BAHARA BOYLANIR XOŞ BİR OVQATLA...

Müjdə çiçəklər, gözəl duyğular...

İl başlayandan bəri havalar nə qədər qeyri-sabit keçsə də, Vətənin hər tərəfində ilk baharın nəfəsi duyulur. Yaşıla bürünən çöllər, yamaclar, cırtlayan tumurcuqlar, alça, ərik, şaftalı ağaclarındakı müjdə çiçəklər, builki sərt qışın çox çətin sınaqlarına çəkilən etibarlı quşların şənlənməsi, insanların Novruz əhval-ruhiyyəsi hər ötən gün bizi al-əlvan bahara qovuşdurur. Heç bilirsiniz, ilin bu vədəsində Zaqatala necə gözəl və sevimli olur? Mən əvvəllər bunu böyük bir heyranlıqla deyib xatırlatmışam: Tanrı Zaqatalaya nələr bəxş etməyib ki... Dağlar, meşələr, çaylar, bərəkətli düzlər, meyvəli bağlar... Buranın bircə dənizi çatışmır...

Görəsən bizim bu Xəzərdə "Zaqatala" adlı gəmi üzürmü?

Tanrı Zaqatalaya həm də gözəl, qonaqpərvər, mehriban və zəhmətkeş insanlar göndərib. Onları sevə-sevə göndərib ki, bu insanlar bu doğma eldə-diyarda təbiətlə yarışa bilən başqa gözəlliklər də yaratsınlar. Vətənpərvər, el-oba təəssüblü Zaqatala camaatı da əl-ələ verərək öz şəhərlərini, kənd və qəsəbələrini daha gözəl, daha yaraşıqlı etməyə çalışırlar. Onları ruhlandıran amillərdən biri və ən əsası da Prezidentlərinə olan sevgi və rəğbətdir, inamdır. Və bu amil təbii fəlakət zamanı Azərbaycan Respublikasının Prezidenti İlham Əliyevin hadisəyə müstəsna həssaslıqla yanaşmasında və dünyanın heç bir ölkəsində görünməyən qayğı və diqqətində təcəssüm etdi. Zəlzələdən ziyan çəkmiş kəndlər indi Avropanın ən abad və müsir qəsəbələrinə, hətta kurort və istirahət mərkəzlərinə bənzəyir.

Başqa məsələlər də var. Gözəl Zaqatala, daha gözəlləşməkdə, eyni zamanda iqtisadi cəhətdən daha da inkişaf etməkdədir. Qədirbilən zaqatalalılar bütün bunlara görə daim öz sevimli Prezidentlərinə minnətdarlıq edirlər. Elə bir yığıncaq, elə bir görüş və söhbət olmaz ki, orada rayon icra hakimiyyətinin başçısı Mübariz Əhmədzadəyə bütün bu məsələlər barədə ürək sözlərini bildirməsinlər. Çünki həmişə onlarla bir yerdə olan, sevinclərini-kədərlərini bölüşən başçıya da böyük hörmət və rəğbət bəsləyir, ona inanır, özlərinə arxa-dayaq bilirlər. Sadə və haqq-ədalət adamı olduğuna görə, Vətəninə, Xalqına və Prezidentinə sədaqətli olduğuna görə.

Elə bu birliyin, ölkə rəhbərliyinə sədaqətin nəticəsidir ki, Zaqatala rayonu 2013-cü ili də diqqət çəkən uğurlarla başa vurdu. Ötən ilin yekunlarına həsr olunmuş hesabat yığıncağında da rayonun sosial-iqtisadi inkişafı və digər məsələlər müzakirənin aktual istiqamətinə yönəldi.

M.Əhmədzadə:

"bütün Zaqatala camaatı

cənab Prezidentə minnətdardır..."

Zaqatala Rayon İcra Hakimiyyətinin başçısı Mübariz Əhmədzadə hesabat məruzəsi ilə çıxışı zamanı görülən işlərlə yanaşı qarşıda duran vəzifələrdən də danışdı:

- 2013-cü il rayonumuz üçün yaddaqalan hadisələrlə zəngin olmuşdur. Avqustun 17-də bölgəmizə səfər edən Azərbaycan Prezidenti cənab İlham Əliyev Zaqatala şəhərinin tarixi mərkəzinin yenidənqurma və bərpadan sonrakı vəziyyəti ilə tanış olmuş, Zaqatala şəhərinə və ətraf kəndlərə içməli suyun verilməsi mərasimində iştirak etmiş, Heydər Əliyev Fondu hesabına inşa edilmiş 600 şagird yerlik Bəhmətli kənd tam orta məktəbinin yeni binasının və "Tumurcuq" uşaq bağçasının açılışlarında iştirak etmişdir.

2013-cü ildə Yaponiyanın, İsrailin, Gürcüstan və Polşa Respublikalarının Azərbaycan Respublikasındakı Fövqəladə və Səlahiyyətli Səfirləri, ABŞ, Türkiyə və digər xarici ölkələrin onlarla nümayəndələri rayonumuzun qonaqları olmuşlar.

Respublikada aparılan uğurlu iqtisadi siyasətin nəticəsi olaraq 2013-cü ildə Zaqatalada da iqtisadiyyatın dinamik inkişafına nail olunmuş, məhsul istehsalı 2012-ci illə müqayisədə sənayedə 18,0 faiz, kənd təsərrüfatında 6,8 faiz, rabitədə 6,4 faiz, ticarətdə 3,8 faiz, pərakəndə əmtəə dövriyyəsi 3,8 faiz, pullu xidmətlərin həcmi 7,1 faiz artmışdır. Hesabat ilində əsaslı kapitala yönəldilən investisiyaların həcmi 172,3 milyon manat, o cümlədən tikinti quraşdırma işləri 145,1 milyon manat təşkil etmişdir.

Azərbaycan Respublikası regionlarının sosial-iqtisadi inkişafı Dövlət Proqramlarında Zaqatala rayonu üzrə nəzərdə tutulan tədbirlərin icra olunması nəticəsində yeni emal və istehsal müəssisələri, o cümlədən Beton məmulatları zavodu, gül, süd və tütün emalı zavodları, quş əti istehsalı fabriki, 8 findiq emalı, süfrə suları, 1 meyvə-tərəvəz istehsalı müəssisələri və digər sosial obyektlər tikilərək istifadəyə verilmişdir.

Dövlət Proqramların icrası, yüksək iqtisadi fəallıq şəraiti məşğulluq məsələlərinin səmərəli həllinə geniş imkanlar açmış, rayonda 2013-cü ildə 989-u daimi olmaqla 1095 iş yeri, 2003-cü ildən sonra isə 11193-ü daimi olmaqla, 15914 yeni iş yeri açılmışdır ki, bu da öz növbəsində işsizliyin böyük dərəcədə azaldılmasına xidmət göstərmişdir.

2013-cü ildə sahibkarlığın inkişafına dövlət dəstəyi daha da gücləndirilmiş, iqtisadiyyatın müxtəlif sahələri üzrə Sahibkarlığa Kömək Milli Fondunun vəsaiti hesabına 47 sahibkara 701.0 min manat güzəştli kredit verilmiş, 12 sahibkara 0,59 ha torpaq sahəsi satılmış, alkoqollu içkilərin və tütün məmulatlarının satışı üçün 60 ədəd lisenziya, 14 sahibkarlıq obyektinin layihələndirilməsinə və 14 sahibkarlıq obyektinin tikintisinə sərəncam verilmiş, əhaliyə və iş adamlarına ümumilikdə 43,1 milyon manat həcmində kreditlərin verilməsi təmin edilmişdir ki, bu da 2012-ci ilin göstəricisindən 10,8 faiz çoxdur.

(ardı gələn sayımızda)

Məzahir ƏHMƏDOĞLU

Ədalət.-2014.-4 mart.-S.7.