyyətlə başa çatmışdı.

Professor-müəllim heyəti üzrə 2013-cü il 29 noyabr.

Tələbə elmi işlərinin yekunları üzrə 2013-cü il 05 dekabr.

Elmi tədqiqatların yekunlarına həsr olunmuş konfransların ilk günü plenar iclaslara həsr olunmuşdur. Hər iki konfransda ötən ilki elmi fəaliyyət barədə filial rəhbərliyinin hesabatı dinlənilmişdir. Bundan sonra fəaliyyətin təhlilinə, qarşıdakı elmi istiqamətlərin araşdırılmasına dair müzakirələr aparılmış və konfranslar bu barədə yekun qərarlar qəbul etmişlər.

Müəllim və tələbə elmi işlərinin konfransları sonrakı günlərdə ardıcıl olaraq öz işini bölmələrdə davam etdirmişlər. Bu bölmələr aşağıdakı ardıcıllıqla müəyyən olunmuşdur.

I. Humanitar fənlərin tədrisi metodikası kafedrası üzrə:

1. Pedaqogika və psixologiya;

2. Tarix elmləri;

3. Dil və ədəbiyyat;

4. Yeni pedaqoji psixologiyalar.

II. Təbiət fənlərinin tədrisi metodikası kafedrası üzrə:

1. Dəqiq elmlər;

2. Coğrafiya;

3. Təbiət elmləri;

4. Texnoloji innovasiyalar.

III. Tələbə elmi konfransları da analoji olaraq sadalanan bölmələrdə fəaliyyət göstərmişlər.

Tələbələrin elmi-tədqiqat işlərinin təşkili

Filialda təhsil alan tələbələrin hamısı tələbə-elmi cəmiyyətinin ətrafında birləşmişdir. Onlar 20-ə yaxın müxtəlif elm sahələri üzrə mövzular üzərində işləyirlər. Bu mövzular arasında xarici dil, ədəbiyyat, coğrafiya, informatika, interaktiv təlim, fənlərarası inteqrasiya kimi aktual istiqamətlər üstünlük təşkil edir. Bu işlərə ümumi rəhbərliyi filial Elmi Cəmiyyət fakültədə həyata keçirir. Tələbə Elmi Cəmiyyəti fakültə yaradılır və o, işini aşağıdakı ixtisaslarda əlaqəli qurur.

1. İbtidai sinif müəllimliyi;

2. Riyaziyyat və informatika müəllimliyi;

3. Tarix və coğrafiya müəllimliyi;

4. Azərbaycan dili və ədəbiyyat müəllimliyi;

5. Məktəbəqədər təlim və tərbiyə;

6. Təhsildə sosial-psixoloji xidmət.

Ayrı-ayrı ixtisaslar üzrə akademik qruplarda TEC-in özəkləri yaradılır.

Hər tələbə bir, bəzi hallarda bir neçə mövzu üzərində işləyir. Bir müəllim ən azı iki tələbəyə rəhbərlik edir. Filialda hazırda 400 nəfərə yaxın tələbə 70-dən çox professor-müəllim heyətinin rəhbərliyi ilə Azərbaycan və dünya elminin müxtəlif istiqamətləri üzrə tədqiqat işlərini aparırlar.

2013-cü ildə filialın müxtəlif ixtisaslar üzrə 7 nəfər tələbəsi ADPU-da keçirilən tələbələrarası Respublika XVII elmi konfransında məruzələrlə çıxış etmişlər. "Azərbaycan dili və ədəbiyyatı müəllimliyi" ixtisası üzrə III kurs tələbəsi Məhərrəm Şükürov Heydər Əliyev-90 devizi altında "Zamanı qabaqlayan insan" adlı ingilis dilində elmi məruzəsinə görə birinci, "Tarix və coğrafiya müəllimliyi" ixtisası üzrə III kurs tələbəsi Nərgiz Şabanova fənlərarası inteqrasiyaya həsr olunmuş məruzəsinə görə isə AMİ filialları arasında III yerə çıxaraq diqqətəlayiq nəticələrlə kollektivə qayıtmışlar.

2013-cü ilin noyabr ayının sonlarında TEC üzvlərindən Fərid Əzimov, Afət Cəfərova, Əhməd İsmayılov və digər 4 nəfər tələbə Tələbələrarası Respublika intellektiv yarışına vəsiqə qazanmış, "Kim?", "Nə zaman?", "Harda?" adlı müsabiqədə diqqətəlayiq göstəricilər əldə etmişlər.

Bu nailiyyətlərin davamı olaraq onlar Tələbə Gənclər Təşkilatlarının Respublika Komitəsi tərəfindən mükafatlandırılaraq 2013-cü ilin dekabrında bir həftəlik gəzintiyə göndərilmişlər.

Tələbələrin elmi-tədqiqat işlərinin əlaqələndirilməsində onların intellektual yarışlarda uğurlu nəticələr əldə etməsində filial Direktor Şurasının katibi, əməkdar müəllim Bahar İsmayılovanın, filial Elmi Cəmiyyətinin sədri Rəna Əliyevanın, tələbə ictimai təşkilatlarının xüsusi əməyi olmuşdur. Filial tələbələri 2014-cü təqvim ilində də bu nailiyyətlərini möhkəmlətmək əzmindədirlər.

Məzahir ƏHMƏDOĞLU

ədalət.-2014.-9 aprel.-S.7.