Rəssam Adil olanda...

İtaliyalı mer hər gün hansı azərbaycanlı rəssamın əsərinə tamaşa edir?

Rəssam Adil Əsədli 60 illik yubileyinə sayılı günlər qalmış fərdi-yaradıcılıq sərgisi ilə onu tanıyanların görüşünə gəldi. Mədəniyyət və Turizm Nazirliyi ilə Rəssamlar İttifaqının birgə təşkil etdiyi sərgidə yubilyar yaradıcılıq imtahanı verdi. Rəssamlar İttifaqının Vəcihə Səmədova adına sərgi salonunda rəssamın bu illər ərzində yaratdığı 70-dən çox rəngkarlıq və qrafika əsəri nümayiş etdirildi.

Yurduna, sənətinə və dostlarına bağlı fədakar

Uzun illərdən bəri tanıdığım, sadə və təvazökar olduğu qədər də istedadlı rəssam Adil Əsədlini bir qədər geniş təqdim etməyə ehtiyac varsa, yazım. Adil 60 il əvvəl Lənkəranda anadan olub. Əzim Əzimzadə adına Dövlət Rəssamlıq Məktəbini, sonra isə Pedaqoji İnstitutun bədii qrafika fakültəsini bitirib. Bu günə kimi üç fərdi sərgisi olub, beynəlxalq və ölkə əhəmiyyətli bir neçə sərgidə iştirak edib və mükafatlar qazanıb, əsərləri ABŞ, İngiltərə, Fransa, Türkiyə, Rusiya, İran, Gürcüstan, Polşada yaşayan sənətsevərlərin şəxsi kolleksiyalarında saxlanılır.

Adil Əsədli həm də bacarıqlı pedaqoqdu, 1986-cı ildən Lənkəranda Uşaq Rəssamlıq Məktəbinə rəhbərlik edir, yetirmələrinin əksəriyyəti bu sənətdə özlərini sübut etməyi bacarıblar. Onların arasında əsərləri ilə Yaponiyada, Misirdə, Türkiyədə, Çexiyada keçirilən sərgi və müsabiqələrdə uğur qazanmış istedadlar da var.

60 yaşlı Adilin bir gözəl xüsusiyyətini də qeyd etmək lazım, gözəl sənətkar olmaqla yanaşı nəcib insandı, dostluğa sadiq adamdı. Yubileyi ilə bağlı sərgidə iştirak edənlər arasında ən çox sevinənlər də məhz dostları, yaxınları idi.

Dəyərli publisistimiz Nemət Veysəlli ilə söhbətləşirəm. Həmsöhbətim uzun illərdən bəri tanıdığı rəssamın şad günündə fikirlərini sevə-sevə bölüşür: "Adil istedadlı və fədakar rəssamdı. Paytaxtdan kənarda yaşa-yaşaya rəssamlıqla məşğul olur, üstəlik şagirdlər yetişdirir. Tanıdığım illər ərzində onu həmişə belə görmüşəm. Adilin Lənkərandakı evində, rəhbərlik etdiyi Rəssamlıq Məktəbində dəfələrlə olmuşam, barəsində "Qobustan" jurnalında yazı çap etdirmişəm. Çox sevinirəm ki, Mədəniyyət və Turizm Nazirliyi, Rəssamlar İttifaqı bölgələrimizdə yaşayan belə istedadlı və fədakar insanları qiymətləndirir, onların sərgilərini təşkil edir. Bu, çox xeyirxah bir işdi".

İtaliyada Lənkəran Xanının evi

Adil Əsədlinin fərdi-yaradıcılıq sərgisinin açılışından öncə ev sahibi-Rəssamlar İttifaqının sədri, Xalq rəssamı Fərhad Xəlilov çıxış edir və yubilyarın yaradıcılığını yüksək qiymətləndirir: "Adil Əsədli təvazökar insandı, bu, sənətkar üçün yaxşı xüsusiyyətdi, mən belə insanları çox sevirəm. Adilin 60 yaşına qədər çox az sərgisi olub, bunun da səbəbi var, çünki bu illər ərzində o, daha çox tələbələrinin sərgilərini keçirməyə çalışıb. Bunun özü də Adil Əsədlinin necə genişürəkli bir insan olduğunun göstəricisidi. Rəssamlar İttifaqı həmişə belə istedadlı insanlar üçün əlindən gələni etməyə hazırdı. Yaradıcı insan hansı yaşında olmasından asılı olmayaraq həmişə imtahan verir. Bu gün açılışına toplaşdığımız fərdi-yaradıcılıq sərgisi də Adilin sənətsevərlər qarşısında imtahanıdı. Onun yaradıcılığı ilə tanış olan, xüsusilə qrafik işlərini yüksək qiymətləndirən bir şəxs kimi deyə bilərəm ki, Adil Əsədli bu imtahandan da əla qiymət alacaq".

Mədəniyyət və Turizm Nazirliyinin tətbiqi və dekorativ sənət sektorunun müdiri Qalib Qasımov nazir Əbülfəs Qarayevin adından yubilyar rəssamı təbrik edir və ona uğurlar arzulayır. Əməkdar incəsənət xadimi, sənətşünas Ziyadxan Əliyev keçmiş tələbəsinin qazandığı nailiyyətlərdən sevindiyini dilə gətirir. Lənkəran Şəhər İcra Hakimiyyətinin şöbə müdiri Əlimərdan Əliyev istedadlı rəssamı, dəyərli pedaqoqu həmyerliləri adından təbrik edir və maraqlı bir faktı toplaşanların diqqətinə çatdırır. Məlum olur ki, Lənkəranla qardaşlaşmış şəhərlərdən biri də İtaliyanın Çerveteri şəhəridi. Lənkəran Şəhər İcra Hakimiyyətinin başçısı Taleh Qaraşov Çerveteriyə səfəri zamanı mer Alessio Paskuçiyə məhz Adil Əsədlinin "Lənkəranda Xan evi" əsərini bağışlayıb. İtaliyalı mer bu tablonu kabinetində asıb və hər gün lənkəranlı rəssamın əsərinə tamaşa edir.

Sonda onu da xatırladım ki, Adil Əsədlinin fərdi-yaradıcılıq sərgisinə baxmaq üçün iyunun 22-dək vaxtımız var.

Etibar CƏBRAYILOĞLU

Ədalət.-2014.-19 iyun.-S.5.