MÜASİRLƏŞMƏNİN GÖYÇAY NÜMUNƏSİ

Ölkəmizin dinamik uğurlu inkişafı

İyul ayının 10-da Azərbaycan Respublikasının Prezidenti İlham Əliyev cənablarının sədrliyi ilə Nazirlər Kabinetinin 2014-cü ilin birinci yarısının sosial-iqtisadi inkişafın yekunlarına və qarşıda duran vəzifələrə həsr olunmuş iclası keçirilmişdir.

Dövlət başçısı iclası giriş nitqi ilə açaraq bildirmişdir ki, cari ilin birinci yarısında ölkəmizin uğurlu inkişafı təmin edilmiş və qarşıda duran bütün məsələlər uğurla icra edilmişdir. 6 ayda iqtisadiyyat 2,1 faiz artmış və sevindirici haldır ki, qeyri-neft sektorunda inkişaf 7 faiz səviyyəsindədir.

Əhalinin həyat səviyyəsi yüksəlmiş, pul gəlirləri 4,7 faiz artaraq inflyasiyanı 3 dəfə üstələmişdir. Ölkənin maliyyə vəziyyəti sabitdir və valyuta ehtiyatları 54 milyard manata çatmışdır.

Cənab prezident möhkəm əmin olduğunu bildirmişdir ki, ilin sonuna qədər də qarşıda duran bütün vəzifələr icra olunacaq və ölkəmizin dinamik uğurlu inkişafı davam edəcəkdir.

M.Məmmədov: Görülən işlərin həcmi böyükdür...

Nazirlər Kabinetində keçirilən iclasla əlaqədar Göyçay rayonundakı müşavirədə Göyçay Rayon İcra Hakimiyyətinin başçısı Mənsur Məmmədov məruzə ilə çıxış etmiş, 2014-cü ilin birinci yarsında görülmüş işlər barədə danışmışdır. M.Məmmədov demişdir:

- 2014-cü ilin birinci yarısı rayonumuz üçün də uğurlu olmuş, ümumi məhsul istehsalı 2013-cü ilin müvafiq dövrünə nisbətən 13,5 faiz və ya 12,6 milyon manat artaraq 105,8 milyon manata çatmışdır.

Ötən müddət ərzində 14,1 milyon manatlıq sənaye məhsulu istehsal edilmişdir ki, bu da ötən ilin eyni dövrü ilə müqayisədə 2,1 dəfə çoxdur. Rayonda sutkalıq istehsal gücü 25 ton olan müasir çörək istehsalı müəssisəsinin tikintisinə başlanılmışdır.

Sənaye məhsulunun 82 faizi qeyri-dövlət bölməsində istehsal olunmuşdur.

Rayonun aqrar sahəsində də müəyyən uğurlar əldə edilmiş, 2014-cü ilin məhsulu üçün 22438 hektar sahədə kənd təsərrüfatı bitkilərinin əkini aparılmışdır ki, bu da 2013-cü ilə nisbətən 289,9 hektar və ya 1,3 faiz çoxdur. Ötən illə müqayisədə taxıl əkini sahələri 0,8 faiz, qarğıdalı əkini sahələri 2,9 dəfə artmışdır.

2014-cü ilin iyul ayının 1-i vəziyyətinə 15,3 min hektar taxıl sahəsi biçilmiş, 27,4 min ton məhsul toplanmış, hər hektardan orta hesabla 18 sentner məhsul götürülmüşdür.

Heyvandarlıq sahəsi daha da inkişaf etmiş, 2013-cü ilin birinci yarımilliyi ilə müqayisədə iribuynuzlu mal-qaranın baş sayı 1,0 faiz, qoyunların baş sayı 1,5 faiz artmış, ət istehsalı 10,8 faiz, süd istehsalı 1,1 faiz, yumurta istehsalı 2 faiz, yun istehsalı 1,1 faiz çoxalmışdır. Bütövlükdə yanvar-iyun ayları ərzində 37,9 milyon manatlıq kənd təsərrüfatı məhsulu istehsal edilmişdir ki, bu da ötən ilin eyni dövrü ilə müqayisədə 13,1 faiz çoxdur.

2014-cü ilin birinci yarısında iqtisadi və sosial sahələrin inkişafı üçün bütün maliyyə mənbələrindən əsas kapitala 14,7 milyon manat investisiya yönəldilmişdir.

Rayonun tikinti təşkilatları tərəfindən hesabat dövründə 3,5 milyon manatlıq inşaat işləri görülmüşdür ki, bu da ötən ilin müvafiq dövrü ilə müqayisədə 41,6 faiz çoxdur. Birinci yarımillikdə əhalinin həyat səviyyəsi yüksəlmiş, ticarət və xidmət şəbəkələrindən əhaliyə 106,0 milyon manatlıq istehlak malları satılmış, 23,9 milyon manatlıq pullu xidmətlər göstərilmişdir.

Hesabat dövrü ərzində pərakəndə əmtəə dövriyyəsi 6,4 faiz, pullu xidmətlərin həcmi 10,0 faiz artmışdır.

Rayonun kollektor-drenaj şəbəkələrinin 15,7 km-lik hissəsində 48,6 min kub.m. həcmində lil və çöküntülərdən təmizlənmə işləri aparılmışdır. Əkin sahələrinin suvarma suyu ilə təminatının yaxşılaşdırılması üçün 145 km. uzunluğunda suvarma arxları lil və çöküntülərdən təmizlənmiş və arxların su ötürmə qabiliyyəti artırılmışdır. Rayonun Ərəbcəbirli, Şəhadət, Bəydövül, Alpout, Yeniarx, Çayarxı, Alxasava, Potu, Hacağabəyli, Qarayazı kəndlərində təsərrüfat daxili və təsərrüfatarası kollektorlarda şirə kanallarının təmizlənməsi işləri aparılmışdır. Göyçay şəhərini sel-sularından mühafizəsi işləri davam etdirilmiş, Göyçay çayında 140 metr uzunluğunda daş-beton bənd çəkilmişdir.

Hesabat dövründə rabitənin maddi-texniki bazasının möhkəmləndirilməsi istiqamətində müəyyən tədbirlər görülmüş, yanvar-iyun ayları ərzində əhaliyə, müəssisə və təşkilatlara 370,2 min manatlıq rabitə xidmətləri göstərilmişdir ki, bu da ötən ilin eyni dövrü ilə müqayisədə 13 faiz çoxdur. Cari ilin birinci yarısında əhalinin internet xidmətlərindən istifadəsini yaxşılaşdırmaq üçün şəhər və kənd yaşayış məntəqələrində avadanlıqlar quraşdırılmışdır.

(ardı var)

Məzahir Əhmədoğlu

Ədalət.-2014.-26 iyul.-S.4.