UZAQ, YAXIN-DOĞMA BALAKƏN...

(əvvəli ötən sayımızda)

Rayonda bitkiçiliklə yanaşı heyvandarlığın da inkişaf etdirilməsi diqqət mərkəzində saxlanılmış, iribuynuzlu mal-qaranın, qoyun-keçilərin, quşların və arı ailələrinin baş sayı və bütün növ məhsulların istehsalı üzrə artım əldə olunmuşdur.

Cənab Prezidentin tapşırığına uyğun olaraq rayonda quşçuluq sənayesinin inkişaf etdirilməsi üçün mövcud əlverişli şərait nəzərə alınmış, Qaysa kəndində inkubasiya təsərrüfatı yaradılmış və istifadəyə verilmişdir. Təsərrüfatın bir dəfəyə 5000 yumurtadan cücə çıxartmaq gücü vardır. Cari ildə rayon üzrə ümumi əkin sahələri əvvəlki ilə nisbətən 314 ha və yaxud 2,7%, 2011-ci ilə nisbətən isə 2969 ha və yaxud 32,5% artmışdır. Bütövlükdə 2014-cü ilin 6 ayında aqrar sahədən 25,4 mln. manatlıq gəlir əldə edilmişdir ki, bu da əvvəlki ilə nisbətən 1,3 mln. manat çoxdur. İstehsal olunan məhsulun 11,3 mln manatı bitkiçilik, qalan yəni qalan 14,1 mln manat isə heyvandarlıq məhsullarının payına düşmüşdür...

Bələdiyyələrin fəaliyyəti genişlənir və formalaşır

Öyrənirik ki, keçən dövr ərzində bələdiyyələr tərəfindən 59 nəfərə həyətyanı sahə kimi 5,02 ha, 3 nəfərə sahibkarlıq fəaliyyəti üçün 90 m2 torpaq sahəsi satılmışdır. Eyni zamanda, Katex bələdiyyəsində kənd təsərrüfatı məhsulları istehsalı məqsədi ilə 48,5 ha torpaq sahəsi hərrac yolu ilə icarəyə verilmişdir.

Hesabat dövründə ekoloji tarazlığın qorunması və yaşıllaşdırma işlərinin aparılması sahəsində 20 ha meşə əkini aparılmış, 0,96 ha sahədə tinglik salınmış, hazırda həmin sahələrə xidmət göstərilir.

Katex-Balakən magistral yolunun kənarlarında, şəhərin küçə və parklarında 10 mindən çox həmişəyaşıl ağacın və bəzək kollarının əkilməsi təmin edilmişdir.

2014-cü ilin birinci yarısında rayon ərazisində abadlaşdırma, tikinti, təmir və quruculuq işləri sürət və keyfiyyətlə aparılmışdır.

Ölkə Prezidenti cənab İlham Əliyevin 2013-cü ilin avqust ayında imzaladığı Sərəncama əsasən tikintisi üçün vəsait ayrılmış Balakən-Sarıbulaq-Qabaqçöl-Xalatala yolunda işə başlanılmış və birinci mərhələ başa çatdırılmışdır.

Cənab Prezidentin həmin tarixdə imzaladığı digər Sərəncama əsasən rayonda abadlıq işlərinin davam etdirilməsi üçün icra hakimiyyətinə ayrılan vəsait hesabına işlərin görülməsi davam etdirilir. Birinci yarımillikdə həmin vəsait hesabına şəhərin Rafiq Səmədov küçəsində yerləşən bağ abadlaşdırılaraq yenidən qurulmuş və burada Soyqırım qurbanlarının xatirəsinə abidə kompleksi tikilmişdir. Həmin küçədə "Veteranlar bağı" salınmış, küçələrdə yol nişanları daha müasirləri ilə əvəz edilmişdir. Şəhərdə 20 kommunal binanın dam örtüyü dəyişdirilmiş, 16 binanın isə fasad hissələri mişar daşı və dekorativ daşlarla üzlənmişdir. Heydər Əliyev adına mədəniyyət və istirahət parkının giriş hissəsi yenidən qurulmuşdur. Şəhərin Heydər Əliyev və Atatürk prospektlərində, Nəriman Nərimanov, Rafiq Səmədov, Məhəmməd Əsədov, Əli Ansuxski küçələrində və Soyqırım bağında 10100 kvadrat metr tamet plitə, 2755 poqometr metr bordür düzülmüş, 2271 kvadrat metr küçə divarı dekorativ daşlarla üzlənmiş, 170 yeni işıq dirəyi basdırılmışdır. Balakənçay körpüsünün kənarı kollardan təmizlənmiş, həmin ərazi yeni üslubda yaşıllaşdırılmışdır. Qabaqçöl qəsəbəsinin mərkəzində yerləşən park abadlaşdırılmış, ərazi işıqlandırılmışdır. Hazırda abadlıq işləri davam etdirilir.

Məktəb tikintisi sahəsində 280 yerlik Talalar kənd tam orta məktəbinin inşası başa çatdırılmış və bina yeni dərs ilinə şagirdlərin istifadəsinə veriləcəkdir. Rayonun Qaysa kəndində 20 yerlik körpələr evi-uşaq bağçası tikilərək istifadəyə verilmişdir. Şəhərdə, Şərif və Şambul kəndlərində yeni uşaq bağçalarının tikintisi, Sarıbulaq kəndində isə uşaq bağçasının əsaslı təmiri işləri davam edir.

Hesabat dövründə respublika və rayon əhəmiyyətli avtomobil yollarına xidmət göstərilmiş, asfalt-beton qarışığı və çınqıl materialı ilə təmir işləri aparılmış, şəhər küçələrinin asfaltlaşdırılmasına başlanılmışdır.

Kəndarası yollar müasirləşir

Yerli bələdiyyələrin vəsaiti hesabına 1,5 km kəndarası yollara asfalt tökülmüşdür. Hazırda bu iş bələdiyyələr tərəfindən davam etdirilir və ilin sonunadək kəndlərdə daha 8 km məsafədə yol asfaltlanacaqdır. Uzun illər ərzində kəndlərdə yollar bələdiyyələr tərəfindən qum-çınqılla təmir olunmuşdur.

Belə yol təmiri isə müasir tələblərə cavab vermir. Son iki ildə bələdiyyələrin kənd yollarının asfaltlaşdırılması istiqamətində fəaliyyəti təqdirəlayiqdir. Ötən dövr ərzində bələdiyyələr tərəfindən 22,4 km uzunluğunda kəndarası yollara qum-çınqıl döşənmiş, 4,4 km uzunluğunda su kanalları və arxlar təmir edilmiş, 3,0 km uzunluğunda yeni içməli su xətləri çəkilmiş, abadlıq və yaşıllaşdırma işləri aparılmışdır. Bununla belə bələdiyyələr daha çox yerli əhəmiyyətli sosial problemlərin həllinə nail olmalıdırlar. Bunun üçün bələdiyyələr öz büdcələrinin gəlir hissəsinin tam icra olunmasına nail olmalı və həmin vəsaitləri seçicilərin iştirakı ilə şəffaf şəkildə müxtəlif problemlərin həllinə yönəltməlidirlər.

Hesabat dövründə ümumi sahəsi 2534 m2 olan 23 fərdi yaşayış evi, ümumi sahəsi 1510 m2 olan 15 ədəd xidmət və sahibkarlıq obyektləri tikilərək istifadəyə verilmişdir.

Əhalinin təhlükəsizliyi tədbirləri çərçivəsində Mazımçay sistemində 180 p/m uzunluğunda, İnterçayın Şərif kəndindən keçən hissəsində 390 p/m, Balakənçay sistemində 100 p/m uzunluğunda daş beton bənd tikilib istifadəyə verilmişdir. Katexçayda Əsgərovlar məhəlləsində 100 p/m uzunluğunda daş-beton bənd tikintisinin başlanılması üçün hazırlıq işləri görülür. Balakən çay sisteminin daş-beton bəndində 220 m3 həcmində təmir, çaylarda 280 min m3 həcmində məcraların təmizlənməsi işləri aparılmışdır.

Xidmət təşkilatlarının fəaliyyəti tələblərə uyğun qurulur

Əhalinin içməli su ilə təminatının yaxşılaşdırılması sahəsində su anbarları, magistral və şəhər su xətləri təmir olunmuş, şəhərin Ə. Ansuxski və Nizami küçələrində yerləşən 3 yaşayış binasının su və kanalizasiya xətləri yenilənmiş, kanalizasiya lyukları tikilmişdir. Azərbaycan Respublikası Prezidentinin "Əkin sahələrinin suvarma suyu ilə təminatının yaxşılaşdırılmasına və əhalinin içməli suya olan tələbatının ödənilməsinə dair əlavə tədbirlər haqqında" 29 yanvar 2014-cü il tarixli Sərəncamına əsasən rayonda qazılması nəzərdə tutulan 10 artezian quyusundan 8-i qazılaraq istifadəyə verilmişdir. Digər 2 quyunun qazılması və istifadəyə verilməsi ilə bağlı işlər aparılır. Sarıbulaq kəndində mövcud su quyusundan 3 km məsafədə su şəbəkəsi qurulmuşdur.

(ardı gələn sayımızda)

Məzahir ƏHMƏDOĞLU

Ədalət.-2014.-16 avqust.-S.4.