ÜMUMTƏHSİL SİSTEMİNDƏ MÜASİRLƏŞMƏ DÖVRÜ

(Mövzu əsasında XXVI yazı)

(əvvəli ötən sayımızda)

Göyçay rayonunda da belədir...

Bütün bunlar və təhsilin digər strateji istiqamətləri Göyçay rayonunda da xüsusi diqqət mərkəzindədir. Rayon rəhbərliyi özünəməxsus ənənələri olan Göyçay təhsil sisteminin daha böyük uğurlar qazanması üçün müntəzəmliklə effektiv tədbirlər həyata keçirir. Elə rayon təhsil şöbəsinin müdiri, təcrübəli pedaqoq Asif Nəbiyev də həmişə Təhsil Nazirliyi və Göyçay rayon rəhbərliyinin qayğı və diqqətinə cavab olaraq pedaqoji kollektivlərin səmərəli fəaliyyətindən inamla söhbət açır.

Dərs ilinin ikinci yarısı

Göyçay Rayon Təhsil Şöbəsinin müdiri Asif Nəbiyev deyir:

- 2013-cü tədris ilini uğurla başlayıb arzulanan səviyyədə başa vurmaq üçün ötən ilin yayından geniş hazırlıq işləri görülmüşdür. Əslində bu dərs ili üçün bir az da irəlidən başlanğıc götürülmüş, müəyyən tədbirlər həyata keçirilmişdir. Belə ki, 2013-cü il fəaliyyətimizi 2012-ci il dekabr ayının 27-də Təhsil Şurasında müzakirə və qəbul edilən "Fəaliyyət planı" əsasında qurmuşuq. Bu əsasda 2013-cü il bütünlüklə tədris sistemində fənn kurrikulumları vəzifələrinin həyata keçirilməsinə sərf edilmişdir. İl ərzində diqqəti təhsil sisteminin maddi-texniki bazasının yüksəldilməsi, tədrisdə ən müasir təlim metodlarının tətbiqi, şagird marağını təmin etmək üçün istedadlı şagirdlərlə işin təşkili, kadr potensialının bilik və bacarığının artırılması, keçirilən müsabiqə və yarışların keyfiyyətinin artırılması, məktəb-valideyn münasibətlərinin daha keyfiyyətli qurulması istiqamətində yönəltmişik.

Statistika

2013-cü tədris ilində RTŞ nəzdində 57 ümumtəhsil məktəbi, o cümlədən 40 tam orta, 13 ümumi orta, 4 ibtidai məktəb və 5 məktəbdənkənar tərbiyə müəssisəsi fəaliyyət göstərmişdir. Ümumtəhsil məktəbləri nəzdində 857 sinif komplekti açılmış və həmin siniflərdə 14971 nəfər şagirdə təhsilə cəlb edilmişdir.

Rayon ərazisində yaşayan 1495 nəfər şagird 88 sinif komplektində I siniflər üzrə tədrisə cəlb olunmuşdur.

Bildiyimiz kimi, Azərbaycan Respublikası Təhsil Nazirinin 17.07.2013-cü il tarixli 739 №-li əmri ilə 6 yaşı 15 sentyabr - 31 dekabr tarixlərində tamam olan uşaqların vaxtından əvvəl I sinfə qəbulu qaydaları təsdiq olunmuş, həmin əmrdən irəli gələn vəzifələri icra etmək üçün bütün təşkilatı tədbirlər həyata keçirilmiş, 197 valideyn müraciətinə baxılmış, 195 nəfər uşağın istedadlarının yoxlanılması təmin edilmiş və 89 nəfər uşağın 15 və artıq bal toplaması əsas götürülərək onların vaxtından əvvəl I sinfə qəbulu həyata keçirilmişdir.

Şagirdlərin təlimi ilə 2264 müəllim məşğul olmuşdur. 2013-cü ildə 5 məktəbdənkənar müəssisə, o cümlədən UGİM, Şahmat məktəbi, TYM, UYM və ETTM fəaliyyət göstərmiş, həmin müəssisələrin 131 qrupunda 1937 nəfər təlimə cəlb edilmiş, onların təlimi ilə 96 nəfər dərnək rəhbəri məşğul olmuşdur.

Həlli vacib olan məsələlər

2013-cü il ərzində Ulaşlı-Şıxlı kənd tam orta məktəbi üçün 220 yerlik, Şəkili kənd ümumi orta məktəbi üçün 80 yerlik yeni məktəb binaları tikilərək ümummilli liderin anadan olmasının 90 illiyi ərəfəsində şagirdlərin istifadəsinə verilmişdir. Hazırda Müskürlü kənd ümumi orta məktəbi üçün 120 yerlik, Qəvələ Müskürlü və Alıkənd kənd ibtidai məktəbləri üçün 80 yerlik yeni məktəb binalarının tikintisi sürətlə davam etdirilir.

Hesabat ilində məktəblərin inventar və avadanlığa tələbatını ödəmək üçün 847 ədəd məktəbli partası, 508 ədəd müəllim stolu, 1793 ədəd müəllim stulu, 612 ədəd kitab şkafı, 508 ədəd yazı lövhəsi,149 ədəd paltar şkafı, 68 ədəd kreslo alınaraq bölgü əsasında məktəblərə paylanmışdır.

Şagirdlərin dərsliyə olan tələbatını ödəmək üçün 112 adda 45501 nüsxə, o cümlədən 44148 nüsxə Azərbaycan bölməsi üçün, 1353 nüsxə rus bölməsi üçün dərslik və dərs vəsaiti gətirilərək bölgü əsasında şagirdlərin istifadəsinə verilmişdir.

Yola salınan ildə müəllim hazırlığına böyük diqqət yetirilmiş, VI siniflərdə fənn kurrikulumlarının tətbiqi ilə əlaqədar 752 nəfər müəllim müvafiq treninqlərdən keçirilmişdir.

(ardı gələn sayımızda)

Məzahir ƏHMƏDOĞLU

Ədalətt.-2014.-6 fevral.-S.7.