Gənclərin "Bəla"sı

"Narkomaniyadan özümüzü qoruyaq" layihəsi çərçivəsində hazırlanan tamaşa maraqla qarşılandı

Narkomaniya əsrin ən təhlükəli bəlalarından sayılır. Bu xəstəliyə tutulanlar arasında gənclərin çoxluq təşkil etməsi cəmiyyətdə ciddi narahatlıq doğurmaya bilməz. Təsadüfi deyil ki, dövlət orqanları, ictimai təşkilatlar müxtəlif layihələr həyata keçirərək gənclərimizi bu qorxunc bəladan qorumağın yollarını axtarırlar. Gənclər və İdman Nazirliyinin Bakı şəhər Gənclər və İdman Baş İdarəsi ilə Səhiyyə Nazirliyinin İctimai Səhiyyə və İslahatlar Mərkəzinin birgə həyata keçirdiyi "Narkomaniyadan özümüzü qoruyaq" layihəsi də belə tədbirlərdəndir. Layihə çərçivəsində müxtəlif tədbirlər keçirilir, maarifləndirmə işləri aparılır və bütün bu işlər gənclər arasında böyük dəstək qazanır.

Rəşid Behbudov adına Dövlət Mahnı Teatrında "Narkomaniyadan özümümü qoruyaq" layihəsi çərçivəsində hazırlanan Asif Kəngərlinin "Bəla" tamaşası gənclərin müzakirəsinə verilib. Maraqlıdır ki, Əli Əmirov adına Mədəniyyət Sarayında fəaliyyət göstərən dram dərnəyi "Bəla"nı elə gənc istedadların iştirakı ilə hazırlayıb.

Tamaşadan əvvəl çıxış edən Səhiyyə Nazirliyinin İctimai Səhiyyə və İslahatlar Mərkəzinin layihələr üzrə şöbə müdiri Günel Babazadə narkomaniya kimi təhlükəli bəla ilə mübarizə sahəsində ölkədə aparılan işlər barədə ətraflı məlumat verib, "Narkomaniyadan özümüzü qoruyaq" layihəsinin əhəmiyyətindən danışıb. Günel Babazadənin sözlərinə görə, layihənin əsas məqsədi narkomanlığın fəsadları haqqında gənclərimizdə düzgün təsəvvürlərin formalaşdırılması, eyni zamanda cəmiyyətin diqqətini bu problemə cəlb etməkdən ibarətdir.

Sonra söz Gənclər və İdman Nazirliyinin Bakı şəhər Gənclər və İdman Baş İdarəsinin rəisi Raqif Abbasova verilib. Raqif Abbasov bildirib ki, Azərbaycan dövləti gəclərin sağlam həyat tərzi keçirmələrinə, pis və təhlükəli vərdişlərdən qorunmalarına ciddi önəm verir, bununla bağlı mühüm addımlar atır. Baş idarə rəisi Azərbaycan Prezidenti İlham Əliyevin 24 iyun 2013-cü il tarixli sərəncamı ilə təsdiqlənmiş "Narkotik vasitələrin, psixotrop maddələrin və onların prekurslarının qanunsuz dövriyyəsinə və narkomanlığa qarşı mübarizəyə dair Dövlət Proqramının (2013-2018-ci illər)" icrası ilə bağlı görülən işlər barəsində danışıb, bu sahədə atılan müsbət addımları mərasimə toplaşanların diqqətinə çatdırıb. Raqif Abbasov gənclər arasında maarifləndirmə işlərinin davamlı və səmərəli aparılmasını vacib sayıb və "Narkomaniyadan özümüzü qoruyaq" layihəsi çərçivəsində hazırlanan "Bəla" tamaşasının əhəmiyyətini qeyd edib.

"Bəla" pyesinin müəllifi, həkim-narkoloq Asif Kəngərli söz alaraq tədbirin ərsəyə gəlməsində köməyi olan hər kəsə minnətdarlığını çatdırıb. O, qeyd edib ki, gəncləri narkomaniya kimi təhlükəli bəladan qorumaq üçün daha geniş təbliğat işlərinin aparılması vacibdir.

Sonra səhnəyə Əli Əmirov adına Mədəniyyət Sarayındakı dram dərnəyinin üzvləri çıxıblar və Asif Kəngərlinin "Bəla" pyesi əsasında hazırladıqları tamaşanı təqdim ediblər. Əsər narkotik alverçilərinin toruna düşən gənclərin həyatından bəhs edir. Narkoman olduqdan sonra hər şeylərini itirən bu gənclər sonda səhv yolda olduqlarını başa düşür və sağlam həyata qayıdırlar.

Tamaşanın quruluşçu rejissoru Fuad Cavadzadədir. Rolları gənc istedadlar Əlixan Ağakişiyev, Səbinə Quliyeva, Turan İsmayılzadə, Cavidan Quliyev, Sənan Quliyev, Fuad Cavadzadə və başqaları ifa ediblər.

Sonda tamaşanın hazırlanmasında əməyi keçənlərə Bakı şəhər Gənclər və İdman Baş İdarəsinin fəxri fərmanları təqdim olunub.

Ədalət.-2014.-10 dekabr.-S.13.