TƏRƏQQİ YOLLARINDA OLAN SAMUX

(Əvvəli ötən sayımızda)

Ölkə prezidenti cənab İlham Əliyevin regionların inkişafına göstərdiyi böyük diqqətin nəticəsidir ki, bu gün respublikamızın demək olar ki, bütün guşələrində uğurlu quruculuq işləri, abadlıq və bununla paralel olaraq yeni sosial-iaşə obyektlərinin tikintisi, yolların çəkilişi, qaz, su təminatının yaxşılaşdırılması sürətlə aparılır. Azərbaycan insanı həyatının bütün sahələrində uğurların, tərəqqinin izini görür.

Bu gün ölkəmizin digər bölgələri kimi, Samuxda da məhz həmin tələbin və diqqətin nəticəsi olan quruculuq işləri aparılır. Təsadüfi deyil ki, ötən ilin göstəricilərinə diqqət yetirəndə məlum olur ki, 2012-ci illə müqayisədə 2013-cü ildə xeyli uğurlara imza atılıb. Yəni görülən işlər birmənalı şəkildə ürək açıbdı. Məsələn, ümummilli liderəimizin adını daşıyan Heydər Əliyev mərkəzi istirahət parkı bütünlüklə yenidən qurulub. Burada günün tələblərinə cavab verən orijinal bir mənzərə yaradılıb. Parkın mərkəzində yerləşən Heydər Əliyev Mərkəzi də buradakı həmin o abadlığa, quruculuğa xüsusi bir yaraşıq veribdi. Ona görə də Samux sakinləri bu parka həvəslə gəlir və burdakı istirahət imkanlarından məmnunluqla yararlanırlar.

Xatırlatmaq yerinə düşər ki, bu parkda həmçinin tarixdiyarşünaslıq muzey idə inşa edilib. İstifadəyə verilmiş bu muzey samuxlular üçün öz bölgəldərini, özlərinin doğulduqları torpağın tarixini, adət-ənənəsini daha mükəmməl öyrənib yeni nəsillərə çatdırmaq üçün real bir vasitədir. Bu muzeyə gələnlər özlərinin dünənini, bu gününü ziyarət edib görüb öyrənirlər.

Samuxda aparılan tikinti işlərinin içərisində YAP-ın rayon təşkilatının binasının da öz yeri var. çox yüksək keyfiyyətlə və xüsusi layihə ilə tikilmiş bu bina da Heydər Əliyevin adını daşıyan parka əlavə gözəllik verir. Rayonda aparılan böyük tikintinin müəyyən hissəsini məktəb, uşaq bağçası və digər obyektlər təşkil edir. Bu gün Samuxda 220 şagird yerlik Seyidlər kənd tam orta məktəbi istifadəyə verilmişdi. İstifadəyə verilən bu məktəb bütün maddi-texniki avadanlıqlarla təmin olunmuşdur. Həmçinin Zazalı kənd və Alabaşlı qəsəbə tam orta məktəblərinin əsaslə təmiri də uğurla yekunlaşdırılmış, həmin məktəblər də qapılarını şagirlərinin üzünə açmışdı. Rayonda telekommunikasiya qovşağının yeni inzibati binasının da tikintisində böyük işlər görülmüşdü. Görülən bu işlərlə paralel aparılan 360 şagird yerlik Əhməbəyli və 220 şagird yerlik Qarabağlar kənd məktəblərində də işlər yekunlaşmaq üzrədir.

Bu gün Samuxda rayon icra hakimiyyətinin və aparatının rəhbərliyi altında aparılan böyük quruculuq işləri təbii ki, hər kəsi sevindirir. Bu işlərin sırasında rayon iqtisadiyyatı üçün əhəmiyyətli olan yeni istehsal və emal müəssisələrinin yaradılması xüsusilə təqdirəlayiqdlir. Çünki rayon sakinləri bu sahələrin inkişafı zəminində həm də yeni iş yerləri əldə etmiş olurlar. Ona görə də rayon rəhbərliyi bu məsələyə xüsusi diqqət yetirməklə müvafiq tədbirlər planı həyata keçirir. Artıq "Samux Quşculuq" MMC tam istifadəyə verilib. Rayonun iqtisadiyyatı və əhalinin məşğulluğu üçün daha bir mərhələ də "Aqroenerji" kompleksinin tikintisinin sürətlə aparılmasıdır. Rayonda daha bir neçə iri sənaye müəssisələrinin də istifadəyə veriləcəyi yaxın zamanlarda gerçəkləşəcəkdi.

Ölkə həyatında hər bir uğur təbii ki, müəyyən əks-səda doğurur. Yəni istənilən bir bölgədə həyat səviyyəsinin yüksəldilməsi digər bölgənin də fəallığını artırmağa, bir növu işgüzar yarışmanı reallaşdırır. Hər kəs öz bölgəsini daha gözəl və abad olması üçün yeni-yeni təkliflər və layihələrlə önə keçməyə çalışır. Bu mənada Samuxda küçə və yolların genişləndirilməsi, yaşıllıq zolaqlarının artırılması, aparılan tikinti işlərindəki milli ornamentlərdən istifadəyə üstünlük verilməsi, xüsusi olaraq yerli tikinti materiallarından yararlanma diqqəti çəkən bir uğurdur. Burda hər kəs rayonun coğrafiyasına, ekologiyasına uyğun bir mənzərənin yaradılması üçün, daha doğrusu, həmin tələblərə söykənən yüksəlişi əldə etmək üçün çalışır. Elə məktəb, uşaq bağçası və digər sosal obyektlərin tikintisində də qeyd etdiyimiz məqamlar nəzərə alınır.

Samux rayonunda da Qarabağ müharibəsinin ağrılarını yaşamış, döyüş səngərlərini keçmiş, şəhid və əlil ailələri də, həçminin qaçqın və köçkünlər də məskunlaşıb. Odur ki, rayon rəhbərliyi, xüsusi olaraq Qarabağ müharibəsi əlilləri və şəhid ailələrinə hər cür yardım göstərməyə çalışır. Artıq rayonda həmin əlil və şəhid ailələri üçün çoxmərtəbəli yaşayış binasının tikintisi üçün müəyyən işlər görülüb. Paralel olaraq rayonda Gənclər Evinin tikintisi üçün müvafiq qərar qəbul olunub.

Bəli, bu gün inkişaf yolunda olan Samuxda sözün bütün mənalarında həyat qaynayır, adamlar ölkə prezidentinin diqqət və qayğısını yaşadıqları bölgənin timsalında görür və müşahidə edirlər. Elə ölkə başçısının bugünlərdə keçirdiyi respublika konfransında da söylədiyi kimi, bu il Azərbaycanda "Sənaye ili" elan edilib. Deməli, Samux kənd təsərrüfatı rayonu olsa da, burada da iqtisadiyyatın ikinci bir qolu olan sənaye sektorunun inkişafı üçün də müəyyən imkanlar var. Bu imkanlardan faydalanmaq və rayonun ümumi həyat səviyyəsini daha da yüksəltmək samuxluların hər birinin arzusudur. Zaman bu arzunun gerçəkləşməsi üçün geniş meydan verir. Uğurlar olsun!

Ceyhun RÜSTƏMOV

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2014.-11 fevral.-S.7.