XALQIN SAĞLAMLIĞINA VƏ GƏLƏCƏYİNƏ HESABLANAN DÖVLƏT QAYĞISI

(Mövzu əsasında XI yazı)

Azərbaycan səhiyyəsi dünya standartları səviyyəsində

Azərbaycan dövlətinin və ölkə Prezidenti cənab İlham Əliyevin səhiyyəyə göstərdiyi qayğı digər sahələrdə olduğu kimi bu sistemdə də önəmli irəliləyişlərlə izlənməkdədir. Məhz bu siyasətin nəticəsidir ki, birinci Dövlət Proqramının icrasının ikinci ilindən etibarən Səhiyyə Nazirliyi sistemində genişmiqyaslı islahatlar həyata keçirilməyə başlandı. İstər Bakı şəhərində, istərsə də regionlarda əksər tibb müəssisələrinin yenidənqurma və bərpa işləri sürətləndi. Daha sonra neçə-neçə yeni tibb ocaqları, diaqnostika mərkəzləri tikildi. Köhnə sanitar-epidemioloji rejimə uyğun olmayan müəssisələr ya söküldü, ya da standartlara uyğun şəkildə əsaslı təmir edildi. Tibb müəssisələri müasir avadanlıqlarla, dərman ləvazimatlarla təmin olundu. Tibb sahəsində daha böyük uğurlar qazanılması üçün bir sıra xarici ölkələrlə işgüzar münasibətlər quruldu. Görüşlər, təcrübə mübadilələri, yeniliklərin tətbiqi, kadr hazırlıqları və başqa tədbirlər ardıcıl şəkil aldı.

Sosial-iqtisadi inkişafın uğurlu nəticələri

Əhalinin sağlamlığının qorunmasına dövlətimizin son dərəcədə qayğı ilə yanaşmasını göstərən ən mühüm amil səhiyyəyə ayrılan büdcə vəsaitinin ildən-ilə artırılmasıdır. Azərbaycan Respublikasının Prezidenti İlham Əliyev regionlara səfərlərində, bütün görüş və çıxışlarında sosial-iqtisadi inkişafın effektiv nəticələri kimi əhalinin sağlamlığına göstərilən qayğını xüsusi vurğulayır. Cənab Prezident bu həssas sahənin daim diqqət mərkəzində saxlanılmasının vacibliyini strateji mələsə kimi dəyərləndirdi.

Regionların sosial-iqtisadi inkişafı respublikamızın hər yerində olduğu kimi Kürdəmir rayonunda da uğurlu nəticələrlə diqqət çə kir. Xüsusilə son illər bu rayonda inkişaf tempi daha da artıb. Təbii ki, bu inkişafın əsas istiqamətləridən biri də səhiyyə sahəsidir.

Kürdəmir rayonunda bu sahəyə tanınmış mütəxəssis və bacarıqlı təşkilatçı Nizami Feyzullayev başçılıq edir. Kürdəmir mərkəzi rayon xəstəxanasının baş həkimi N.Feyzullayevlə söhbətimiz zamanı o, görülən işlər barədə geniş məlumat verdi.

Görülən işlər inam yaradır

- Əsası Ulu Öndər Heydər Əliyev tərəfindən qoyulmuş və prezidentimiz cənab İlham Əliyev tərəfindən uğurla davam etdirilən uğurlu iqtisadi siyasət respublikamızda digər sahələrlə bərabər səhiyyə sistemində də öz bəhrəsini vermişdir. Belə ki, respublikamızda son illərdə 500-dən çox səhiyyə obyektləri tikilmiş və ya əsaslı təmir olunmuş, müasir avadanlıqlarla təmin olunaraq əhalinin istifadəsinə verilmişdir. Regionların sosial-iqtisadi inkişafı ilə əlaqədar dövlət proqramları qəbul olunmuşdur. Bu proqramlarda nəzərdə tutulan məsələlər uğurla öz həllini tapmışdır.

Rayonumuzda digər məsələlərlə yanaşı, səhiyyə sahəsində də xeyli işlər görülmüşdür. Belə ki, mərkəzi rayon poliklinikası yenidən tikilmiş, mərkəzi rayon xəstəxanası əsaslı təmir olunmuş və müasir avadanlıqlarla təmin olunmuşdur. Muradxan, Qarasaqqal, Topal Həsənli, Xəlsə kəndlərində həkim məntəqəsi, Şahbəyli və Şüşün kəndlərində tibb məntəqələri tikilib istifadəyə verilmişdir.

Bu il də rayonumuzda rayonlararası Psixiatriya xəstəxanasının tikilməsi nəzərdə tutulmuşdur.

Hazırda rayonun 11.0129 nəfər əhalisinə 157 MRX-sı, 5 yerlik hemodializ şöbəsi, 25 çarpayılıq uşaq xəstəxanası, 15 çarpayılıq Mollakənd, 25 çarpayılıq Karrar kənd xəstəxanaları, 13 həkim və 33 tibb məntəqəsi xidmət göstərir. Rayonun tibb məntəqələri üçün nəzərdə tutulan vahid iş yerindən 108 həkim, 416 orta tibb işçisi fəaliyyət göstərir. 2013-cü ilin 12 ayı ərzində 6 nəfər həkim, 25 nəfər tibb bacısı ixtisasartırma və təkmilləşmə kurslarından keçmişdir. 11 nəfər seminarda iştirak etmişdir. 2 əməkdar həkimimiz və bir "Tərəqqi" medalı alan həkimimiz var.

(ardı gələn sayımızda)

Məzahir ƏHMƏDOĞLU

Ədalət.-2014.-13 mart.-S.7.