UĞURLARA İMZA ATAN İMİŞLİ

Bu gün rayon əsl yaz ovqatı yaşayır

(Əvvəli ötən saylarımızda)

Dünyanın hər yerində xüsusi diqqət tələb edən sahələrdən biri təhsil və mədəniyyətdi. Təbii ki, Azərbaycan hökuməti bu məsələdə öz prinsipiallığı və həm də təhsilə, mədəniyyətə xüsusi diqqət və qayğısı ilə həmişə fərqlənib. İndinin özündə də adı çəkilən sahələrə təkcə dövlətin deyil, həmçinin Heydər Əliyev Fondunun, şəxsən onun rəhbəri, ölkənin birinci xanımı, millət vəkili, sülhməramlı səfir Mehriban xanım Əliyevanın böyük qayğısı hər kəsə bəllidir. Yəni insanlar ölkənin istənilən guşəsində Heydər Əliyev Fondunun dəstəyi ilə inşa olunan məktəblərin, uşaq bağçalarının bilavasitə şahididilər.

Məsələnin bu istiqamətinə xüsusi diqqət yetirən İmişli rayon icra hakimiyyətinin başçısı və onun aparatı rayonda təhsilin səviyyəsinin yüksəldilməsinə, müəllimlərin peşə hazırlığının artırılmasına, müxtəlif elmi müsabiqələrin keçirilməsinə həmişə dəstək verir və bu sahədə çalışan pedaqoji işçilərə gərəkli yardımlarını göstərir. Məhz bunun nəticəsidir rayonda mövcud olan 63 ümumtəhsil məktəbinin, 15 məktəbəqədər, 4 məktəbdən kənar və 1 peşə təhsili müəssisəsinin həm pedaqoji kadr, həm də şagird potensialı yetərincədi. Yəni bu məktəblərdə ölkənin ali təhsil məktəblərini bitirmiş gənc kadrlarla yanaşı, uzun illərdi ki, fəaliyyət göstərən, həyatlarını təlim-tərbiyəyə həsr edən qocaman pedaqoqlar da sabahımız olan şagirdlərin biliklərə yiyələnməsində öz sözlərini deyir, öz biliklərini günün tələbləri səviyyəsində şagirdlərin mənimsəməsinə çalışırlar. Təbii ki, bu işdə onlara müasir avadanlıqlar, kompüterlər yardımçı olur.

Bugünkü İmişlidə rəqəmlərin dili ilə ifadə etsək, 15004 şagirdin təlim-tərbiyəsi ilə 1486 nəfər məşğul olur ki, bunların da hər birinin kifayət qədər təcrübəsi var. Üstəlik, maraqlı bir məqam da ondan ibarətdir ki, şagirdlərin təlim-tərbiyəsi ilə məşğul olan həmin pedaqoqların 65 faizini, yəni 975 nəfərini qadınlar təşkil edir. Məhz həmin pedaqoqların şagirdlərdə yaratdığı maraq, elmə olan həvəs məktəblərdə fizika, riyaziyyat, kimya və digər fənlər üzrə şagirdlər arasında bilik yarışmaları təşkil olunmuş, bütövlükdə isə şagirdlərin ədəbiyyatımıza, tariximizə, dilimizə olan maraqlarını təmin etmək üçün konkret layihələr həyata keçirilmiş, əlavə dərs vəsaitləri hesabına onların biliklərinin artırılmasına təkan verilmişdi.

İmişli rayonunda təhsilin əsas göstəricilərindən biri də burada məktəblərdə dərs saatlarının nizamlanması, yəni növbəlilik sisteminin düzgün planlaşdırılması, eləcə də ötən tədris ilinin yekunlarına görə ali məktəblərə qəbul olunan şagirdlərin say artımının diqqət çəkməsidi. Fikirlərimizi bir az da geniş şərh etsək, onda göstərmək lazımdır ki, ötən il rayonun 27 ümumtəhsil məktəbində birnömrəli iş rejimi tətbiq olunmuşdu. Bununla paralel olaraq məktəblərin təmiri, yenidən tikilməsi, istilik sistemlərinin və digər texniki problemlərin həll olunması istiqamətində də böyük işlər görülmüşdü. Nəticədə 30 məktəbdə mərkəzləşdirilmiş istilik sistemi quraşdırılmışdı. Təbii ki, görülən işlərin miqyası nə qədər böyük olmasına baxmayaraq, bu gün İmişlidə yeni məktəb binalarının tikintisinə, təmirinə də böyük ehtiyac özünü göstərir. Rayon icra hakimiyyəti başçısının hesabat məruzəsində vurğulandığı kimi, hazırda rayonda 63 tümumtəhsil müəssisəsinin 7-də yeni tədris binasının tikintisinə, 8-də isə əsaslı təmir işlərinin görülməsinə ehtiyac var. Bundan başqa 16 məktəbəqədər tərbiyə müəssisəsinin 13-nün yenidən tikilməsinə və yaxud da onların əsaslı təmir olunmasına böyük təlabat danılmazdır. Görülən işlərin və problemlərin ümumi fonunda birmənalı olaraq vurğulamaq lazımdır ki, 2012-2013-cü tədris ilinin yekunlarına görə, İmişlidə ali təhsil müəssisələrinə qəbul olunmaq üçün sənəd vermiş məzunların sayı xeyli artmışdı. Əgər rəqəmlərlə ifadə etsək, 2013-cü ildə tam orta təhsilini başa vurmuş 1292 nəfər məzundan 477 nəfəri TQDK-ya sənəd vermiş və onlardan da 205 nəfəri, yəni 42,7 faizi tələbə adını qazanmışdı. Bu isə 2012-ci ilin nəticələri ilə müqayisədə 52 nəfər çox deməkdir. Həmin qəbul olunmuş tələbələrin 14 nəfəri 500-dən artıq, 8 nəfəri 600-dən yuxarı, bir nəfəri isə 695 bal toplamaqla İmişlinin təhsil işçilərinin zəhmətini necə deyərlər, əsl sevincə çevirmişdi. Həmin 695 bal toplayan məzun rayonun 7 saylı tam orta məktəbini bitirmiş Əsmər Valeh qızı İsgəndərovadı. O artıq Tibb Universitetinin tələbəsidir. Ümumiyyətlə isə təhsildəki uğurlarını müqayisə edəndə rayonun şəhər məktəbləri ilə yanaşı, Muradxanlı, Buludlu, Məzrəli, Qızılkənd və digər məktəblərinin adları ön cərgədə çəkilir. Təəssüf ki, rayonun bir çox məktəblərində, xüsusilə kənd məktəblərində hələ də həm kadr baxımından, həm də təhsildə qazanılması vacib olan uğurlar baxımından böyük problemlər yaşanmaqdadır. Yəqin ki, İmişlinin təhsili üçün məsuliyyət daşıyan şəxslər builki dərs ilinin yekunlarında problemlərin ortadan qaldırıldığı barədə danışmaq imkanı qazanacaqlar. Bu gün İmişlidə insanların təkcə maariflənməsi, təhsilə sahib olması, biliklərə baş vurması deyil, həm də sağlam həyat tərzinə malik olması üçün də uğurlu işlər görülür. Bir vaxtlar şüar kimi səslənən "Sağlam bədəndə sağlam ruh olar" deyimi indi regionlarımız üçün, eləcə də İmişli üçün xüsusi önəm daşıyır. İnsanlar səhiyyə ilə bağlı sağlamlıqla əlaqədər ölkənin digər şəhər və rayonlarına üz tutmağı yavaş-yavaş unutmağa başlayırlar. Bu da səbəbsiz deyil. Çünki İmişlidə fəaliyyət göstərən 9 xəstəxana, 12 həkim məntəqəsi, 29 tibb məntəqəsi, 1 poliklinika və digər səhiyyə ocaqları demək olar ki, zəruri avadanlıqlarla, müasir biliklərə yiyələnmiş tibbi personalla təmin olunub. Faktiki olaraq bu gün İmişlidə 126 nəfər yüksək ixtisaslı həkim, 493 nəfər orta ixtisaslı tibb bacısı çalışır. Onu da vurğulayaq ki, mərkəzi rayon xəstəxanasında ötən ildən başlayaraq yeni şöbələr də açılmışdı. Onlardan biri də "dializ" şöbəsidi. Doğrudu, rayonun səhiyyə sahəsində müəyyən işlər görülsə də ancaq bu gün etiraf etmək lazımdır ki, İmişlidə ali təhsilli həkimlərə orta ixtisas təhsilli tibb işçilərinə xeyli ehtiyac var. Elə rayon rəhbərliyinin hesabatında da göstərildiyi kimi "hazırda rayonun səhiyyə müəssisələrində ayrı-ayrı ixtisaslar üzrə 61 nəfər həkim və 72 nəfər orta ixtisaslı tibb bacısına ciddi tələbat vardı".

Bəli, biz İmişlinin bügünündən, uğurlarından, bu bölgənin inkişaf tempindən, həmçinin problemlərindən əldə etdiyimiz bilgilərə əsaslanaraq fikirlərimizi sizinlə bölüşdük. Düşünürük ki, uğurlara imza atan İmişli hələ böyük yolun astanasındadı. Onu daha böyük uğurlar sabahlarda gözləyir.

Əbülfət Mədətoğlu

Ədalət.-2014.-25 aprel.-S.7.