UZAQ, YAXIN-DOĞMA BALAKƏN...

(əvvəli ötən saylarımızda)

2014-cü ilin birinci yarısında əhaliyə elektrik enerjisi verilişi sahəsində keyfiyyətin artırılması üçün 11 transformator əsaslı, 74 transformator cari təmir edilmişdir. Yüksək və aşağı gərginlikli elektrik hava xətlərində 15 yeni dəmir beton dayaq basdırılmış, 2 yeni xətt ayırıcısı quraşdırılmış, 6,9 kilometr məsafədə təmir işləri aparılmışdır. Şəhər ərazisində 1,87 kilometr məsafədə 0,4 kvt-luq elektrik verilişi xətləri "SİP" kabellə əvəz edilmişdir.

Əhaliyə rabitə xidmətlərinin göstərilməsi sahəsində Meşəşambul kəndində 256 nömrə tutumlu yeni elektron telefon stansiyası quraşdırılmış, xətt şəbəkəsi qurulmaqla əhaliyə telefon çəkilişinə başlanılmışdır. Ə. Ansuxski küçəsində 400 metr, R. Səmədov küçəsində 700 metr məsafədə hava rabitə xətlərinin yeraltı aparılması üçün kabel kanalizasiya quyusu texniki normaya gətirilmiş, kəndlərdə 1600 metr məsafədə kabel təmir olunmuşdur.

Təhsil və səhiyyə yenilikləri

Fənn olimpiadalarının respublika turunda iştirak edən 19 nəfər şagirddən 7 nəfəri olimpiadanın qalibi olmuşdur. Şagirdlərdən 1 nəfəri I yeri, 1 nəfəri II yeri, 5 nəfəri isə IV yeri tutmuşdur. Olimpiada qaliblərindən 5 nəfəri humanitar və texniki təmayüllü liseyin, 1 nəfəri Yeni Şərif,1 nəfəri isə Qaysa kənd tam orta məktəblərinin şagirdləridir.

Ümumtəhsil məktəblərinin IX və XI siniflərində buraxılış imtahanlarının mərkəzləşdirilmiş qaydada keçirilməsi üçün müvafiq hazırlıq tədbirləri görülmüş və 2 fəndən buraxılış imtahanları mərkəzləşdirilmiş qaydada Azərbaycan Respublikası Tələbə Qəbulu üzrə Dövlət Komissiyası tərəfindən keçirilmişdir. IX sinif üzrə 1042, XI sinif üzrə isə 686 nəfər şagird bu tədris ilində müvafiq kurs üzrə məktəbi bitirmişdir.

Müasir Azərbaycan tarixinin ümumtəhsil məktəblərində daha səmərəli öyrənilməsi məqsədi ilə Heydər Əliyev Mərkəzində Təhsil Nazirliyi tərəfindən müəyyən edilmiş mövzulara uyğun dərslər ümumtəhsil məktəblərinin XI sinif şagirdlərinə tədris olunmuş, dərslər may ayının 26-dək davam etmişdir.

Əhaliyə tibbi xidmətlərin göstərilməsi sahəsində müsbət tendensiya davam etmiş, 390 cərrahiyyə əməliyyatı keçirilmiş, 605 uşaq doğulmuşdur. Bu müddət ərzində müxtəlif ixtisaslı həkimlərdən ibarət briqadalar daima ucqar kəndlərdə olmuş, əhali arasında həm müayinə, həm də tibbi maarifləndirmə işləri aparmışlar. Ölkə Prezidenti cənab İlham Əliyevin təşəbbüsü və tapşırığına əsasən rayon əhalisinin tibbi müayinədən mütəşəkkil keçirilməsinə rəhbərlik və nəzarəti təmin etmək üçün rayon qərargahı yaradılmış, rayonda əhalinin kütləvi tibbi müayinədən keçirilməsi təmin olunmuşdur.

Rayon ərazisində sanitar gigiyenik nəzarətdə olan obyektlərdə profilaktik tədbirlər həyata keçirilmiş və əhali arasında xüsusi təhlükəli infeksiyalar qeydə alınmamışdır.

Birinci yarımilin statistik göstəriciləri

Hesabat dövründə rayonun əsas sosial iqtisadi göstəriciləri əhəmiyyətli dərəcədə yüksəlmiş, ümumi məhsul buraxılışı 64,8 milyon manat təşkil etmişdir. 25,4 milyon manatlıq kənd təsərrüfatı məhsulu, 3,6 milyon manatlıq sənaye məhsulu istehsal edilmiş, 9,2 milyon manatlıq tikinti işləri görülmüşdür. Keçən ilin müvafiq dövrü ilə müqayisədə kənd təsərrüfatı məhsulu istehsalı 5,4 faiz, sənaye məhsulu istehsalı 13,2 faiz artmışdır. Ümumi məhsul buraxılışında kənd təsərrüfatı istehsalının xüsusi çəkisi 39,1 faiz, sənayenin xüsusi çəkisi 5,6 faiz, tikinti işlərinin xüsusi çəkisi 14,3 faiz təşkil etmişdir.

Hesabat dövründə rayon büdcəsinin ümumi gəlirlər üzrə proqnozu 115.7 faiz, cari gəlirlər üzrə proqnozu isə 126,1 faiz yerinə yetirilmişdir. Yerli gəlirləri və xərcləri tənzimləmək üçün mərkəzləşdirilmiş xərclərdən ayrılan vəsait 114,2 faiz təşkil etmişdir.

2014-ci ilin birinci yarısında polis şöbəsi tərəfindən 63 cinayət hadisəsi qeydə alınmış, onlardan 96,1 %-nin üstü açılmışdır. Əvvəlki ilin müvafiq dövrü ilə müqayisədə ümumi cinayətlərin sayı 34 fakt azalmış, açılma faizi yüksəlmişdir.

Vətəndaş müraciətlərinə qayğı və diqqət

2014-cü ilin birinci yarısında RİH başçısı yanında şuranın 10 yığıncağı keçirilmiş, həmin yığıncaqlarda sosial-iqtisadi inkişafın müxtəlif sahələrini əhatə edən 24 məsələ müzakirə olunmuşdur. Vətəndaşların müraciətlərinə baxılması işinin təkmilləşdirilməsi rayon icra hakimiyyətinin fəaliyyətində mühüm vəzifə olaraq daim diqqət mərkəzində saxlanılır. Hesabat dövründə RİHB aparatında vətəndaşların qəbulu, məktub, ərizə və müraciətlərinə baxılması sahəsində bir sıra işlər görülmüş, vətəndaşların qanuni tələblərinin yerinə yetirilməsinə, eləcə də imkansız vətəndaşların müxtəlif sosial problemlərinin həllinə yardımlar göstərilmiş, imkan xaricində olan, əsassız hesab edilən müraciətlərlə bağlı ətraflı izahatlar verilmişdir.

Cari ilin 6 ayı ərzində RİHB aparatına 532 vətəndaş müraciəti daxil olmuş, RİHB tərəfindən 268 nəfər vətəndaş qəbul edilmişdir. Ötən illə müqayisədə daxil olan müraciətlərin sayı 645 ədəd ( 2,2 dəfə) azalmışdır.

Vətəndaş müraciətlərinə həssaslıqla yanaşılmasının nəticəsində yuxarı orqanlardan 215 ədəd və ya ötən ilin müvafiq dövründən 3 dəfə az, Respublika Prezidenti Administrasiyasından 186 ədəd və ya ötən ilin müvafiq dövründən 3,1 dəfə az müraciət daxil olmuşdur. Cari ilin 6 ayı ərzində RİHB aparatına 20 ədəd kollektiv müraciət, 22 ədəd təkrar müraciət daxil olmuşdur. Ötən ilin müvafiq dövrü ilə müqayisədə kollektiv müraciətlər 2 dəfə, təkrar müraciətlər isə 2,3 dəfə azalmışdır.

Məzahir ƏHMƏDOĞLU

Ədalət.-2014.-19 avqust.-S.3.