Sən istəyəndə sevmədim səni

Kəmalə Abiyeva

8 MART

Bu gün hər qəmini soyunub dünya,

Çaylar gülüş olub dodaqlarında.

Təbəssüm donunu geyinib dünya

Sevinc gözü dolub bulaqların da.

Ulduzlar axışır bu gün torpağa,

Qadın gözlərindən nur qoparmağa.

Günəş də göylərdən enibdi yerə

Qadın ürəyindən od aparmağa.

Dünya sağlıq deyir qadın şəninə,

Dənizlər əlində piyaləsidir.

Səpilən qadının qədəmlərinə

Dağların nəğməkar şəlaləsidir.

Bu gün təravətə dönübdü çöllər,

Bu gün səadətə bürünüb ellər.

Məhəbbət, gözəllik çələngi kimi

Bu günü saçına taxıbdı illər.

İKİ BƏXTƏVƏR

Bu dünyada iki kor var

Biri mənəm-

səndən başqa bir kimsəni görməyən.

Biri də sən

Heç vaxt məni görməyən.

Bu dünyada iki kar var-biri mənəm

Səndən başqa kimsəni eşitməyən.

Biri də sən

Ürəyimin harayını

Heç zaman eşitməyən.

Bu dünyada iki xoşbəxt bəxtəvər var

Biri mənəm-çünki səni sevirəm.

Biri də sən-çünki səni sevirəm.

Qar yağırdı

Bu gecə səni gördüm,

Bu gecə qar yağırdı.

Ikimizi bir yerə

Yağan qarmı çağırdı?

Yağan qar elə bil ki,

Göylərin busəsiydi.

Bəlkə göylə torpağın

Sevgi əfsanəsiydi.

Qar yağırdı gəlintək

Bəzəyirdi hər yanı.

Tərtəmiz bir ağ sevinc

Bürüyürdü dünyanı.

Bu ağappaq gözəllik

Göylərin sehridimi?

Torpağa danışdığı

Gizli bir sirridimi?

Öz bəyaz libasında

Möcüzəydi bu gecə.

Xoşbəxt idik ikimiz,

Xoşbəxt idi bu gecə.

Torpaq xumarlanırdı

Bu gecə qar yağırdı.

Ikimizi bir yerə

Yağan qarmı çağırdı?

Bizə elə gəlirdi

Göylər gülümsəyirdi.

Hər düşən qar dənəsi

"Xoşbəxt olun"deyirdi.

BAĞIŞLA MƏNİ

Mən sən istəyəndə sevmədim səni

Özüm istəyəndə sevdim ay ana.

Bağışla məni.

Bilmədim qədrini sən istəyəndə

Özüm istəyəndə bildim ay ana

Bağışla məni...

Mən sən istəyəndə anlamadım ki,

Özüm istəyəndə anladım səni,

bağışla məni...

nə özüm doyunca,

nə sən doyunca

oxşamadım səni,əzizləmədim.

Heç nəyi

vaxtında eləmədim mən.

Gec oldu...

Gec qaldım...

Gecikdim ana.

Adət eləmişdim gözləməyinə

Sanırdım həmişə gözləməlisən.

Amma ki unutdum ölüm gözləməz

Ölüm sənin kimi səbr edə bilməz.

İndisə oxşayıb, əzizləyirəm

Mən özüm doyunca sevirəm səni...

Gözlərim doyunca sevirəm səni ...

Bağışla nə olar,

Bağışla məni...

Bağışla, ay ana, özüm doyunca...

Bağışla ay ana,gözüm doyunca...

Bağışla məni...

SADƏCƏ

Sadəcə sevilmək istəyirəm

Sən məni sevdiyin kimi.

Sadəcə sevinmək istəyirəm

yanında sevindiyim kimi.

Sadəcə başımı dizinə qoymaq,

Dünyanı başımın altında duymaq ,

Bir azca bu duyğuyla uyumaq istəyirəm.

yad səs eşitməyim deyə səsini,

Yadlıqdan bitməyim deyə

nəfəsini istəyirəm.

Sən qədər doğmalıq istəyirəm.

Sadəcə əllərini istəyirəm

Ürəyimi bir yerə yığsın,

ağrılarımı oxşasın,

bir azca rahatlasın.

Səndən başqa

Sənin kimi kim edər ki bunu?

Sənin qədər kim istər ki bunu?

Yanındaydım son nəfəsində

hər tərpənişimdə

"ana gəlmisən?"deyirdin.

Ananı istəyirdin.

Mən də sadəcə

səni istəyirəm ana.

Sadəcə...səni...ana...

MƏNƏ VƏTƏNİ ANLAT

Mənə İstanbulu anlat nasıldı

Nazim Hikmət

Səni özlədim

Mənə "sevdiyimi anlat" deməyə

birini gözlədim.

Aradım-tapmadım.

Sən mənim sevdiyimsən.

Adı AZƏRBAYCAN olan sevgilimsən.

Kimə deyim"mənə vətəni anlat"

Kimnən sorum sevdiyim necədi?

Necədi saçları,əlləri ,

necədi gözləri?

Varmı ağrıyan yeri?

Kimdi tumarlayan,qoynunda yatan?

Kimə deyim anlat Təbrizi,Şuşanı,

Dərbəndi,Göycəni,Laçını?

Kimə deyim:anlat mənə Xocalını???

Anlat vətənimi-

zorlanan sevgilimi.

Anlat ürəyini,

Anlat hələ sevirmi məni?

Sevə bilirmi?

Anlat nifrətini.

Anladım bəlkə necə nifrət etdiyini.

Səni özlədim

Guya sevdiyimsən,

güya ilk sevgim-anamsan deyə,

Elə hey"mənə sevdiyimi anlat"deməyə

birini gözlədim.

həsrət qaldım ömür boyunca.

Anlat ey...Mənə vətəni anlat.

Anlat mən doyunca,

Anlat doyunca...

Kim anlada bilər ki,

Kim anladar ki,özüm anlamayınca?..

HƏLƏ

Eşitmək istəmədiyin,

Eşidə bilmədiyin,

Ya da eşitmədiyin

Yalan deyil ki hələ.

Eşitmək istədiyin,

Ya eşidə bildiyin,

Ya da hər eşitdiyin

Həqiqət deyil hələ.

GECƏLƏR

Qoy gecələr mənim olsun ağrılarıyla,

Yalanıyla doğrusuyla,nağıllarıyla.

Gecələrim səhərimə açılan qapı,

Gündüzlərin şirinliyi səhvi, günahı.

Gecələrim ürəyimə açılan qapı,

Sevincimin gülüşüdür, dərdimin ahı.

Gecələrim həm düşmənim,həm həmdəmimdi,

Gecələrdə hər nə varsa yalnız mənimdi.

Mən gecələr özüm boyda dözüməm dözüm

Mən gecələr hər kiməmsə özüməm özüm.

GEDƏK

Silahlar qatil olmur

Fərid Hüseyn

Sevinci doyuran göz yaşları

Doyura bilmir silahları.

Silahlar doymur,silahlar duymur.

ölən arzularla ölmür.

Silahlar qatil olmur.

Qatil olmur silahlar.

Silahlar qatil doğar

sonra sinəsinə sığınar,

əlləri üstə gəzər,

silahların övladıdı qatillər.

Analar qatil doğmaz,

qatil anası olmaz.

Analar ölüm doğmaz.

Analar ölüm anası olmaz.

Analar silahları anlamaz...

Silahlar anaları anlamaz...

Analar nifrət edər cocuqlar ölən,

Ölümlər olan-günahlar olan yerə.

Tutaq anaların əlindən

Gedək,

gedək silahlar ölən-

günahlar olmayan yerə.

DARIXIRDIM

Gündüz gecəyə qovuşurdu.

darıxırdım,

Xəzərim, sənə baxırdım

Sənsə elə bil sonsuzluğa qovuşurdun,

sahilin varmış kimi görünmürdün.

Darıxırdım,sənə baxırdım.

Səni oxşayırdım,

sənə oxşayırdım.

Darıxmağın sahili eynidi

darıxmağın sahili bitdiyi yerdi.

***

Ümid dözümün təsəllisidi,

bər-bəzəyidi.

Amma həmişə insanın gərəyidi.

Ümid insanın

aldanmaq istəyidi.

***

Gözlərimin ağrıları ürəyimdə,

ürəyimin ağrıları gözlərimdə.

***

Ağlım vicdanıma,

Ürəyim ağlıma,

Gözlərim ürəyimə

təsəlli verir

***

Girir ömrümüzə rahatca yalan,

Yalanla doludur böyür-başımız.

Yalandır həmişə bizimlə olan,

Elə həqiqətdi axtardığımız.

***

Ürək, nə vaxtdan ki,

yuxularıma

qənim kəsildin sən,

anladım yaşayıram mən.

***

Ağılsızın sözünün nə mənası

istər qulu olsun,ya da ağası.

YETƏR

"Kişiləri qadınlar idarə edir"deyirlər.

Bəs qadınları?

Bunu bilmirlər.

Məncə hərə özünü

idarə etsə yetər.

BAHAR GƏLİR

Şəlalər əl çalır

Quşların nəğməsinə.

Çaylar da sığal çəkir

Torpağın sinəsinə.

Dağlar,düzlər, yamaclar

elə bil təbiətə

yenə də naz eyləyir.

Yurduma bahar gəlir.

Çiçəklər gözümüzün

sevincinə bənzəyir,

ilahi bir gözəllik

hər tərəfi bəzəyir.

Rənglərin əlvan sirri

ağacların sehrli

tumurcuq gözəlliyi

yenə də üzə gülür

yurduma bahar gəlir.

Ədalət.-2014.-6 mart.-S.6.