Ramiz Qusarçaylı ucalığına səyahət

Elə lap bugünlərdə fevralın qarlı-qırovlu, sazaqlı-şaxtalı bir günündə Sumqayıt ədəbi-bədii cameəsinin ən istəklilərindən olan, facebook sosial şəbəkəsindən yaxşı tanıdığımız fotoqraf Şakir Rəhmanın məmləkətimizin dilbər guşələrindən sayılan Qubaya birlikdə səfərə çıxmaq təklifini nə qədər gözlənilməz də olsa tərəddüt etmədən qəbul etdim. Düşündüm ki, həm gözəl bir gün keçirdib, kövrək ovqat yaşayaram həm də dağ vüqarlı dağlar oğlu, bütövləşmiş Türk kişisi, uca ruhlu milli şairimiz Ramiz Qusarçaylının çayından içib, ziyarətində bulunmaq şərəfinə nail olaram. Elə də oldu. Quba meşəsinin içində qardan sır-sır bağlamış ağacların arasında şirin bir taxta daxmaya saldıq görüş yerimizi. Məclisimizə Ramiz bəyin könül dostu, bənzərsiz istedadlı şairimiz Zakir Məmmədin bu məclisə telli sazla təşrif buyurması məclisimizi daha da rövnəqləndirmiş oldu. Zakir bəyin imzasını çox eşitmişdim. Hətta bir şerini hesab dəftərimə köçürdüyümü xatırlayıram

Bu kasıb cibimi;

Bu yazıq cibimi!

Cib, cib, cücələrim.

Bu cib də sənindir,

Bu biri cib də

Cibimə göz qoyub oturub

Nəcib də, nanəcib də.... (Zakir Məmməd)

Özümü tanıyandan Bakını, Təbrizi, Naxçıvanı, Tiflisi, İrəvanı, Borçalını, Dərbəndi,... tanımışam. Özümü tanıyandan tanımışam Qubanı da. Lakin nə gizlədim? Mən Ramiz Qusarçaylını, Zakir Məmmədi tanıyandan sonra düşdüm bu mübarək Qubamızın cazibəsinə. Necə ki, şairlər, aşıqlar, mərd ərənlər yurdu Qazağı İncə dərəsi ilə, Səməd Vurğunla, İsmayıl Şıxlıyla, Osman Qağayla, Qaçaq Kərəmlə, Akif Səmədlə, Məmməd İlqarla, Ağamalı Sadiqlə, Məmməd Dəmirçoğluyla, Çiçək Mahmudqızıyla...., Oğuz yurdu Tovuzu aşıq Elməddinlə, İlham Əsgəroğluyla, Ehtiram İlhamla... tanımışam. Sazlı-sözlü ulu Borçalını tanımağa təkcə Həmid Ormanlı yetər. Qubadan danışırdım. Sağ olsun Ramiz Qusarçaylı və Zakir Məmmədi. Qubanı mənə onlar anlatdı. Onların sayəsində dil tapdım Qubanın ağacı, daşı, quşu, ... ilə. Ana dedim Qubaya. Kaş o da oğul deyəydi mənə.

Əzəmətli ruh qardaşım Ramiz Qusarçaylının sayəsində tanıdım anam qədər doğmam olan Qusarçayımı. Mənimdir dedim, sevdim Qusarçayı. O, da sağ ol deyib içimi sərinlətdi. İndi mən Qusarın da, Xaçmazın da, Lerikin də, Astaranın da, Lənkəranın da, Balakənin də, Zaqatalanın da Ramiz Qusarçaylısını axtarıram. Adlarını sadaladığım və sadalamadığım hər yerin, Türkün torpağının hər qarışının Ramiz Qusarçaylıya ehtiyacı var. Bu bizə vətənimizin bütövlüyü üçün, millətimizin birliyi üçün lazımdır. Bayrağımızın rənglərinin sırası dəyişik düşmədən, əzəmətlə dalğalanması üçün lazımdır. Ramiz Qusarçaylının şerlərində Vətən var, millət var, haqqın müdafiəsi var, tərənnümü var. O, şeirlərin qoru içimi elə qarsılayıb ki,... Böyük M. K. Atatürk deyirdi ki, "Hər şey vətən üçün!" Paşamızın bu şüarını yadıma Ramiz Qusarçaylının qurd nəfəsli poeziyası saldı. Tanrı Türkü qorusun, Tanrı Sizi qorusun Ramiz Qusarçaylı.

Əkbər Paşa Xudulu

Neftçi-publisist

Ədalət.-2014.-15 fevral.-S.21.