DÜNƏNKİ YEVLAX KEÇMİŞDƏ QALDI

Bugünkü Yevlax sabaha addımlayır

(Əvvəli ötən saylarımızda)

Ölkə həyatının uğurlu inkişaf etdiyi illər ərzində regionların da özünəməxsusluğu nəzərə alınmaqla yeni sferaya daxil olması təbii bir haldı. Yəni qəbul edilmiş Dövlət Proqramına uyğun olaraq həyata keçirilən bütün məsələlər öncədən hər bir region üzrə araşdırılıb dəqiqləşdirilmiş və yalnız konkret nəticələrə uyğun olaraq fəaliyyət prinsipləri müəyyənləşdirilmişdi.

Bu gün ölkə prezidenti İlham Əliyev cənablarının regionlara səfərləri zamanı da məhz həmin Dövlət Proqramına uyğun olaraq görülən işlər ilk növbədə müəyyənləşdirilir, nəticələr ölkə prezidentinə məruzə edilir, həyata keçirilən yeni obyektlərin açılış mərasimləri vasitəsilə bir növü hesabat verilir. Cari ilin birinci rübünün sosial-iqtisadi inkişafı və qarşıda duran vəzifələri özü üçün müəyyən etmiş Yevlax şəhər icra hakimiyyəti, xüsusilə icra hakimiyyətinin başçısı Qoca Səmədovun prinsipial mövqeyi onu göstərir ki, Yevlaxda sakinlərin istək və arzularının gerçəkləşməsinə gündəlik iş kimi baxılır. Əldə olunmuş uğurları gözdən keçirərkən bəlli olur ki, Yevlaxda sosial-iqtisadi yönümlü sahələrlə bərabər hər kəsə bilavasitə adiyyəti olan məqamlara da xüsusi önəm verilir.

Belə ki, qaz, yol, işıq, rabitə, poçt xidməti və digər məsələlərlə bahəm əhalinin sağlamlıq, təhsil, mədəniyyət problemləri də icra hakimiyyəti başçısı kabinetinin nəzarəti altındadır.

Təhsil, səhiyyə və mədəniyyət

Gəlin etiraf edək ki, bu gün Azərbaycanda səhiyyənin, təhsilin və mədəniyyət sahələrinin inkişafı üçün təkcə dövlət səviyyəsində deyil, həm də ictimai qurumlar, qeyri-hökumət təşkilatları xətti ilə də genişmiqyaslı işlər həyata keçirilir. Bu məsələdə birinci yer, yəni ön mövqe Heydər Əliyev Fonduna məxsusdur. Ölkənin birinci xanımı, millət vəkili, xoşməramlı səfir Mehriban xanım Əliyevanın birbaşa diqqət və qayğısı sahəsində paytaxtımız, iri şəhərlərimizlə yanaşı, regionlarımızda da böyük işlər görülüb. Yeni məktəb, xəstəxana, mədəniyyət ocaqları tikilir, təmir olunur və yaxud da yenidən bərpa olunur. Bu mənada Heydər Əliyev Fondu vasitəsilə respublikanın əksər bölgələrində məktəblər, uşaq bağçaları, xəstəxanalar müasir tələblərə cavab verə biləcək səviyyəyə gətirilmiş və qapılarını sakinlərin üzünə açmışdı. Konkret olaraq Yevlax şəhərində təhsil islahatlarının uğurla həyata keçirilməsi, yeni məktəb binalarının tikintisi, həmin məktəblərin, eləcə də bütün mövcüd təhsil müəssisələrinin maddi-texniki bazasının köklü surətdə yenidən qurulması, avadanlıqlarla təmin edilməsi, təlim-tərbiyə səviyyəsinin yüksəldilməsi və digər zəruri işlər hazırda görülməkdədir. Belə ki, əldə etdiyimiz faktlara istinadən deyə bilərik ki, Yevlax şəhər təhsil şöbəsi tərəfindən həyata keçirilən tədbirlər nəticəsində keçirilmiş fənn olimpiyadalarında 643 nəfər iştirak etmişdir ki, onlardan da 11 nəfəri respublika turuna qatılmış və yüksək nəticələr əldə etmişdir. Müxtəlif fənlər üzrə qaliblər sırasında olan Yevlax məktəbliləri ali məktəblərə qəbulda da müəyyən uğurlara imza atmışdılar. Onlar həm ali hərbi məktəblərə, həmçinin də digər ixtisaslar üzrə qəbul imtahanlarında fəal iştirak etmişlər. Nəticədə Yevlax məktəbliləri ötən dərs ilinin yekunlarına görə, müəyyən müvəffəqiyyətlər qazanmışdılar.

Bu gün Yevlaxda təkcə yerli şagirdlər deyil, həmçinin burada məskunlaşmış Ağdam, Kəlbəcər və digər işğal olunmuş bölgələrdən olan şagirdlər də təhsil alır. Doğrudur, onların özlərinin ayrıca məktəbləri fəaliyyət göstərsə də, amma qarşılıqlı əlaqələr, aparılan təhsil mübadilələri, bilik yarışmaları ümumi işə müsbət təsir göstərir.

Yevlax şəhərində məktəblərin, mədəniyyət evlərinin, kitabxanaların təmiri, bərpası işləri də şəhər rəhbərliyinin diqqəti mərkəzindədir. Burada körpələr evinə, uşaq bağçalarına xüsusi dliqqət yetirilir, onların qida təminatına, onun keyfiyyətinə daimi nəzarət olur. Yevlaxda səhiyyə ocaqlarının da yenidən qurulması, müasir avadanlıqlarla təmin edilməsi və həkim kadrlarının həmin ocaqlarda əhalinin sağlamlığı keşiyində durması istiqamətində gərəkli addımlar atılır. Təkcə bu məqsədlə 2014-cü ilin fevral ayının 7-də şəhər icra hakimiyyəti başçısının sərəncamı ilə xüsusi komissiya yaradılmışdı. Bu komissiyanın məqsədi şəhər əhalisinin tibbi müayinədən keçməsini təmin etmək və bu istiqamətdə gərəkli addımlar atmaqdır. Artıq həmin tədbirlər demək olar ki, müvəffəqiyyətlə başa çatmış və rayonun 50 yaşayış məntəqəsində 123712 nəfərin tibbi müayinədən keçməsi üçün qrafik tutulmuşdur. Tibbi müayinənin təşkili üçün mərkəzi şəhər xəstəxanasında, uşaq xəstəxanasında, Xaldan kənd sahə xəstəxanasında, eləcə də digər kənd, qəsəbə və həkim-tibbi məntəqələrində müvafiq tədbirlər görülmüş, həkim briqadaları yaradılmışdır. Xatırlatmaq yerinə düşər ki, bu işlərin həyata keçirilməsində şəhərin "Kür" qəzetinin də maarifləndirmə baxımından böyük xidməti olmuşdur. Göründüyü kimi, təkcə səhiyyə ocaqlarının yenidən qurulması deyil, həm də göstərilən səhiyyə xidmətinin keyfiyyətinin yüksəldilməsi Yevlaxda şəhər rəhbərliyinin diqqət mərkəzindədir. Bunun nəticəsidir ki, indi Yevlaxda, paytaxtda, digər şəhər və rayonların səhiyyə müəssisələrinə müraciət edənlərin sayı ilbəil azalır. Çünki peşəkar həkimlər və zəruri avadanlıqlar, xidmət şəraiti bu məsələdə öz sözünü deyir.

O ki qaldı Yevlaxda mədəniyyət sahələrinin hazırkı durumuna, onu da xatırladaq ki, şəhər rəhbərliyi bu məsələni də unutmur. İstər bayram tədbirlərinin, müxtəlif mərasimlərin keçirilməsi, anım günlərinin qeyd edilməsi, şəhər sakinlərinin asudə vaxtının təşkili və digər məsələlər şəhər mədəniyyət və turizm şöbəsi tərəfindən hazırlanmış və şəhər rəhbərliyi tərəfindən qəbul edilmiş plana uyğun şəkildə həyata keçirilir. Heç də təsadüfi deyil ki, bu gün Yevlaxın istirahət guşələrində, parklarında, mədəniyyət ocaqlarında bir-birindən maraqlı tədbirlər gerçəkləşdirilir, hazırlanan proqramlar, göstərilən xidmət Yevlax sakinlərinin ruhunu oxşayır. Xüsusilə şəhərin kukla teatrı balacalar üçün həmişə arzulanan bir qonağa çevrilib. Bunu nəzərə alan mədəniyyət işçiləri rəngarəng proqramlarla çıxış etməyə, həmişə yaradıcılıq axtarışları aparmağa maraqlıdırlar. Yevlaxda gənclərin ordu sıralarına yola salınmasında öz rəngarəng çıxışları ilə yaddaqalan məqamlar yaşadan mədəniyyət işçiləri hamının diqqət mərkəzindədir.

Son olaarq xatırladaq ki, bu gün Yevlaxda təkcə tikinti, abadlıq deyil, həm də təhsil, mədəniyyət, səhiyyə sahələri də yeni dövrün nəbzini tutudu. Deməli, bugünün Yevlaxı artıq hamının arzuladığı ünvana çevrilib.

Ceyhun RÜSTƏMOV

Ədalət.-2014.-4 iyun.-S.7.