ONLAR BU TORPAĞI SEVİRLƏR...

Vətəni, torpağı sevməyən insan yoxdur. Bu sevgi hələ bağçadan başlanır, məktəbdə inkişaf edir və sonra da insanların tutduğu mövqe ilə əlaqədar olaraq zaman-zaman özünü büruzə verir. Əlbəttə, vətən sevgisi öncə məktəbdə formalaşır. Füzuli rayonunda da şagirdlərin vətənə məhəbbət ruhunda böyüməsi və tərbiyə edilməsi üçün sözün həqiqi mənasında məktəblərdə ürəkaçan işlər görülür...

Arazın kənarındakı məktəb

Düzdür, Araz çayı burdan bir az aralıdan axır. Amma o çayın mehi, sərinliyi isti yay günlərində insanlarda xoş bir ovqat yaradır. O ovqat ki, onun təsiri altından uzun müddət çıxa bilmirsən. Füzulinin Birinci Mahmudlu kənd tam orta məktəbinin direktoru İxtiyar Hüseynov bir qədər qayğılı görsənsə də, ürəyi doludur. O, 2011-ci ildən bu məktəbə direktor təyin edilib və az bir müddətə kollektivdə sağlam mühit yarada bilib. Yəni müəllim-şagird münasibətləri çox yüksək səviyyədə təşkil edilib. Elə bunun nəticəsidir ki, pedaqoji kollektiv böyük uğurlara imza ata bilib. Ötən il bu məktəbi bitirmiş üç məzun - Elsevər Mehdizadə, Gülnaz Ağayeva, Səma Məmmədli müxtəlif ali məktəblərə qəbul olublar. Təbii ki, ali məktəb tələbəsi adını qazanmaq o qədər də asan deyil. İxtiyar müəllim bildirir ki, biz o məzunlarımızla fəxr edirik.

Ümidlər olan yerdə

Bu gün bu təhsil ocağında 126 şagird oxuyur. Demək olar ki, onların təlim-tərbiyəsi ilə 22 müəllim məşğuldur. Bayaq dediyimiz kimi, ilk növbədə məktəbin pedaqoji kollektivi ona çalışır ki, əsl vətəndaş yetişdirsinlər. Sözün həqiqi mənasında buna da nail olurlar. Çünki məktəbdə Şaməddin Məmişov (riyaziyyat), Əflatun Abasov (kimya), Hikmət Əliyev (tarix), Hüseyn Məmmədov (Azərbaycan dili və ədəbiyyat), Bağman Məmmədov (fiziki tərbiyə və hərbi hazırlıq) kimi təcrübəli pedaqoqlar çalışırlar. Onların tərbiyə verdikləri və dərs dedikləri şagirdlərlə müəllimlərin əziyyətini itirmirlər. Axı hamı yaxşı bilir ki, müəllimin o vaxt ürəyi açılır ki, onun yetişdirdiyi şagird ali məktəb tələbəsi olur. Bax, onda müəllimin də sevincinin həddi-hüdudu olmur.

Məktəbdə kəndin 4 şəhidinin şəkili lövhəyə vurulub. Bu şəkilləri görən şagirdlər istər-istəməz vətəni daha böyük məhəbbətlə sevirlər. Təsadüfi deyil ki, məktəbin şagirdi Fərman Bahadurlu tarix fənni üzrə keçirilən olimpiyadada birinci yerə çıxıb və o, Türkiyədə olimpiyada da iştirak edib.

Araz Dilağarda kəndində sevinc

Həmin günü bu kənddə fəaliyyət göstərən tam orta məktəbin şagirdlərinin də sevincinin həddi-hüdudu olmayıb. Çünki "son zəng" onların da həyatında öz izini qoyub. Belə ki, bu il məktəbi 22 məzun bitirib. Üstəlik də onların hər biri ali məktəblərə qəbul olmaq potensialına malikdir. Məktəbin direktoru Amil Mirzəliyev sevincini gizlədə bilmir. Ən azından ona görə ki, 11 il əziyyət çəkdikləri məzunlar çox savadlıdırlar. Çünki ilboyu şagirdlərin dərindən savad alması üçün müəllimlər əlindən gələnləri əsirgəməyiblər.

Məqsədə çatmaq asan deyil

Əlbəttə, bayaq dediyimiz kimi, hər bir məzunun məqsədi ali məktəbə qəbul olmaqdır. O şagirdi ki, qarşısına məqsəd qoymur, ali məktəbdə oxumağa can atmır, deməli, onun gələcəyi o qədər də ürəkaçan olmayacaq.

Amma bu təhsil ocağında oxuyanların əksəriyyətinin qəlbində tələbə olmaq arzusu var. Məktəbin direktoru Amil Mirzəliyev bildirir ki, uzun müddət idi ki, məktəbi bitirən məzunlardan heç kim ali məktəbə qəbul ola bilmirdi. 2011-ci ildə yeni direktor təyin olunandan sonra hər şey dəyişdi. Elə ilk buraxılışda 3 nəfər məzun ali məktəb tələbəsi adını qazandı.

Amil müəllim qeyd edir ki, biz buna ciddi intizamın və yüksək tələbkarlığın nəticəsində nail ola bildik. İndi məktəbimizdə 109 şagird oxuyur. Onların təlim-tərbiyəsi ilə 28 müəllim məşğuldur. Məzunlarımızdan Nuriyyə Bəylinikli, Süleyman Becanov, Elgün Kərimov daha istedadlıdırlar. İnanırıq ki, onlar bizim ümidlərimizi doğruldacaqlar.

Müəllimlərin əziyyəti itmir

Bayaq qeyd etdik ki, şagirdlərin savadlı və tərbiyəli böyüməsində müəllimlərin çox böyük əziyyəti var. Yəni bu sahədə onların üzərinə yüksək məsuliyyət hissi düşür. Direktor Amil Mirzəliyev onu da bildirir ki, müəllimlərimiz hər bir şagirdə fərdi qaydada yanaşır, onlardakı istedadın və bacarığın üzə çıxmasına çalışırlar. Çünki istənilən şagirddə istedad var. Amma sadəcə olaraq, yaxşı pedaqoq və təcrübəli müəllim əziyyət çəkib o bacarığı üzə çıxarmalıdır. Mən qürur hissi ilə deyə bilərəm ki, məktəbimizin müəllimlərindən Cəmilə Şamıyeva (Azərbayan dili və ədəbiyyat), Ruhiyyə Quliyeva (fizika), Sevda Tanrıverdiyeva (ibtidai sinif), Gülbahar Eyvazova (tarix), Əfruz Zeynalova (ibtidai sinif), İsmayıl Abbasov (fiziki hazırlıq və hərbi vətənpərvərlik) şagirdlərin sevimlisidirlər. Biz bir daha məzunlarımıza inanır və onların xoş sorağını səbirsizliklə gözləyirik.

Faiq QİSMƏTOĞLU

Ədalət.-2014.-13 iyun.-S.7.