ÜMUMTƏHSİL SİSTEMİNDƏ MÜASİRLƏŞMƏ DÖVRÜ

(Mövzu əsasında XXVI yazı)

Ölkə rəhbərliyinin qayğı və diqqəti

Müstəqil Azərbaycanın tarixinə şərəfli səhifə kimi yazılan XXI yüzilliyin ilk illərindən indiyədək nəzər yetirərkən yaddaşımızda ölkədə uğurla həyata keçirilən güclü iqtisadi, sosial-mədəni tərəqqinin əzəmətli mənzərəsi canlanır. Bütün sahələrdə baş verən bu dinamik inkişafın mənbəyində Ulu öndər Heydər Əliyev tərəfindən düşünülmüş siyasət əsasında Prezident İlham Əliyev cənablarının uğurla davam etdirdiyi genişmiqyaslı islahat tədbirləri dayanır. Bu mənada təhsil sahəsində aparılan islahatları xüsusi qeyd etmək gərəkdir.

Təhsil sistemində aparılan islahatların əsas məqsədini milli kurikulumun tələblərinə cavab verən, milli-mənəvi dəyərlərə əsaslanan, beynəlxalq standartlara uyğun və inkişaf etmiş ölkələrin təhsil sisteminə inteqrasiyası təşkil edir.

Bu baxımdan Azərbaycan Respublikasının Təhsil Qanunu təhsil işçiləri qarşısında öz məsuliyyətlərini dərk edən, xalqın milli ənənələrinə və demokratiya prinsiplərinə, insan hüquqları və azadlıqlarına hörmət edən, vətənpərvərlik və azərbaycançılıq ideyalarına sadiq olan, müstəqil və yaradıcı düşünən vətəndaş və şəxsiyyət yetişdirmək kimi vəzifələr qoymuşdur.

Cəmiyyətin hərəkətverici qüvvəsi

Müasir dünyada hər bir ölkənin uğurlu gələcəyi həmin ölkədə təhsilini səviyyəsi ilə müəyyən olunur. Təcrübə göstərir ki, təbii sərvətlərin bolluğu dövlətin inkişafının əsas göstəricisi deyil, başlıcası bu sərvətlərin cəmiyyətin hərəkətverici qüvvəsi olan insan kapitalına çevrilməsini təmin etməkdir. Bu, indiki mərhələdə təhsil sisteminin ən zəruri vəzifəsidir. ABŞ, Yaponiya, Cənubi Koreya və digər inkişaf etmiş ölkələr malik olduqları maddi resurslardan daha çox təhsil sisteminin yetişdirdiyi insan kapitalından böyük gəlirlər əldə etmişdirlər. Bu ölkədə inkişafa təsir göstərən amillər içərisində təhsilin çəkisi əhəmiyyətli dərəcədə yüksək olub, təxminən 70 faiz təşkil edir.

Strateji istiqamətlər

Artıq inamla demək mümkündür ki, Azərbaycan təhsili də hərtərəfli inkişafa doğru geniş istiqamət götürmüşdür. Bu gün Azərbaycan həm regionun, həm də Avropanın siyasi cəhətdən stabil ölkəsinə çevrilmişdir. Azərbaycanın bütün sahələrdə sürətli inkişafı ölkə Prezidenti İlham Əliyevin yeni idarəetmə modeli sayəsində mümkün olmuşdur.

Təhsilə ayrılan büdcə 2003-cü illə müqayisədə 6 dəfədən çox artaraq proqnozlaşdırılan səviyyəni də ötüb keçmişdir. Məhz bunun nəticəsidir ki, təhsil tariximizdə ilk dəfə olaraq 17 inkişafyönlü dövlət proqramı təsdiq olunmuş və uğurla həyata keçirilmişdir.

Bu proqramın reallaşması nəticəsində təhsilin müasir tələblər səviyyəsində qurulması və məzmununun yeniləşdirilməsi, təhsil alanların nailiyyətlərinin qiymətləndirliməsi üzrə yeni modellər və mexanizmlərin tətbiqi, təhsil müəssisələrinin informasiya-kommunikasiya texnologiyaları ilə təmin edilməsi və başqa sahələrdə əhəmiyyətli nailiyyətlər əldə olunmuşdur.

Son illərdə Azərbaycanda ümumilikdə bir növbədə 600 min şagird yerlik 2000-dən çox yeni məktəb binası tikilməsi və əsaslı təmiri müasir təhsil tariximizin ən parlaq səhifələrindən biridir. Heydər Əliyev Fondunun təşəbbüsü ilə 300-dən çox yeni məktəb, uşaq bağçası, internat məktəbi tikilib istifadəyə verilmiş, müasir avadanlıqlarla təmin edilmişdir.

(ardı gələn sayımızda)

Məzahir ƏHMƏDOĞLU

Ədalət.-2014.-5 fevral.-S.7.