"Başqa kimi isə sevmək artıq mümkün deyil"

Ata tərəfindən imtina və uşaqlıq qorxuları...

Sofi Loren 20 sentyabr 1934-cü il Roma şərəhinin yoxsullar üçün nəzərdə tutulmuş xəstəxanada anadan olub. Onun anası Romilda Villani musiqi məktəbində müəllimə, atası Rikardo Şikollini isə tikintidə mühəndis işləyirdi. O, Romilda ilə qeyri-qanuni olan münasibətindən qızının dünyaya gəldiyini biləndə qəti sürətdə ondan imtina etmişdir. Uzun sürən qalmaqallardan, danışıqlardan sonra o, öz soyadını Sofiyə verməyə razı olmuşdur.

Böyük şəhərdə tək qadınının bir uşaqla yaşaması Romilda üçün çətinlik yaratdığından bir müddət sonra o, qızını da götürüb doğulduğu kəndə, ata yurduna geri dönmüşdür.

Üç ildən sonra Sofinin anası yenidən Rikardo ilə münasibət qurur. Onların daha bir qızları doğulur. Bu dəfə də Rikardodan nümunəvi ata olmasını gözləyən Romilda təkrar yanılır. Çünki Rikardo bu dəfə öz qızına heç öz soyadını da vermədən yoxa çıxır.

Sofinin uşaqlığı çox çətinliklə keçmişdir. Onun uşaqlıq illərinin xeyli qorxuları olmuşdu. Ac qalmaq, qeyri-qanunu doğulduğuna görə lağ yeri olmaq və müharibə... Müharibə illərini də görən Sofi bütün çətinliklərə rəğmən on dörd yaşına qədəm basmışdı.

Müharibədən sonra Romilda kiçik bir restoran açır. O, öz musiqi qabiliyyətini xatırlayaraq həmin restoranda royalda musiqilər çalır, Sofi isə masalara yaxınlaşıb sifarişlər qəbul edir. Hündürboylu, arıq, burnu uzun, iri ağızlı bu qıza həmin vaxtlar "diştəmizləyən" ləqəbi verirlər.

Dəniz Şahzadəsi...

Lakin on dörd yaşı tamam olanda həmin çirkin qızdan əsər qalmır. O, həcmli saçları, iri gözləri, cazibədər bədən quruluşu olan yaraşıqlı bir qıza çevrilir.

Sofinin ilk arzularından biri aktrisalıq olur. O, istəyini anasına bildirəndə, vaxtilə özü də aktrisa olmaq istəyən ana qızının həmin arzusunun həyata keçməsi üçün köməklik göstərməsinə qərar verir.

1949-cu ildə Romilda Neapol şəhərində "dəniz şahzadəsi" adlı gözəllik yarışmasının keçirilməsindən xəbər tutur. O, qızını həmin yarışmaya göndərmək istəsə də, Sofinin fərli paltarı olmur. Ana öz əlləri ilə qızına paltar tikib hazırlayır. Özünün rəngi solmuş tuflilərini ağ boya ilə boyayıb hazırlayır.

On doqquz finalçı arasında Sofi "dəniz şahzadəsi" titulunu qazanır.

Müsabiqədən sonra Sofi anası ilə Roma şəhərinə gəlir. Romada o, bir neçə jurnallar üçün fotolar çəkdirir, filmlərdə epizodik rollara çəkilir, başqa gözəllik yarışlarında iştirak edib uğurlar qazanır.

Bir gün o, öz dostları ilə gecə klublarının birində əylənərkən məşhur gözəllik yarışmalarının birində jüri kimi iştirak edən və Sofinin gələcək ulduz kimi görüb ona yüksək xal verən məşhur prodüsser Karlo Ponti ilə tanış olur. Karlo Sofidən 22 yaş böyük olur. Karlo onuna tanış olduqdan sonra Sofini bir çox film sınaqlarına aparır. Lakin demək olar ki, bütün rejissorların yekdil fikri bundan ibarət olur ki, Sofi kino üçün yararlı deyil. Onun həddindən artıq iri yanları, dolu bədəni, uzun burnu var. Bunun üçün də ona plastik əməliyyat və arıqlamağı məsləhət görürlər.

Lakin aktrisa bədənində heç bir dəyişiklik etməyəcəyini bildirir.

Böyük məhəbbət, skandallarla yanaşı addımlayan şöhrət..

Ondakı gözəllik təkcə Karlo üçün əyan olur. O, Sofiyə düzgün səhnə yerişini, danışmağı öyrədir. Gələcəyin aktrisası aktyor məktəbi keçir, klassik ədəbiyyatla tanış olur, modanın və dəbdəbənin sirlərini öyrənir.

Nəhayət 1952-ci ildə ona yarı sənədli "Afrika dəniz altında" filmində baş rolu oynamaq qismət olur. Bir müddət sonra prodüsser Qoffredo Sofiyə Loren təxəllüsünü verir. Bundan sonra Sofi Loren bir ildə on filmə çəkilir. Lakin əsl uğuru o, Vittorio de Sikonun "Neapolun qızılları" filmi ilə qazanır.

Aktrisanın kinokaryerasında çox mühüm yer tutan, onun sənət müəllimi hesab olunan de Siko onunla müqavilə bağlayır. Rejissor hər il Sofini bir filmə çəkilir. Bu müqavilənin sayəsində "Dünən, bu gün, sabah", İtalyansayağı nikah" kimi şedevr filmlər meydana çıxır.

1954-cü ildə çəkiliş meydançasında Marçello Mastroyanni ilə Sofi Lorenin görüşü təşkil olunur. Həmin vaxtdan onların qırx ilə yaxın davam edən tərəf-müqabillikləri yaranır.

1955-ci ildə Sofi artıq çox məşhur və sevilən aktrisa olur. Onun şəkilləri jurnalların üz qabığını bəzəyir. Onu artıq İtalyadan kənar ölkələrdə də tanımağa başlayırlar.

Həmin ərəfədə Sofinin onlardan imtina etmiş, bacısına öz soyadını verməyən atası yenidən peyda olur. O, qızı ilə əlaqə yaratmaq istəsə də aktrisa onunla görüşdən imtina edir. Məşhur və imkanlı qızından pul qoparmağa çalışan ata başqa yola əl atır. Vaxtilə soyadını vermədiyi qızına öz soyadını verməyə küllü miqdarda pul müqabilində razılıq verir. Sofi bacısı üçün buna razılıq verir. Pul ödəndikdən sonra isə atası üçün bütün qapıları bağlayır.

Bir müddət sonra aktrisa Hollivuda gedir. Orda da bir neçə filmə çəkilir. Karlo Ponti ilə Sofi Lorenin münasibətləri artıq iş müstəvisindən çıxıb sevgiyə çevrilir. 1957-ci il 18 sentyabrında Monte öz arvadından boşanıb Sofi Lorenlə Meksikada ailə həyatı qurur. Bu nikahdan xəbər tutan İtaliya mətbuatı Sofini fahişə, Karlonu isə ikiarvadlı adlandırırlar. Həmçinin İtaliyada onların nikahını həqiqi hesab etmirlər.

Hətta Vittorio de Sikonun "Çoçaro" filminə çəkildikdən sonra qazandığı "Oskar" mükafatına görə də Sofini İtaliyada təbrik etmirlər.

Elə həmin ərəfədə aktrisanın bacısı köhnə faşist diktatoru Mussolininin oğluna aşiq olub onunla ailə həyatı qurur. Ailə və Sofi bu nikaha qarşı olsalar da Mariyanı öz fikrindən döndərə bilmirlər. Sofi bu səbəbdən ona təklif olunmuş bir çox yaxşı rollarından məhrum olur. Lakin bütün söz-söhbətlər və skandallar Sofi Lorenin şöhrətinə xələl gətirmir. O, həmin illərdə ard-arda "Honkonqun qrafiniyası", "El Sid", "Millioner" kimi filmlərə çəkilir. 1964-cü ildən, 1978-ci ilə qədər Sofi Loren dörd dəfə "qızıl qlobus"a layiq görülür.

Həbs qorxusu, iyirmi dörd milyon və xilas...

Karlo ilə olan nikahları İtaliyada qanuni sayılmadığından o, dünyaya övlad da gətirə bilmir. Bunun üçün də Karlo keçmiş arvadı Culiyana Fiastridən İtaliya qanunları çərçivəsində boşanıb 1966-cu ildə Sofi Lorenin qanuni əri olur. Bundan sonra Sofi bir neçə dəfə hamilə qalsa da, uğursuzluqla nəticələnir. Uzun sürən müalicələr nəticəsində nəhayət 1969-cu ildə onların bir oğlu doğulur. Dörd ildən sonra həkimlərin bütün qadağalarına baxmayaraq Sofi ikinci dəfə ana olub dünyaya daha bir oğlan gətirir.

Onun ətrafındakı insanlar Sofini "dəli ana" adlandırırlar. O, bir dəqiqə olsun belə övladlarını gözdən qoymur, onlara heç kimin yaxınlamasına icazə vermir. Hətta uşaqlarına görə kinonu tərk etməyə belə hazır olur. "Sevgi və ailə mənim üçün hər şeydən vacibdir" deyir.

Lakin İtaliya hökumət qüvvələri bu cütlüyü yenə də rahat buraxmırlar. Karlo Ponti 1977-ci ildə güclü vergi ödənişindən yayındığı üçün məsuliyyətə cəlb olunur. Karlo Parisə qaçır. İtaliya qanunları çərçivəsində Karlo iyirmi dörd milyon dollar cərimə olunub dörd il həbsə məhkum olunur. Lakin Sofi Lorenin səyləri nəticəsində bütün vergi borcları ödənilir. Karlo 18 gün həbs cəzası alır.

Uşaqları doğulduqdan sonra aktrisa artıq filmlərə az-az çəkilməyə başlayır. O, öz ətriyyatını yaradır, adını daşıyan zinət əşyaları, paltar və eynək mağazları açır.

1991-ci ildə Sofi Loren fəxri legion ordeni və fəxri "Oskar" alır.

Həmçinin 1960-cı il "Oskar", 1961-ci ildə "Kann", 1958-1998-ci illərdə "Venesiya", 1965-1997-ci illərdə "Moskva", 1994-cü ildə "Berlin" kimi nüfuzlu film festivallarında ən yaxşı qadın aktrisa mükafatlarına layiq görülür. Beş dəfə isə "Qızıl qlobus" mükafatı qazanır. Mükafatlarının çoxluğu səbəbi ilə o, "Ginnes" rekordlar kitabına da düşür.

1994-cü ildə Sofi Loren sonuncu dəfə özünün ən uzun ömürlü partnyoru olan Marçello Mastroyanni ilə "Pret-a-porte"filminə çəkilir.

2007-ci ildə Karlo Ponti ağciyər xərçəngindən dünyasını dəyişir. Jurnalistlərin bir daha ailə həyatı qurarsınızmı sualına aktrisa belə cavab verir. "Heç vaxt. Başqa kimi isə sevmək artıq mümkün deyil".

Üç nəvə sahibi olan 80 yaşlı aktrisanın böyük oğlu Karlo drijor, balaca oğlu isə rejissordu.

Samirə Əşrəf

Kaspi.-2014.-23 aprel.-S.5.